ជាតិ
ឧត្តមក្រុមប្រឹក្សាផ្ដល់យោបល់៖ បញ្ហាឆ្នេរសមុទ្រ ព្រៃឈើ និងដីធ្លីកើតឡើង ដោយសារអាជ្ញាធរឃុបឃិតជាមួយឈ្មួញទុច្ចរិត
រូបហ្វេសប៊ុកប្រធានគណបក្សខ្មែរក្រោក
×![]()
ដោយ: ធឿន បញ្ញាឬទិ្ធ
ភ្នំពេញ៖ ឧត្តមក្រុមប្រឹក្សាពិគ្រោះ និងផ្ដល់យោបល់ បានលើកយកបញ្ហាឆ្នេរសមុទ្រ ព្រៃឈើ និងដីធ្លី រួមទាំងរឿងរ៉ាវផ្សេងទៀត ដាក់ក្នុងកិច្ចប្រជុំលើកទី២ នៃឧត្តមក្រុមប្រឹក្សានេះ ដែលមានលោក នួន សុខាវី ជាប្រធាន។ បញ្ហាទាំងនោះ នឹងត្រូវប្រមូលយកទៅដាក់ជូននាយករដ្ឋមន្ត្រី ហ៊ុន សែន ពិនិត្យ និងដោះស្រាយ នៅរយៈពេល៤ខែខាងមុខទៀត។
ប្រតិភូពីគណបក្ស១៦ នៃឧត្តមក្រុមប្រឹក្សាពិគ្រោះ និងផ្ដល់យោបល់ បានលើកយកព័ត៌មានផ្សេងៗគ្នាពីការសិក្សាលើបញ្ហាសង្គម និងពលរដ្ឋនៅតាមមូលដ្ឋាន ជាពិសេសអាជ្ញាធរពាក់ព័ន្ធដាក់ទៅក្នុងកិច្ចប្រជុំពិភាក្សាគ្នា ដោយក្នុងនោះ មានបញ្ហាដីធ្លី បញ្ហាឆ្នេរសមុទ្រ បញ្ហាជលផលមច្ឆាជាតិក្នុងដងទន្លេមេគង្គ បទល្មើសនេសាទ បទល្មើសព្រៃឈើ បញ្ហាកសិកម្ម និងទីផ្សារកសិផល បញ្ហាដីសម្បទានសេដ្ឋកិច្ច និងបញ្ហាជនអន្តោប្រវេសន៍វៀតណាមនៅបឹងទន្លេសាប។
បញ្ហាទាំងនេះ ត្រូវបានឧត្តមក្រុមប្រឹក្សាពិគ្រោះ និងផ្ដល់យោបល់ សង្គត់ធ្ងន់ទៅលើភាពអសកម្មរបស់អាជ្ញាធរដែនដី និងអាជ្ញាធរជំនាញបច្ចេកទេស ដែលខ្វះឆន្ទៈដោះស្រាយ និងអនុវត្តច្បាប់ឲ្យមានប្រសិទ្ធភាព ពោលគឺទាល់តែមានបទបញ្ជាពីនាយករដ្ឋមន្ត្រី ទើបបំពេញការងារមួយរយៈពេលខ្លី ហើយក៏អសកម្មភាពទៅវិញដដែល។ ក្រៅពីភាពអសកម្មនេះ ក្រុមប្រឹក្សាពិគ្រោះ និងផ្ដល់យោបល់ សិក្សាឃើញពីភាពមិនស្អាតស្អំរបស់អាជ្ញាធរមួយចំនួន ដែលបានឃុបឃិតជាមួយឈ្មួញទុច្ចរិត ជាពិសេសការចេញបណ្ណកម្មសិទ្ធិឲ្យទៅបុគ្គលមានលុយ និងអំណាចរំលោភយកដី ជាកម្មសិទ្ធិរបស់រដ្ឋ ដូចជាឆ្នេរសមុទ្រ ទៅធ្វើជាសម្បត្តិឯកជនជាដើម។
មិនទាន់អស់ឡើយ នៅមានករណីអនុវត្តគម្រោងវិនិយោគខ្លះ ដែលគ្មានការអនុញ្ញាតត្រឹមត្រូវ តាមរយៈអាជ្ញាបណ្ណដែលរដ្ឋបានផ្ដលសិទ្ធិឲ្យឡើយ។ កត្តានេះ វាបង្កជាបញ្ហាប៉ះពាល់ដល់ការរស់នៅរបស់ប្រជាពលរដ្ឋ និងកាន់កាប់ដីធ្លីជាយូរមកហើយ រហូតរំលោភបំពានលើសម្បត្តិសាធារណៈ ដូចជាបឹងធម្មជាតិផងដែរ។ នេះជាការបញ្ជាក់របស់ឧត្តមក្រុមប្រឹក្សាពិគ្រោះ និងផ្ដល់យោបល់។
