ជាតិ
សេដ្ឋកិច្ច
លោក ឈាង វណ្ណារិទ្ធិ៖ កម្ពុជាគួរតែពង្រឹងឧស្សាហកម្មកម្មន្តសាល ដើម្បីប្រកួតប្រជែង និងទាញប្រយោជន៍ពីវៀតណាម
×![]()
ភ្នំពេញ៖ កម្ពុជា គួរតែពង្រឹងវិស័យឧស្សាហកម្មកម្មន្តសាល (រោងចក្រផលិត ឬរោងចក្រកែច្នៃ) ដើម្បីប្រកួតប្រជែង និងទាញប្រយោជន៍ពីវៀតណាម។ នោះក៏ព្រោះតែវៀតណាម និងសហភាពអឺរ៉ុប បានយល់ព្រមជាមួយគ្នា ក្នុងការបង្កើតកិច្ចព្រមព្រៀងស្តីពី«ពាណិជ្ជកម្ម និងវិនិយោគរវាងភាគីទាំងពីរ» ដែលកិច្ចព្រមព្រៀងនេះ សំដៅទៅលើការឈប់យកពន្ធលើទំនិញនាំចូលទីផ្សារវៀតណាម និងអឺរ៉ុប។
ខណៈដែលកម្ពុជា កំពុងប្រឈមមុខនឹងនីតិវិធីរបស់សហភាពអឺរ៉ុបពីដំណើរការដក ឬមិនដកប្រព័ន្ធអនុគ្រោះពន្ធនោះ ស្រាប់តែវៀតណាមទទួលបានកិច្ចព្រមព្រៀងសេដ្ឋកិច្ចពិសេសពីសហភាពអឺរ៉ុប ដែលអំណោយផលសម្រាប់វៀតណាមទៅវិញ។ បើវៀតណាម និងសហភាពអឺរ៉ុប ឈានទៅដល់ការអនុវត្តកិច្ចព្រមព្រៀងនេះមែននោះ វានឹងជះទាំងផលវិជ្ជមាន និងអវិជ្ជមានដល់កម្ពុជា។ នេះបើតាមអ្នកជំនាញនៃវិទ្យាស្ថានកម្ពុជា សម្រាប់ការសិក្សាយុទ្ធសាស្ត្រ។
លោក ឈាង វណ្ណារិទ្ធិ បាននិយាយថា ផលអវិជ្ជមានសម្រាប់កម្ពុជានោះ គឺការប្រកួតប្រជែងជាមួយវៀតណាមលើផ្នែកកម្មន្តសាល ដែលវៀតណាមអាចទាញយកការវិនិយោគបានច្រើនជាងកម្ពុជា។ ចំណែកផលវិជ្ជមានវិញនោះ គឺកម្ពុជាអាចទាញយកផលប្រយោជន៍ពីវៀតណាម តាមរយៈការបង្កើតការប្រកួតប្រជែងណា ដែលតភ្ជាប់ខ្សែចង្វាក់ផលិតកម្ម ដែលវាជាតម្រូវការនៃចង្វាក់ផលិតកម្មរបស់វៀតណាម។ សម្រាប់លោក ឈាង វណ្ណារិទ្ធិ កម្ពុជា គួរតែពង្រឹងឧស្សាហកម្មកម្មន្តសាល ដើម្បីប្រកួតប្រជែង និងទាញប្រយោជន៍ពីវៀតណាម។
សូមស្ដាប់សំឡេងលោក ឈាង វណ្ណារិទ្ធិ៖
ថ្លែងប្រាប់សារព័ត៌មានថ្មីៗ សហស្ថាបនិកនៃវិទ្យាស្ថានកម្ពុជា សម្រាប់ការសិក្សាយុទ្ធសាស្ត្ររូបនេះ បាននិយាយដូច្នេះថា៖«ការប្រកួតប្រជែងប្រទេសវៀតណាម មានអទិភាពជាងច្រើនបើប្រៀបធៀបជាមួយប្រទេសកម្ពុជា លើវិស័យឧស្សាហកម្មកម្មន្តសាល (Manufacturing Industry) ។ ហើយវិស័យកម្មន្តសាលនេះ វៀតណាមអាចទាញចូលប្រទេសវៀតណាមច្រើន ហើយវិស័យសេវាកម្មក៏វាដើរទៅតាមវិស័យកម្មន្តសាលនេះដែរ។ អ៊ីចឹងទេ ការប្រកួតប្រជែងរវាងកម្ពុជា និងវៀតណាម អាចកាន់តែខ្លាំង ប៉ុន្តែផលវិជ្ជមានត្រង់ថា វៀតណាម និងកម្ពុជា ជាសមាជិកអាស៊ាន ដូច្នេះចង់មិនចង់វាអាចជាខ្សែចង្វាក់ផលិតតែមួយក្នុងតំបន់ ហើយរោងចក្រមួយចំនួនអាចផលិតនៅកម្ពុជា ហើយបញ្ជូនផលិតផលមួយចំនួនទៅប្រទេសវៀតណាម ដើម្បីតម្លើង ឬក៏ផលិតនូវផលិតផលសម្រេច ឬពាក់កណ្ដាលសម្រេចណាមួយទៅវៀតណាម ។ ដូចនេះកម្ពុជាយើងអាចផលិតនូវផលិតផលណាមួយនោះ ដែលអាចជួយទៅដល់ផលិតកម្មនៅវៀតណាមបានដែរ បើសិនយើងអាចតភ្ជាប់នូវសង្វាក់ផលិតកម្មប្រទេសទាំងពីរនេះបាន»។
