ជាតិ
សង្គមជាតិ
លោកស្រី Kain Hulshof ៖ អំពើហិង្សាលើកុមារអាចធ្វើតំបន់មួយខាតបង់ថវិកា ២០៩ ពាន់លានដុល្លារក្នុងមួយឆ្នាំ
×![]()
ដោយ: ថ្មីៗ
ភ្នំពេញ៖ រាជរដ្ឋាភិបាលបានប្ដេជ្ញាចិត្ត ទប់ស្កាត់និងលុបំបាត់អំពើហិង្សាលើកុមារត្រឹម ឆ្នាំ២០៣០ ក្នុងគោលដៅអភិវឌ្ឍន៍ប្រកបដោយចីរភាព។ ក្នុងមួយឆ្នាំមានកុមារប្រមាណ១ពាន់លាន់នាក់ ទទួលរងអំពើហិង្សាអន្តរបុគ្គល ក្នុងទម្រងមួយចំនួននៅទូទាំងពិភពលោក។ ក្នុងតំបន់អាស៊ីមានកុមាប្រមាណ៥០ភាគរយទទួលរងអំពើហិង្សាកាលពីឆ្នាំ២០១៧។ បើតាមនាយិកាអង្គការយូនីសេហ្វ អំពើហិង្សាលើកុមារអាចធ្វើឲ្យតំបន់មួយខាតបង់ថវិកា ២០៩ ពាន់លានដុល្លារក្នុងមួយឆ្នាំ។
រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា លោក វង់ សូត បានលើកឡើងថា កម្ពុជានៅមានបញ្ហាប្រឈមច្រើនក្នុងការដោះស្រាយលើបញ្ហាសិទ្ធិកុមារ ដោយត្រូវពង្រឹងយន្តការអនុវត្តប្រព័ន្ធកិច្ចការពារកុមារ ធនធានមនុស្ស និងហិរញ្ញវត្តុ។
ដើម្បីដោះស្រាយបញ្ហានេះ រដ្ឋាភិបាល ទាមទារឲ្យមានការចូលរួមពីគ្រប់ភាគីពាក់ព័ន្ធទាំងអស់ រួមមានគ្រប់ស្ថាប័នរដ្ឋ អង្កការជាតិ អន្តរជាតិ ។ រដ្ឋមន្ត្រីក្រសួងសង្គមកិច្ចរូបនេះ បាននិយាយថាក្នុងសន្និសីទថ្នាក់តំបន់ស្តីពីការអនុវត្តយុទ្ធសាស្ត្រដើម្បីបញ្ចប់អំពើហិង្សាលើកុមារ ដូច្នេះថា៖«យើងបានរៀបចំផែនការសកម្មភាពដើម្បីទប់ស្កាត់ និងឆ្លើយតបចំពោះអំពើហិង្សា លើកុមាររយៈពេល៥ឆ្នាំ (២០១៧ ២០២១) ដែលបានអនុវត្តក្រោមការសម្របសម្រួល និងកិច្ចសហការពីបណ្ដាក្រសួង ស្ថាប័នពាក់ព័ន្ធ ចំនួន១៣ ដៃគូអភិវឌ្ឍន៍ អង្គការមិនមែនរដ្ឋាភិបាល សង្គមស៊ីវិល និងក្រុមយុវជនផងដែរ»។
ទាក់ទងនឹងបញ្ហានេះលោកស្រី Kain Hulshof នាយិកាអង្គការយូនីសេហ្វប្រចាំតំបន់អាស៊ី និងប៉ាស៊ីហ្វិក បាននិយាយថា ប្រទេសកម្ពុជា គឺជាប្រទេសដំបូងគេ ដែលបានរៀបចំការអង្កេតថ្នាក់ជាតិស្ដីពីអំពើហិង្សាលើកុមារ និងជាប្រទេសដែលបានផ្ដួចផ្ដើមរៀបចំសន្និសីទថ្នាក់តំបន់លើកទីមួយ ស្ដីពីយុទ្ធសាស្ត្រ អ៊ីនស្ពៃ (INSPIER) ។ លោស្រីនិយាយថា៖« ពិបាកនិយាយថាស្ថានភាពសិទ្ធិកុមារកម្ពុជាប្រសើជាងប្រទេសជិតខាងណាស់ យើងមិនទាន់មានទិន្នន័យច្បាស់លាស់នៅឡើយទេ។ ប៉ុន្តែអ្វីដែលយើងបានឃើញនោះគឺថា មានការប្ដេជ្ញាចិត្តយ៉ាងមុតមាំពីសំណាក់រាជរដ្ឋាភិបាល គោលបំណងបែបនេះនឹងជួយឲ្យមានសកម្មភាពផ្សេងៗ ដូចជាការហាមមិនឲ្យមានអំពើហិង្សាក្នុងសាលា នៅផ្ទះជាដើម យើងអាចនិយាយបានថាសិទ្ធិកុមារកម្ពុជាមានភាពល្អប្រសើរច្រើន»។
