សៀមរាប៖ មន្ទីរពេទ្យកុមារអង្គរ បានបង្កើតនៅឆ្នាំ ១៩៩៩ ហើយមកដល់បច្ចុប្បន្នមានរយៈពេល ១៩ឆ្នាំហើយ ដែលមន្ទីរពេទ្យនេះបើកព្យាបាលកុមារកម្ពុជាដោយឥតគិតថ្លៃ ចាប់ពីទើបនឹងកើតដល់អាយុ ១៦ឆ្នាំ។ នៅចុងខែ តុលា មន្ទីរពេទ្យកុមារអង្គរបានរៀបចំសន្និសីទវេជ្ជសាស្ដ្រប្រចាំឆ្នាំរបស់ខ្លួនដោយមានការចូលរួមពីគ្រូពេទ្យមកពីមន្ទីរពេទ្យតាមបណ្តាខេត្តផ្សេងៗ។ សន្និសីទឆ្នាំទី២នេះ ក្រោមប្រធានបទ «ការសង្គ្រោះបន្ទាន់ និងជំងឺធ្ងន់» ដែលគោលបំណងនៃសន្និសីទនេះ ដើម្បីចែករំលែកបទពិសោធន៍ ចំណេះដឹង ជំនាញ និងពង្រឹងសមត្ថភាពវិជ្ជាជីវៈពាក់ព័ន្ធនឹងការរៀបចំបង្កើតផ្នែកសង្គ្រោះបន្ទាន់ និងជំងឺធ្ងន់។
ព័ត៌មានលម្អិត សូមស្ដាប់បទយកការណ៍ ដែលរៀបរៀងដោយអ្នកស្រី អ៊ីសា រ៉ហានី ពីខេត្តសៀមរាបដូចតទៅ
សន្និសីទវេជ្ជសាស្ដ្រទាក់ទងនឹងជំងឺកុមារ ត្រូវបានរៀបចំរៀងរាល់ឆ្នាំ ដោយមន្ទីរពេទ្យកុមារអង្គរ។ នេះជាឆ្នាំទី២ហើយ ដែលសន្និសីទនេះត្រូវបានធ្វើឡើង ហើយសម្រាប់ឆ្នាំនេះប្រធានបទទាក់ទងនឹងការសង្គ្រោះបន្ទាន់ និងជំងឺធ្ងន់ ដែលកន្លងមកជំងឺទាំងពីរនេះ មានស្ថានភាពពិបាកបំផុតសម្រាប់គ្រូពេទ្យ និងក្រុមគ្រួសារអ្នកជំងឺ។
នាយកមន្ទីរពេទ្យកុមារអង្គរ លោក ងួន ច័ន្ទភក្ដ្រា បានថ្លែងក្នុងសន្និសីទកាលពីចុងខែតុលាថា គោលបំណងនៃសន្និសីទលើកនេះ គឺដើម្បីចែករំលែកបទពិសោធន៍ ចំណេះដឹង ជំនាញ និងពង្រឹងសមត្ថភាពវិជ្ជាជីវៈពាក់ព័ន្ធនឹងការរៀបចំបង្កើតផ្នែកសង្គ្រោះបន្ទាន់ និងជំងឺធ្ងន់ ការកំណត់ពីរោគសញ្ញានៃជំងឺធ្ងន់ធ្ងររបស់ទារក និងកុមារ របៀបនៃការថែទាំព្យាបាលទារក និងកុមារដែលមានការតក់ស្លុត ការរងរបួស ការរលាក ការពុល និងការសង្គ្រោះសម្រាប់ជំងឺគាំងបេះដូង ដើម្បីចូលរួមកាត់បន្ថយអត្រាមរណៈភាពរបស់ទារក និងកុមារកម្ពុជា ស្របតាមផែនការយុទ្ធសាស្ដ្រជាអាទិភាពរបស់ក្រសួងសុខាភិបាល។
តាមការបញ្ជាក់របស់លោក ងួន ច័ន្ទភក្ដ្រា ប្រធានបទសន្និសីទនៅឆ្នាំនេះពិតជាមានសារសំខាន់ណាស់ ហើយខាងមន្ទីរពេទ្យកុមារអង្គរ ជារៀងរាល់ថ្ងៃទទួលព្យាបាលជំងឺធ្ងន់ធ្ងរ និងសង្គ្រោះបន្ទាន់ច្រើន។ ដូច្នេះបទពិសោធន៍ក្នុងការព្យាបាលជំងឺនេះមានច្រើនសម្រាប់គ្រូពេទ្យក្នុងមន្ទីរពេទ្យនេះ ដែលគួរតែចែករំលែក និងផ្សព្វផ្សាយទៅដល់គ្រូពេទ្យដទៃបានដឹង។
មានជំងឺច្រើនដែលចាត់ទុកថា ជាជំងឺធ្ងន់ និងសង្គ្រោះបន្ទាន់ ដូចជាទារកកើតមិនគ្រប់ខែ មិនគ្រប់គីឡូ និងជំងឺបេះដូងជាដើម ដែលតែងកើតឡើងនៅលើកុមារតូច។ តាមការបញ្ជាក់របស់នាយកមន្ទីរពេទ្យកុមារអង្គរ នៅសៀមរាបមានតែមន្ទីរពេទ្យ២ប៉ុណ្ណោះ ដែលចាត់ទុកថាមានស្ដង់ដាក្នុងការព្យាបាលជំងឺកុមារតូច និងមានប្រសិទ្ធិភាពខ្ពស់ ក្នុងនោះមានមន្ទីរពេទ្យកុមារអង្គរ និងមួយទៀតមន្ទីរពេទ្យជ័យវរ្ម័នទី៧ ឬគន្ធបុប្ផាសៀមរាប។
