អន្តរជាតិ
ការនាំចេញផលិតផលសម្លៀកបំពាក់ពីវៀតណាមកើនខ្ពស់ ដោយសារសង្គ្រាមពាណិជ្ជកម្ម
×![]()
ខណៈសង្គ្រាមពាណិជ្ជកម្មរវាងអាមេរិក និងចិននៅតែបន្តឆាបឆេះ វៀតណាមហាក់បីជាទទួលផលចំណេញយ៉ាងច្រើនគួរសមពីការកើនឡើងភាពតានតឹងនេះ។ វិស័យដែលមានសន្ទុះខ្លាំងក្លានោះគឺ ការនាំចេញផលិតផលសម្លៀកបំពាក់ និងវាយនភណ្ឌរបស់វៀតណាម។ ប៉ុន្មានខែចុងក្រោយនេះ ប្រទេសជាច្រើនរួមមាន ចិន និងអាមេរិកផងនោះ បានបង្កើនការកម្ម៉ង់ទិញផលិតផលសម្លៀកបំពាក់ផ្ទាល់ពីរោងចក្រវៀតណាម។
ប្រធានសមាគមផលិតផលសម្លៀកបំពាក់ និងវាយនភណ្ឌវៀតណាម លោក Vu Duc Giang ដើមខែវិច្ឆិកានេះ បានលើកឡើងថា ការនាំចេញផលិតផលសម្លៀកបំពាក់របស់វៀតណាមនឹងកើនឡើងដល់១៤,៨% ក្នុងឆ្នាំនេះ ដែលស្មើនឹងទឹកប្រាក់៣៥ពាន់លានដុល្លារ។
យោងតាមទីភ្នាក់ងារព័ត៌មាន Reuters លោក Giang បានអះអាងដូច្នេះ៖«យើងឃើញមានការកម្ម៉ង់ទិញយ៉ាងច្រើនជាបន្តបន្ទាប់ពីបរទេស ជាពិសេស ពីសហរដ្ឋអាមេរិកតែម្តង»។
វិនិយោគិនបរទេសជាច្រើន បានចាក់បញ្ចូលទឹកប្រាក់ប្រមាណពីរពាន់លានដុល្លារទៅក្នុងសង្វាក់ផលិតកម្មផ្នែកសម្លៀកបំពាក់ និងវាយនភណ្ឌរបស់វៀតណាម ក្នុងពេលប្រាំបីខែដើមឆ្នាំ២០១៨នេះ។ ហើយភាគច្រើននៃបណ្តាវិនិយោគិនទាំងនោះ គឺមកពីប្រទេស ជប៉ុន កូរ៉េខាងត្បូង តៃវ៉ាន់ និងចិន។ នេះជាបញ្ជាក់របស់លោក Giang ។
វៀតណាមនាំចេញផលិតផលសម្លៀកបំពាក់ទៅទីផ្សារអាមេរិកកាន់តែច្រើន ដោយកើនឡើងរហូតដល់១២% ក្នុងរយៈពេល១០ខែចុងក្រោយ ចាប់ពីខែមករាដល់ខែតុលា។ វាមានទំហំទឹកប្រាក់ប្រមាណ ១០,៥ ពាន់លានដុល្លារ។ ចំណែក ឯការនាំចេញទៅកាន់ចិន បានហក់ឡើងរហូតដល់ ៤០%ឯណោះ ដែលស្មើនឹងទឹកប្រាក់ ១,១ពាន់លានដុល្លារ។ នេះបើតាមរបាយការណ៍របស់រដ្ឋាភិបាលវៀតណាម បានចេញផ្សាយកាលពីទី០១ ខែតុលា ឆ្នាំ២០១៨។
របាយការណ៍ដដែលបង្ហាញថា វៀតណាមបច្ចុប្បន្ននេះ មានរោងចក្រវាយណភណ្ឌ និងសម្លៀកបំពាក់លើសប្រាំមួយពាន់កន្លែង ហើយជួយបង្កើតការងារដល់បុគ្គលិកជាង៣លាននាក់ឯណោះ។ ទាក់ទិននឹងរបាយការណ៍ថ្មីនេះដែរ លោក Giang បានពន្យល់ថា មូលហេតុដែលនាំឲ្យមានសន្ទុះដ៏គួរឲ្យកត់សម្គាត់ខាងវិស័យវាយនភណ្ឌរបស់វៀតណាមបែបនេះ គឺដោយសារកត្តាចំនួនពីរ។ មួយគឺ វិវាទពាណិជ្ជកម្មរវាងចិននិងអាមេរិក និងកំណើននៃកិច្ចព្រមព្រៀងពាណិជ្ជកម្មសេរីរបស់វៀតណាម។
គួរបញ្ជាក់ផងដែរថា សម្លៀកបំពាក់ជាផលិតផលនាំចេញលំដាប់ទីពីរ បន្ទាប់ពីផលិតផលទូរសព្ទឆ្លាតវៃ ដែលអាចរកប្រាក់ឲ្យវៀតណាមបានច្រើនបំផុត។ ការនាំចេញសម្លៀកបំពាក់របស់វៀតណាមទៅកាន់ទីផ្សារបរទេសមានភាពល្អប្រសើរ ដ្បិតថា ទំនិញនេះ មិនមែនជាគោលដៅនៃការដំឡើងពន្ធរបស់សហរដ្ឋអាមេរិកឡើយ។
ក្រុងវ៉ាស៊ីនតោនបានដំឡើងពន្ធនាំចូលលើទំនិញចិន ដែលគិតជាទឹកប្រាក់ប្រមាណ ២៥០ពាន់លានដុល្លារ ហើយចិនក៏បានវាយបកទៅវិញលើទំនិញអាមេរិក ដែលមានទំហំទឹកប្រាក់១១០ពាន់លានដុល្លារផងដែរ។ ភាគីមិនទាន់រកដំណោះស្រាយឃើញនៅឡើយទេ ដើម្បីបញ្ចប់សង្គ្រាមដ៏គ្រោះថ្នាក់នេះឡើយ៕
Tag:
សេដ្ឋកិច្ចវៀតណាម សង្គ្រាមពាណិជ្ជកម្ម
© រក្សាសិទ្ធិដោយ thmeythmey.com