ទាក់ទងឧស្សាហកម្មកម្មន្តសាលនេះ រដ្ឋាភិបាល កំពុងយកចិត្តទុកដាក់គិតគូពីបញ្ហានេះហើយ។ លោក ផៃ ស៊ីផាន អ្នកនាំពាក្យរដ្ឋាភិបាល បាននិយាយថា រដ្ឋាភិបាលកំពុងពង្រឹងគុណភាព និងសមត្ថភាពវិជ្ជាជីវៈជាមុនសិន ដើម្បីទាញយកការវិនិយោគឧស្សាហកម្មកម្មន្តសាល ក្នុងទិសដៅធ្វើពិពិធកម្មពាណិជ្ជកម្មក្នុងប្រទេស។ បើតាមលោក ផៃ ស៊ីផាន ការរៀបចំកិច្ចការងារក្នុងការសម្រេចបាននូវវិស័យឧស្សាហកម្មកម្មន្តសាលនេះ រដ្ឋាភិបាលត្រូវប្រើប្រាស់ពេលវេលាអនុវត្តជាដំណាក់កាលសិន។
សូមស្ដាប់សំឡេងលោក ផៃ ស៊ីផាន៖
«ដោយសារតែយើងចូលមកដល់បរិបទកម្មន្តសាលកាត់ដេរ និងដេរស្បែកជើង។ ដូច្នេះមិនមែនយើងព្រងើយកន្តើយ មិនយកចិត្តទុកដាក់លើវិស័យកម្មន្តសាលនេះទេ។ ចង់ជម្រាបជូនព័ត៌មានថា រាជរដ្ឋាភិបាលចង់កែប្រែធ្វើឲ្យទិដ្ឋភាពកម្មករយើង ប្រើកម្លាំងបាយទៅជាប្រើវិជ្ជាជីវៈទៅវិញ ដែលឈរនៅលើផលិតភាព ដែលមានឯកទេស បច្ចេកទេសគ្រប់គ្រាន់ ជំនាញគ្រប់គ្រាន់នៅក្នុងកិច្ចបំពេញការងារនៅក្នុងវិស័យកម្មន្តសាលនេះ។ ចំណុចទី២ យើងកំពុងរៀបចំឧស្សាហកម្មធុនស្រាលដូចជាតម្បាញ ស្បែកសត្វ ដែលពាក់ព័ន្ធការងាររបស់យើង ដូច្នេះយើងនូវមានដំណើរតទៅមុខទៀត។ ក៏ប៉ុន្តែយើងធ្វើបណ្ដើរ យើងធ្វើកំណែទម្រង់បណ្ដើរ គឺឈរនៅលើទិសដៅផលិតភាព ហើយបន្តមកទៀតទើបយើងរៀបចំឧស្សាហកម្មធុនស្រាល ដើម្បីចូលរួមសកម្មភាពកង្វះនៃឧស្សាហកម្មកម្មន្តសាលនេះ»។ នេះបើតាមលោក ផៃ ស៊ីផាន។
បច្ចុប្បន្នមានភាគីខាងចិន កូរ៉េ ជប៉ុន និងសហភាពអឺរ៉ុប បានមកជួយបណ្ដុះបណ្ដាលធនធានមនុស្សនៅកម្ពុជា តាមរយៈការបើកមជ្ឈមណ្ឌលបណ្ដុះបណ្ដាលវិជ្ជាជីវៈ លើជំនាញផ្សេង ឲ្យស្របតាមទិសដៅឧស្សាហកម្មទី៤។ ចំណែកក្រសួងអប់រំ យុវជន និងកីឡាកម្ពុជា ក៏មានកញ្ចប់ថវិកា ក្នុងការទ្រទ្រង់មជ្ឈមណ្ឌលបណ្ដុះបណ្ដាលវិជ្ជាជីវៈ សម្រាប់ពលរដ្ឋផងដែរ។ នេះជាការបញ្ជាក់របស់លោក ផៃ ស៊ីផាន ដែលបានបន្ថែមថា នៅពេលដែលកម្ពុជា ធនធានមនុស្ស សំបូរទៅដោយកម្មករជំនាញនាពេលខាងមុខនេះ កម្ពុជា ប្រាកដជាអាចទាញបានការវិនិយោគច្រើន លើវិស័យឧស្សាហកម្មកម្មន្តសាលនេះ៕
Tag:
ឈាង វណ្ណារិទ្ធិ
កម្មន្តសាល
វៀតណាម
© រក្សាសិទ្ធិដោយ thmeythmey.com
