ជាតិ
សង្គមជាតិ
អាជ្ញាធរខេត្តព្រះសីហនុ ប្រាប់ឲ្យពលរដ្ឋអត់ធ្មត់នឹងការប្រើប្រាស់ទឹកប្រចាំថ្ងៃ ដល់ពាក់កណ្តាលខែធ្នូ រូបពីហ្វេសប៊ុករដ្ឋបាលខេត្តព្រះសីហនុ
× ភ្នំពេញ៖ អាជ្ញាធរខេត្តព្រះសីហនុ ប្រាប់ឲ្យពលរដ្ឋអត់ធ្មត់នឹងការប្រើប្រាស់ទឹកប្រចាំថ្ងៃ ដល់ពាក់កណ្តាលខែធ្នូ ក្រោយពីគម្រោងអាងស្តុកទឹកក្បាលឆាយ បានសាងសង់រួចរាល់។ ការអំពាវនាវរបស់អាជ្ញាធរនេះ ធ្វើឡើងបន្ទាប់ពីពលរដ្ឋជាច្រើនគ្រួសារ រអ៊ូពីការខ្វះខាតទឹកប្រើប្រាស់។
មូលហេតុនៃការខ្វះទឹកនេះ គឺបណ្តាលមកពីរដ្ឋាករទឹក ជួសជុល និងប្តូរកន្លែងថ្មី សម្រាប់ការផ្គត់ផ្គង់ទឹកឲ្យប្រជាជនប្រើប្រាស់។ លោក ឱ សារឿន អភិបាលរងខេត្តព្រះសីហនុ បានប្រាប់សារព័ត៌ថ្មីៗថា ពលរដ្ឋត្រូវប្រឈមនឹងការខ្វះខាតទឹកប្រើប្រាស់មួយរយៈពេលខ្លីសិន រហូតដល់ពាក់កណ្ដាលខែធ្នូ ទើបមានទឹកប្រើប្រាស់គ្រប់គ្រាន់ជាធម្មតាវិញ។
លោក ឱ សារឿន បាននិយាយដូច្នេះថា « ការខ្វះខាតទឹកនេះ គឺមិនមែនខ្វះប្រើទាំងស្រុងនោះទេ។ ដោយអ្នកជំនាញខាងរដ្ឋាករទឹក បានបិទប្រព័ន្ធទឹក តែកន្លែងដែលគេត្រូវធ្វើ ឬជួសជុល។ យើងអាចនិយាយបានថា យើងបិទប្រព័ន្ធទឹកក្នុងតំបន់ណាមួយ ដើម្បីតទុយោបណ្តាញថ្មី ក្នុងការតភ្ជាប់ពីអាងទឹកក្បាលឆាយ ដែលកំពុងសាងសង់នោះ ឯតំបន់ខ្លះក៏នូវមានទឹកប្រើប្រាស់ដែរ »។
ចំពោះប្រជាពលរដ្ឋណាដែលខ្វះទឹកប្រើប្រាស់ អាចផ្តល់ដំណឹងនេះទៅអាជ្ញាធរមូលដ្ឋាន។ អាជ្ញាធរ នឹងដោះស្រាយបញ្ហានេះ ដោយបានត្រៀមរថយន្តដឹកទឹកស្អាត ជូនប្រជាពលរដ្ឋដល់កន្លែង។នេះបើតាមអភិបាលរងខេត្តរូបនេះ។
គម្រោងអាងស្តុបទឹកថ្មី«ក្បាលឆាយ» ដែលកំពុងសាងសង់នេះ មានលទ្ធភាពស្តុបទឹកបាន ៦ម៉ឺនគូប ក្នុងមួយថ្ងៃ។ អាងទឹកនេះ អាចឆ្លើយតប បានគ្រប់គ្រាន់ទៅតាមតម្រូវការប្រើប្រាស់របស់ប្រជាពលរដ្ឋ ដែលមានចន្លោះប្រើប្រាស់ទឹកប្រចាំថ្ងៃពី ៤ម៉ឺន ទៅ៦ម៉ឺនគូប។ អាងទឹកនេះ គ្រោងអាចប្រើប្រាស់បាននៅពាក់កណ្តាលខែធ្នូ ឆ្នាំ២០១៨។ នេះបើតាមលោក ឱ សារឿន៕
Tag:
(ទឹក
អាជ្ញាធរ
ក្បាលឆាយ
ព្រះសីហនុ
© រក្សាសិទ្ធិដោយ thmeythmey.com