មន្ទីរពេទ្យកុមារអង្គរ បានបើកដំណើរការនៅឆ្នាំ ១៩៩៩ ក្នុងគោលបំណងផ្តល់ការពិនិត្យព្យាបាល និងថែទាំសុខភាពដល់កុមារកម្ពុជាប្រកបដោយគុណភាពខ្ពស់ និងឥតគិតថ្លៃ។ មន្ទីរពេទ្យនេះ បានចូលរួមពង្រឹងប្រព័ន្ធសុខាភិបាលតាមរយៈការបណ្ដុះបណ្តាលវេជ្ជបណ្ឌិត គិលានុបដ្ឋាក និងបុគ្គលិកសុខាភិបាល ព្រមទាំងផ្តល់ការអប់រំសុខភាពផ្សេងៗដល់ពលរដ្ឋខេត្តសៀមរាបផងដែរ។ ជារៀងរាល់ថ្ងៃ មានកុមារប្រមាណ ៥០០នាក់ ទៅទទួលសេវាព្យាបាលនៅមន្ទីរពេទ្យកុមារអង្គរ។ តាមការបញ្ជាក់របស់លោក ងួន ច័ន្ទភក្ដ្រា ចាប់ពីបើកដំណើរអស់រយៈពេល ១៩ឆ្នាំមក មន្ទីរពេទ្យបានផ្តល់សេវាព្យាបាលដល់កុមារកម្ពុជាប្រមាណ ២,៥លានករណី។ ជាមួយនឹងកំណើនកុមារកាន់តែច្រើនបែបនេះ ទើបផ្នែកសង្គ្រោះបន្ទាន់ និងជំងឺធ្ងន់ត្រូវបានបង្កើតឡើងនៅឆ្នាំ ២០០៤។ នៅឆ្នាំ ២០១៧កន្លងទៅ ផ្នែកនេះបានផ្តល់សេវាព្យាបាលដល់កុមារបានប្រមាណ ១៨ពាន់ករណី។
ទាក់ទងនឹងសន្និសីទវេជ្ជសាស្ដ្រលើកទី២របស់មន្ទីរពេទ្យកុមារអង្គរ ប្រធានគណៈគ្រូពេទ្យជាតិកម្ពុជា និងជារដ្ឋលេខាធិការក្រសួងសុខាភិបាល លោក ធា គ្រុយ បានកោតសរសើរចំពោះការរៀបចំនេះ។ សម្រាប់លោក ធា គ្រុយ នេះជាអ្វីដែលក្រសួងចង់បាន គឺចង់ឱ្យមន្ទីរពេទ្យទាំងអស់ម្ចាស់ការរៀបចំសន្និសីទបែបនេះដោយខ្លួនឯង ដើម្បីរួមចំណែកបណ្ដុះបណ្តាលធនធានគ្រូពេទ្យ។ លោក ធា គ្រុយ បន្ថែមថា មន្ទីរពេទ្យដែលអាចរៀបចំសន្និសីទនេះបាន គឺជាមន្ទីរពេទ្យដែលពូកែ និងមានបទពិសោធន៍ត្រឹមត្រូវលើការងារព្យាបាលអ្នកជំងឺ។
ជាមួយគ្នានេះដែរ ប្រធានគណៈគ្រូពេទ្យជាតិកម្ពុជា ចង់ឱ្យគ្រូពេទ្យទាំងអស់ពង្រឹងសមត្ថភាព និងវិជ្ជាជីវៈរបស់ខ្លួនតាមរយៈរូបភាពនានា ដូចជាចូលរួមក្នុងវគ្គបណ្ដុះបណ្តាល សន្និសីទ ។ល។ ធានាថា ពួកគេទទួលបានចំណេះដឹងថ្មីជានិច្ច។ តាមរយៈការពង្រឹងសមត្ថភាពវិជ្ជាជីវៈនេះដែរ លោក ធា គ្រុយ ពន្យល់ថា ខាងផ្នែកគណៈគ្រូពេទ្យលោកក៏នឹងពង្រឹងផ្នែកនេះដែរ គឺមុនបន្តអាជ្ញាបណ្ណដល់គ្រូពេទ្យណាមួយ គឺខាងគណៈគ្រូពេទ្យនឹងរៀបចំវាស់សមត្ថភាពទៅនឹងកម្រិតពិន្ទុណាមួយជាមុនសិន។ យ៉ាងណា នេះជាគម្រោងដែលលោក ធា គ្រុយ លើកឡើងថា អាចនឹងចាប់ផ្តើមធ្វើនៅឆ្នាំក្រោយ ឬពីរឆ្នាំខាងមុខទៀត។
ទាក់ទងនឹងការសង្គ្រោះបន្ទាន់ និងជំងឺធ្ងន់នេះដែរ លោក ធា គ្រុយ មើលឃើញថា លទ្ធភាពនៃការជួយសង្គ្រោះរបស់គ្រូពេទ្យខ្មែរបច្ចុប្បន្នកាន់តែល្អប្រសើរ បូករួមនិងសម្ភារកាន់តែទំនើប ដែលការណ៍នេះបានរួមចំណែកជាមួយក្រសួងសុខាភិបាល ក្នុងការកាត់បន្ថយអត្រាមរណភាពទារក និងកុមារ បានមួយចំណែកធំ៕