រដ្ឋបាលភ្នំពេញ៖ ភ្នំពេញគ្មានសំរាម ចាំបាច់ត្រូវចូលរួមពីពលរដ្ឋគ្រប់រូប

ជាតិ

រដ្ឋបាលភ្នំពេញ៖ ភ្នំពេញគ្មានសំរាម ចាំបាច់ត្រូវចូលរួមពីពលរដ្ឋគ្រប់រូប

01, Nov 2018 , 9:39 pm

រូបភាព

លោក ហួត ហៃ អភិបាលរងរាជធានីភ្នំពេញ ថ្លែងក្នុងពិធីបើកដំណើរការយុទ្ធនាការភ្នំពេញស្អាតឆ្នាំ២០១៨ ដែលរៀបចំឡើងនៅសាកលវិទ្យាល័យភ្នំពេញអន្តរជាតិ នាថ្ងៃទី១ វិច្ឆិកា ឆ្នាំ២០១៨

ដោយ: អ៊ូ សុខមាន (OU Sokmean)

ភ្នំពេញ៖ ការងារគ្រប់គ្រងសំរាម គឺជាភារកិច្ចមួយរបស់រដ្ឋបាលរាជធានីភ្នំពេញ និងស្ថាប័នពាក់ព័ន្ធ ដូចជាក្រសួងបរិស្ថាន និងស្ថាប័នឯកជនជាដើម ដែលជាតួអង្គសំខាន់ក្នុងការរៀបចំទីក្រុងភ្នំពេញឲ្យមានសោភ័ណភាពស្អាត អនាម័យបរិស្ថានល្អ និងគ្មានសំណល់បា្លស្ទិករាយប៉ាយជាដើម។ ក្រៅពីភាគីពាក់ព័ន្ធទាំងនេះ ចាំបាច់មានវត្តមានពលរដ្ឋគ្រប់រូប ក្នុងយុទ្ធនាការភ្នំពេញស្អាតនេះ។

«យុទ្ធនាការភ្នំពេញស្អាត ដែលចាប់ចេញពីយើងទាំងអស់គ្នានេះ ធ្វើឡើងក្នុងការថែរក្សា និងទុកដាក់សំណល់របស់ខ្លួនឲ្យបានត្រឹមត្រូវ ទើបអាចធានាបានការគ្រប់គ្រងប្រកបដោយពប្រសិទ្ធភាព និងផលប៉ះពាល់នានា»។ នេះបើយោងតាមប្រសាសន៍របស់ លោក ហួត ហៃ អភិបាលរងនៃគណៈអភិបាលរាជធានីភ្នំពេញ ដែលថ្លែងក្នុងកម្មវិធី «បើកដំណើរការយុទ្ធនាការភ្នំពេញស្អាតឆ្នាំ២០១៨» នាថ្ងៃទី១ វិច្ជិកានេះ។

តាមរយៈយុទ្ធនាការ «ភ្នំពេញស្អាត» មិនត្រឹមតែផ្សារភ្ជាប់ទៅនឹងការបង្កើនចំណេះដឹងជាសាធារណៈ ក្នុងការចូលរួមចំណែកលើកកម្ពស់បរិស្ថានស្អាតប៉ុណ្ណោះទេ តែយុទ្ធនាការនេះ បានបញ្ជ្រាបបញ្ហាប្រឈម រួមទាំងការខិតខំស្វែងរកដំណោះស្រាយរួមគ្នា អំពីការទុកដាក់សំរាមឲ្យបានត្រឹមត្រូវ ជូនដល់សិស្ស-និស្សិត នៅតាមបណ្តាគ្រឹះស្ថានរដ្ឋ និងឯកជន ក៏ដូចជាសាធាណជនគ្រប់មជ្ឈដ្ឋានផងដែរ។

ពិសេសកម្មវិធីនេះ បានបង្ហាញពីការចូលរួមចំណែកប្រជាពលរដ្ឋទាំងអស់គ្នា ក្នុងការលើកកម្ពស់ថែរក្សាបរិស្ថានភពផែនដី គុណភាពបរិស្ថានធម្មជាតិ កាត់បន្ថយសារធាតុពុល និងការបំភាយឧស័ន្មកាបូនឲ្យបានតិចបំផុត សំដៅរួមចំណែកទប់ស្កាត់ការប្រែប្រួលអាកាសធាតុ និងលើកកម្ពស់សោភ័ណភាពទីក្រុងឲ្យមានភាពប្រសើរឡើង។

ដើម្បីឲ្យយុទ្ធការ «ភ្នំពេញស្អាតឆ្នាំ២០១៨» ដំណើរការទៅដោយរលូន និងទទួលបានជោគជ័យតាមការគ្រោងទុក លោក ហួត ហៃ បានស្នើឲ្យអាជ្ញាធរមូលដ្ឋាន មន្ទីរ-អង្គភាពជំនាញប្រធានកម្មករផ្សារ ពលរដ្ឋទាំងឡាយ ត្រូវរួមគ្នាយ៉ាងសកម្ម និងផ្តល់កិច្ចសហការឲ្យបានជិតសិទ្ធជាមួយក្រុមការងារយុវជនសុឆន្ទៈ និងសហស្ថាបនិកនៃគម្រោងនេះ ដើម្បីធានានិរន្តភាពទីក្រុងភ្នំពេញស្អាត។

សូមបញ្ជាក់ថា បច្ចុប្បន្នបរិមាណសំណល់រឹង ដែលបានចាក់នៅទីលានចាក់សំរាម មាន២,៧០០តោន ក្នុងមួយថ្ងៃ៕