នាយិកាអង្គការយូនីសេហ្វប្រចាំតំបន់អាស៊ី និងប៉ាស៊ីហ្វិក បានលើកឡើងថា អំពើហិង្សាលើកុមារអាចធ្វើតំបន់មួយខាតបង់ថវិកា ២០៩ ពាន់លានដុល្លារក្នុងមួយឆ្នាំ ស្មើនឹង ២ភាគរយនៃផលិតផលសរុបក្នុងស្រុកក្នុងតំបន់នោះ។ «អំពើហិង្សាមិនមែនបង្កផលប៉ះពាល់ធ្ងន់ធ្ងរតែសម្រាប់កុមាររងគ្រោះឡើយ អំពើហិង្សាបានដាក់បន្ទុករយៈពេលវែងលើសេវាសុខាភិបាល និងសេវាសង្គម ប៉ះពាល់ដល់ការវិនិយោគ និងការអភិវឌ្ឍសង្គម និងរាំងស្ទះដល់ការអភិវឌ្ឍសេដ្ឋកិច្ចជាតិផង»។ នេះបើតាមលោកស្រី Kain Hulshof។
ក្នុងមួយឆ្នាំមានកុមារប្រមាណ១ពាន់លាន់នាក់បានទទួលរងអំពើហិង្សាអន្តរបុគ្គលក្នុងទម្រងមួយចំនួននៅទូទាំងពិភពលោក។ ក្នុងតំបន់អាស៊ីមានកុមាប្រមាណ៥០ភាគរយទទួលរងអំពើហិង្សាកាលពីឆ្នាំ២០១៧។
រាជរដ្ឋាភិបាលដាក់ឲ្យ អនុវត្តក្នុងឆ្នាំ២០១៦ យុទ្ធសាស្ត្រ INSPIRE មានដូចជា ពង្រឹងការអនុវត្តច្បាប់បទដ្ឋាន និងគុណតម្លៃ រួមជាមួយបរិយាកាសប្រកបដោយសុវត្តិភាព ដែលគាំទ្រដល់មាតាបិតា និងអ្នកផ្ដល់ការថែទាំដល់កុមារ ។ ជាពិសេសពង្រឹងប្រាក់ចំណូល និងសេដ្ឋកិច្ច ដែលឆ្លើយតបនិងគ្រាំទ្រការអប់រំ និង បំណិនជីវិត។
ក្នុងរបាយការណ៍របស់អង្គការយូនីសេហ្វចេញផ្សាយក្នុងឆ្នាំ២០១៣ បានបង្ហាញថា កុមារកម្ពុជា ១នាក់ក្នុងចំណោមពីរនាក់ បានទទួលអំពើហិង្សាលើរាងកាយ ។ ហើយកុមារ១នាក់ក្នុងចំណោម៤នាក់ បានទទួលអំពើហិង្សាលើផ្លូវចិត្ត ។ ចំណែកកុមារ១នាក់ ក្នុងចំណោម២០នាក់ បានទទួលអំពើហិង្សាផ្លូវភេទ។
កម្ពុជាជាម្ចាស់ផ្ទះនៃសន្និសីទថ្នាក់តំបន់ឆ្ពោះទៅអនុវត្តយុទ្ធសាស្ត្រ អ៊ីនស្ពៃ (INSPIER) រយៈពេលបីថ្ងៃរនៅរាជធានីភ្នំពេញ ដែលមានការចូលរួមពីសំណាក់មន្ត្រីជាន់ខ្ពស់មកពីស្ថាប័នជាច្រើន និងអ្នកជំនាញផ្នែកកិច្ចការពារមកពី២១ប្រទេស ដែលនឹងមកពិភាក្សា និងដាក់ចេញនូវសកម្មភាពអាទិភាពនានា ដើម្បីឆ្លើយតបនឹងអំពើហិង្សាលើកុមារនៅក្នុងតំបន់អាស៊ី និងប៉ាស៊ីហ្វិក៕
Tag:
ហិង្សាលើកុមារ
© រក្សាសិទ្ធិដោយ thmeythmey.com
