កីឡាអន្តរជាតិ
អន្តរជាតិ
Sterling ឡើងប្រាក់ឈ្នួលជិត៤០ម៉ឺនដុល្លារក្នុង១សប្តាហ៍ ក្រោយបន្តកិច្ចសន្យាថ្មី រូបភាព AFP
× ខ្សែប្រយុទ្ធ Raheem Sterling ក្លាយជាកីឡាករអង់គ្លេសមានប្រាក់ឈ្នួលថ្ងៃជាងគេ ក្រោយយល់ព្រមបន្តកិច្ចសន្យាថ្មីរយៈពេល៥ឆ្នាំទៀតឲ្យក្រុម Manchester City ដោយទទួលបានថ្លៃនឿយហត់ ៣០០០០០ផោន (៣៨៩០០០ដុល្លារអាមេរិក) ក្នុងមួយសប្តាហ៍ ។
ខ្សែប្រយុទ្ធឆ្នើមរបស់ក្រុមជម្រើសជាតិអង់គ្លេសរូបនេះ បានក្លាយជាកីឡាករដ៏គួរឲ្យចាប់អារម្មណ៍ និងមានការវិវត្តន៍ខ្លួនល្អបំផុតនៅអង់គ្លេស ចាប់តាំងពីរូបគេបានផ្លាស់ទៅចូលរួមជាមួយ Man City ពីក្លិបចាស់ Liverpool កាលពីឆ្នាំ ២០១៥ ក្នុងតម្លៃផ្ទេរ ៧៨លានដុល្លារអាមេរិក។
Sterling វ័យ២៣ឆ្នាំ ដែលនឹងត្រូវផុតកិច្ចសន្យានៅទឹកដី Etihad ក្នុងឆ្នាំ២០២០ ទទួលបានប្រាក់បៀវត្សទ្វេដងរហូតដល់ជិត ៤០០០០០ដុល្លារអាមេរិក ក្នុងមួយសប្តាហ៍ បន្ទាប់ពីរូបគេយល់ព្រមចុះហត្ថលេខាលើកិច្ចសន្យាចាស់៥ឆ្នាំទៀត។ ថ្លៃពលកម្មដ៏ច្រើនសន្ធឹកនេះ នាំឲ្យរូបគេក្លាយជាកីឡាករបាល់ទាត់អង់គ្លេសដែលមានប្រាក់ឈ្នួលខ្ពស់បំផុត។
កីឡាករសញ្ជាតិអង់គ្លេសដើមកំណើតហ្សាម៉ាអ៊ីករូបនេះ បានដើរតួយ៉ាងសំខាន់ក្នុងការនាំក្រុមមេឃខៀវឈ្នះជើងឯក Premier League រដូវកាលមុន ហើយរដូវកាលនេះរូបកំពុងបន្តបង្ហាញខ្លួនយ៉ាងល្អដោយស៊ុតបញ្ចូលទីចំនួន៤ គ្រាប់ក្នុងការប្រកួត៨លើកក្នុងលីគ។
ជុំវិញការផ្តល់កិច្ចសន្យានិងប្រាក់ឈ្នួលដ៏ច្រើនដល់ Sterling នេះ អ្នកចាត់ការទូទៅលោក Pep Guardiola បានលើកឡើងថា លោកគ្មានអ្វីស្ទាក់ស្ទើរនោះទេដែលក្លិប Man City ព្យាយាមរក្សាទុកកីឡាកររូបនេះឲ្យស្នាក់នៅបន្ត ហើយនេះជាជោគជ័យរបស់លោកផងដែរ៕
Tag:
បាល់ទាត់
Manchester City
Raheem Sterling
© រក្សាសិទ្ធិដោយ thmeythmey.com