បញ្ហាអន្លើនេះ មិនទាន់និយាយដល់រឿងកសិកម្ម ដែលគួរតែពិចារណាលើកំណែទម្រង់គោលនយោបាយកសិកម្មផង។ ត្រង់ចំណុចនេះឧត្តមក្រុមប្រឹក្សាពិគ្រោះ និងផ្ដល់យោបល់ ត្រៀមលើកសំណើមួយចំនួន ឲ្យរដ្ឋាភិបាលរៀបចំវិធានការសំដៅលើកស្ទួយផលិតកម្មកសិកម្ម ដើម្បីផ្គត់ផ្គង់ទីផ្សារកសិផលធម្មជាតិ ក្នុងស្រុក ដូចជាបន្លែ ផ្លែឈើជាដើម។
ឧត្តមក្រុមប្រឹក្សាពិគ្រោះយោបល់ ក៏ស្នើឲ្យរដ្ឋាភិបាល មានវិធានការបង្កើនសមត្ថភាពប្រកួតប្រជែង ដើម្បីលើកស្ទួយទាំងបរិមាណ និងគុណភាពនៃផលិតផលកសិកម្មក្នុងស្រុក ដែលប្រឈមជាមួយនឹងការនាំចូលពីប្រទេសជិតខាង ជាពិសេសវៀតណាម ក្រោយពីសហភាពអឺរ៉ុបផ្ដាច់ការអនុគ្រោះពន្ធ (Everything But Arms ) ដល់កម្ពុជា ខណៈវៀតណាមទទួលបានការអនុពន្ធ AFTA ពីសហភាពអឺរ៉ុប។
ចំណែកវិធានការផ្ដល់ការប្រើប្រាស់ដីសម្បទានសេដ្ឋកិច្ចផ្ទាល់ដល់ប្រជាកសិករខ្មែរ ជំនួសការវិនិយោគបរទេស និងក្រុមហ៊ុនក្នុងស្រុក ក្រោមផ្លាកដីសម្បទានសេដ្ឋកិច្ច ដែលការពិតពុំមានការអភិវឌ្ឍជាដុំកំភួន ហើយបែរជាប៉ះពាល់ដល់ប្រជាកសិករច្រើនោះ ក៏ជារឿងសំខាន់ដែលរដ្ឋាភិបាល គួរតែពិចារណាផងដែរ។ នេះជាការលើកឡើងរបស់ប្រតិភូឧត្តមក្រុមប្រឹក្សាពិគ្រោះយោបល់ ដែលរំពឹងទទួលបានប្រសិទ្ធភាព និងសក្តិសិទ្ធភាពក្រោយការផ្ដល់យោបល់ជូននាយករដ្ឋមន្ត្រី។
អត្ថបទទាក់ទង
បញ្ហាក្នុងកិច្ចប្រជុំឧត្តមក្រុមប្រឹក្សាពិគ្រោះ និងផ្ដល់យោបល់លើកទី២នេះ នឹងត្រូវលើកយកទៅដាក់ជូននាយករដ្ឋមន្ត្រី ហ៊ុន សែន ពិនិត្យ និងពិចារណាសម្រេច នៅរយៈពេល៤ខែខាងមុខ ។ នាយករដ្ឋមន្ត្រី នឹងជួបប្រតិភូឧត្តមក្រុមប្រឹក្សាពិគ្រោះ និងផ្ដល់យោបល់ រៀងរាល់៦ខែម្ដង។
ជាគោលការណ៍ឧត្តមក្រុមប្រឹក្សានេះ នឹងបើកកិច្ចប្រជុំក្នុងមួយខែម្តង ពោលគឺនៅសប្តាហ៍ទី៤ នៃខែនីមួយៗ ដើម្បីបូកសរុបការងារ និងផ្តល់យោបល់ទៅរាជរដ្ឋាភិបាល ជុំវិញបញ្ហានានាដែលស្ថាប័ននេះ រកឃើញ។ ប្រធានឧត្តមក្រុមប្រឹក្សានេះ ត្រូវប្ដូរវេនគ្នាមួយខែម្ដង ក្នុងចំណោមបក្សទាំង១៦ ដែលជាសមាជិកអង្គភាពមួយនេះ៕
Tag:
ក្រុមប្រឹក្សាយោបល់
ដីធ្លី
ព្រៃឈើ
ឆ្នេរសមុទ្
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
