ពីនេះ ពីនោះ
រដូវមច្ឆាជានិម្មិត្តរូបនៃព្រះរាជាណាចក្រកម្ពុជា ធ្វើចរាចរផ្លាស់ទីបានមកដល់ហើយ ត្រីគល់រាំង ចាប់បានក្នុងឆ្នាំ ២០០២ ក្នុងទន្លេសាប មានប្រវែងដងខ្លួន ១៧២ ស.ម ទម្ងន់ ១០២គីឡូក្រាម។ រូបភាពឯកសាររបស់លោកបណ្ឌិត ហ្សេប ហូហ្គេន / គម្រោងអច្ឆរិយភាពនៃទន្លេមេគង្គ។
× ត្រីគល់រាំង គឺជាប្រភេទត្រីទឹកសាបមានស្រកា និងខ្លួនធំជាងគេក្នុងចំណោមត្រីមានស្រកាដទៃទៀត ដែលរស់នៅក្នុងប្រព័ន្ធបឹងទន្លេសាប និងទន្លេមេគង្គ។ វាមានឈ្មោះវិទ្យាសាស្ត្រ (Catlocarpio siamensis) និងឈ្មោះជាភាសាអង់គ្លេស Giant barb ។ ត្រីប្រភេទនេះអាចមានប្រវែងដងខ្លួនអតិបរមាដល់ទៅ៣០០សមនិងមានទម្ងន់៣០០គីឡូក្រាម។
វារស់នៅតាមដងទន្លេធំៗ ស្ទឹង បឹង និងតំបន់ទំនាបលិចទឹក ទីដែលវាអាចរកចំណីបានដូចជាស្លែ ផ្លុងតុង ផ្លែរុក្ខជាតិ ដែលដុះលូតលាស់មានផ្លែផ្កា នារដូវទឹកជំនន់ និងព្រមទាំងត្រីតូចៗផងដែរ។ ត្រីគល់រាំងជំទង់ភាគច្រើន វាអាចសម្របខ្លួនរស់នៅក្នុងស្រះ ត្រពាំង ស្ទឹង បឹង និងទំនាបលិចទឹក ខណៈត្រីគល់រាំងពេញវ័យ ហាក់ដូចចូលចិត្តធ្វើចរាចរចូលទៅរស់នៅក្នុងតំបន់អាងទឹកជ្រៅក្នុងទន្លេមេគង្គ។ នៅក្នុងប្រទេសកម្ពុជា ត្រីគល់រាំងពេញវ័យ បានធើ្វចរាចរផ្លាស់ទីចេញពីបឹងទន្លេសាប ចូលទៅរស់នៅក្នុងអាងទឹកជ្រៅ ក្នុងទន្លេមេគង្គ នាចុងរដូវប្រាំង នៅចុងខែកញ្ញា ឬដើមខែតុលា ជាមួយប្រភេទត្រីធំៗផ្សេងទៀត ដូចជាត្រីរាជជាដើម។ បន្ទាប់មក ពពួកត្រីប្រភេទតូច មធ្យម និងធំ ជាច្រើនប្រភេទទៀត ក៏បានចាប់ផ្តើមធ្វើចរាចរផ្លាស់ទីចេញពីបឹងទន្លេសាបតាមដែរ ពិសេស ពពួកត្រីរៀល។ ត្រីគល់រាំងត្រូវបានគេកត់ត្រាចូលក្នុងបញ្ជីក្រហម IUCN Red List (Critically Endangered) ក្នុងឆ្នាំ២០១១ ជាប្រភេទត្រីរងគ្រោះជិតផុតពូជ។
មានកត្តាប្រឈមជាច្រើនទៀត ដែលត្រីគល់រាំងកំពុងជួបប្រទះនាពេលប្ចុប្បន្ននេះ ដូចជា ការនេសាទហួសកម្រិត ការនេសាទក្នុងរដូវត្រីពង-កូន ការនេសាទចាប់យកកូនត្រីសម្រាប់ធ្វើជាត្រីនុយ ការប្រើប្រាស់ឧបករណ៍នេសាទល្មើសច្បាប់ ពិសេសឧបករណ៍ឆក់ ក្តៅ-ត្រជាក់ ការបាត់បង់ព្រៃលិចទឹកជាទីជម្រក និងការអភិវឌ្ឍន៍ទំនប់វារិអគ្គិសនីនៅដងទន្លេមេក្នុងទន្លេមេគង្គ ដែលជាផលរំខានដល់ការធ្វើចរាចរផ្លាស់ទីរបស់ពួកវា។ ត្រីគល់រាំង ត្រូវបានប្រកាសកំណត់ជាមច្ឆានិម្មិត្តរូបនៃព្រះរាជាណាចក្រកម្ពុជា តាមព្រះរាជក្រឹត្យលេខ នសរកត/០៣០៥/១៤៩ ចុះថ្ងៃទី២១ខែមីនាឆ្នាំ២០០៥។
«ដាយត្រី» នៅតាមបណ្តោយទន្លេសាទ ។ រូបភាព៖ ឈុត ឈាណា / គម្រោងអច្ឆរិយភាពនៃទន្លេមេគង្គ។
ដោយមើលឃើញចំនួនត្រីគល់រាំងពីមួយឆ្នាំទៅមួយឆ្នាំ ចេះតែថយចុះជាលំដាប់ រដ្ឋបាលជលផល និងវិទ្យាស្ថានស្រាវជ្រាវជលផលទឹកសាប សហការជាមួយគម្រោងអច្ឆរិយភាពនៃទន្លេមេគង្គ (Wonders of the Mekong) ក្រោមជំនួយពី USAID សូមធ្វើការអំពាវនាវដល់ប្រជានេសាទទាំងអស់ នៅតាមដងទន្លេសាប ជាពិសេសម្ចាស់ «ដាយត្រី» ទាំង១៤គន្លង មេត្តាជួយផ្តល់ព័ត៌មាន ក្នុងករណីចាប់បាន ឬឃើញប្រជានេសាទណាចាប់បាន ដើម្បីក្រុមការងាររបស់យើង ចុះទៅបំពាក់ស្លាកសញ្ញាសម្គាល់ រួចលែងវាចូលទៅក្នុងទន្លេវិញ តាមរយៈទូរសព្ទទំនាក់ទំនង៖ ម៉ូប៊ីតែល (012 805 347) ស្មាត (016 695 933) មិត្តហ្វូន (090 850 850)។
© រក្សាសិទ្ធិដោយ thmeythmey.com