ជាតិ
បទសម្ភាសន៍
លោក ស៊ុន ចាន់ថុល បញ្ជាឲ្យដកអាជ្ញាប័ណ្ណសាលាបង្រៀនបើកបរណា ដែលគ្មានកម្មវិធីបង្រៀនបើករថយន្តធុនធ្ងន់ រូបពីក្រសួងសាធារណការ និងដឹកជញ្ជូន
× ភ្នំពេញ៖ រដ្ឋមន្ត្រីក្រសួងសាធារណការ និងដឹកជញ្ជូន បញ្ជាឲ្យដកអាជ្ញាប័ណ្ណពីសាលាបង្រៀនបើកបរណា ដែលគ្មានកម្មវិធីបង្រៀនបើករថយន្តធុនធ្ងន់ ឬគ្មានរថយន្តប្រភេទធុនធ្ងន់ សម្រាប់បង្រៀនឲ្យបានត្រឹមត្រូវ។ ការបញ្ជារបស់លោក ស៊ុន ចាន់ថុល នេះ ធ្វើឡើងក្រោយពីសង្ស័យថា គ្រប់សាលាបង្រៀនបើកបរទាំងអស់ មិនទាន់អនុវត្តឲ្យបានត្រឹមត្រូវតាមស្ដង់ដារ ពោលគឺនៅខ្វះចន្លោះនៃការបង្រៀនរថយន្តធុនធំ ប្រភេទធ្ងន់នេះ។
លោក ស៊ុន ចាន់ថុល បាននិយាយថា រថយន្តប្រភេទធំ មានជាង២៣ម៉ឺនគ្រឿង ប៉ុន្តែអ្នកមានប័ណ្ណបើកបរតែ៦០ភាគរយប៉ុណ្ណោះ លើចំនួនរថយន្តដែលបានចុះបញ្ជី។ ដូច្នេះបានន័យថា អ្នកបើកបររថយន្តធុនធ្ងន់ ភាគច្រើនគ្មានបណ្ណបើកបរតាមច្បាប់ត្រឹមត្រូវ ទៅតាមប្រភេទរថយន្តនោះទេ។
ដោយសារតែបញ្ហានេះ ទើបលោក ស៊ុន ចាន់ថុល និយាយដល់រឿងសាលាបង្រៀនបើកបររថយន្តនៅកម្ពុជា ដែលមិនទាន់មានស្ដង់ដារត្រឹមត្រូវ។ ចំណុចលោក ស៊ុន ចាន់ថុល មើលឃើញនោះ គឺភាពខ្វះចន្លោះនៃការបង្រៀនរថយន្តធុនធំ ប្រភេទធ្ងន់ ដែលសាលាបង្រៀនបើកបរទាំងនោះ នៅមិនទាន់មានកម្មវិធីបង្រៀនរថយន្តប្រភេទនេះ។
សូមស្ដាប់ប្រសាសន៍លោក ស៊ុន ចាន់ថុល៖
ថ្លែងក្នុងពិធីសម្ពោធដាក់ដំណើរការជាផ្លូវការមជ្ឈមណ្ឌលបណ្តុះបណ្តាលបើកបររថយន្តធុនធ្ងន់នៅព្រឹកថ្ងទី៣១ តុលានេះ រដ្ឋមន្ត្រីក្រសួងសាធារណការរូបនេះ បាននិយាយដូច្នេះថា៖«ខ្ញុំជឿជាក់ថា មណ្ឌលបណ្ដុះបណ្ដាលយានយន្តបើកធុនធំ គឺមានតែមួយទេនៅកម្ពុជាសព្វថ្ងៃបើតាមខ្ញុំដឹង។ ទោះជាក្រសួងសាធារណៈការ និងដឹកជញ្ជូន បានចេញអាជ្ញារបណ្ណទៅសាលាបង្រៀនបើកបរ២៩សាលា ដែលមាន១៨០សាខា ។ ប៉ុន្តែខ្ញុំមិនជឿថា សាលាទាំង២៩នោះ មានរថយន្តប្រភេទធុនធំ បង្រៀននោះទេ ។ ដូច្នេះខ្ញុំសូមសំណុំពរទៅឯកឧត្តមអគ្គនាយក សុំពិនិត្យឡើងវិញ បើសាលាបង្រៀនណាបានទទួលអាជ្ញារបណ្ណពីក្រសួងហើយ ប៉ុន្តែគ្មានរថយន្ត គ្មានកម្មវិធីដើម្បីបណ្ដុះបណ្ដាលអ្នកបើកបរយានយន្តធុនធ្ងន់នេះទេ សូមដកអាជ្ញារបណ្ណមកវិញ»។
កន្លងមកក្រសួងសាធារណការ ធ្លាប់បានសហការជាមួយក្រសួងមហាផ្ទៃ ដើម្បីត្រួតពិនិត្យលើអ្នកបើកបររថយន្តធុនធ្ងន់ជាច្រើន ដោយក្នុងនោះរកឃើញថា អ្នកបើកបររថយន្តអត់មានបណ្ណបើកបរតាមប្រភេទរថយន្ត ដែលពួកគេកំពុងបើកបរនោះ មានចំនួន២៤ភាគរយ និងអ្នកប្រើប្រាស់បណ្ណបើកបរក្លែងក្លាយ១០ភាគរយ និងអ្នកគ្មានបណ្ណបើកបរ។ កាលពីឆ្នាំ២០១៧កន្លងមក គ្រោះថ្នាក់ចរាចរណ៍ដែលបង្កឲ្យមានមនុស្សស្លាប់ជាង២០០នាក់ ដែលភាគច្រើនបង្កដោយរថយន្តធំៗ ។ នេះបើតាមលោក ស៊ុន ចាន់ថុល៕
Tag:
ស៊ុន ចាន់ថុល
រថយន្ត
សាធារណការ
© រក្សាសិទ្ធិដោយ thmeythmey.com