រដ្ឋខូឡូរ៉ាដូជ្រើសរើសអភិបាលរដ្ឋជាអ្នកស្រលាញ់ភេទដូចគ្នាជាលើកដំបូង

អន្តរជាតិ

រដ្ឋខូឡូរ៉ាដូជ្រើសរើសអភិបាលរដ្ឋជាអ្នកស្រលាញ់ភេទដូចគ្នាជាលើកដំបូង

07, Nov 2018 , 8:39 pm

រូបភាព

ដោយ: ថ្មីៗ

លោក Jared Polis បានឈ្នះការបោះឆ្នោតនៅរដ្ឋខូឡូរ៉ាដូដោយក្លាយជាអភិបាលរដ្ឋដំបូងគេដែលប្រកាសខ្លួនជាអ្នកស្រលាញ់ភេទដូចគ្នាជាសាធារណៈ។ នេះបើតាមការចុះផ្សាយរបស់ទីភ្នាក់ងារព័ត៌ាមន AFP នៅថ្ងៃ ៧ ខែវិច្ឆិកានេះ។

ក្នុងការបោះឆ្នោតពាក់កណ្តាលអាណត្តិនៅថ្ងៃ ៦ ខែវិច្ឆិកានេះ លោក Jared Polis បានទទួលការគាំទ្រជាអភិបាលរដ្ឋខូឡូរ៉ាដូ ក្នុងនាមជាបេក្ខជនបក្សប្រជាធិបតេយ្យ។ មុនក្លាយជាអភិបាលរដ្ឋនេះ លោក Polis បានបំពេញការងារជាសមាជិកសភាតំណាងរាស្ត្រចាប់ពីឆ្នាំ ២០០៩។

ក្នុងការឃោសនាកន្លងស្វែងរកសំឡេងឆ្នោតកន្លងមក លោក Polis ហើយលោកមិនដែលលាក់បាំងពីខ្លួនឯងជាអ្នកដែលស្រលាញ់ភេទដូចគ្នាឡើយ ហើយលោកក៏ព្យាយាមប្រើប្រាស់រឿងនេះដើម្បីបង្ហាញពីជំហរមួយប្រឆាំងគោលនយោបាយដែលមិនគាំទ្រសិទ្ធិអ្នកស្រលាញ់ភេទដូចគ្នារបស់រដ្ឋបាលប្រធានាធិបតី ដូណាល់ ត្រាំ ថែមទៀតផង។

ការស្រលាញ់ភេទដូចគ្នារបស់លោក Polis នេះមិនបានទទួលការទិតៀន ឬប្រឆាំងពីគូប្រជែងខ្លួនមកពីបក្សសាធារណរដ្ឋលោក Walker Stapleton ឡើយ។ ប៉ុន្តែវាមានចលនាប្រឆាំងនឹងរូបលោកមួយចំនួនដែរ ដែលរៀបចំឡើងដោយក្រុមអ្នកមាននិន្នាការអភិរក្សនៅក្នុងរដ្ឋខូឡូរ៉ាដូដែលមិនគាំទ្រសិទ្ធិនៃអ្នកស្រលាញ់ភេទដូចគ្នានោះ។

លោក Polis ជាអ្នកប្រជាធិបតេយ្យជឿនលឿនដែលបន្តតស៊ូមតិដើម្បីធានាឲ្យបាននូវប្រព័ន្ធសុខាភិបាលមួយល្អនិងមានតម្លៃសមរម្យសម្រាប់មនុស្សទាំងអស់គ្នា។ លោកក៏ជាអ្នកនយោបាយដែលគាំទ្រឲ្យមានការបង្កើតច្បាប់គ្រប់គ្រងការប្រើប្រាស់អាវុធ ជំរុញការវិនិយោគលើថមពលកកើតឡើងវិញ លុបចោលទោសប្រហារជីវិត ក៏ដូចជាជំរុញការកែទម្រង់វិស័យអប់រំជាដើម។

តាមពិតទៅអតីតអភិបាលរដ្ឋ New Jersey Jim McGreevey ដែលមកពីបក្សប្រជាធិបតេយ្យ បានប្រកាសថាខ្លួនជាអ្នកស្រាលាញ់ភេទដូចគ្នាពេលខ្លួនកំពុងកាន់តំណែងក្នុងឆ្នាំ ២០០៤។ ចំណែក លោកស្រី Kate Brown ដែលមកពីបក្សប្រជាធិបតេយ្យដែរនោះបានប្រកាសថាខ្លួនស្រលាញ់ភេទដូចគ្នាដែរនៅពេលលោកស្រីត្រូវបានគេបោះឆ្នោតឲ្យធ្វើជាអភិបាលរដ្ឋ Oregon ក្នុងឆ្នាំ ២០១៦។ ប៉ុន្តែលោក Polis ជាអ្នកដែលហ៊ានប្រកាសថាខ្លួនបេក្ខជនអភិបាលរដ្ឋដែលស្រលាញ់ភេទដូចគ្នាក្នុងពេលឃោសនា ហើយជាប់ឆ្នោតជាប់អភិបាលរដ្ឋ។

សូមបញ្ជាក់ថា ថ្ងៃ ៦ ខែវិច្ឆិកានេះ សហរដ្ឋអាមេរិករៀបចំការបោះឆ្នោតពាក់កណ្តាលអាណត្តិដែលការបោះឆ្នោតនេះគឺមានការប្រកួតប្រជែងដណ្តើមអាសនៈសភាជាន់ទាបឬរដ្ឋសភាទាំង ៤៣៥ និងមួយភាគបីនៃអាសនៈព្រឹទ្ធសភាឬ ៣៥អាសនៈ រួមជាមួយតំណែងអភិបាលរដ្ឋចំនួន ៣៦ ដែរ។ លទ្ធផលបណ្តោះអសន្នបង្ហាញថា គណបក្សប្រជាធិបតេយ្យដណ្តើមបានសំឡេងភាគច្រើននៅរដ្ឋសភាជាលើកដំបូងក្នុងពេលប្រាំបីឆ្នាំមកនេះ ខណៈដែលបក្សសាធារណរដ្ឋនៅរក្សាព្រឹទ្ធសភាដដែល៕