អន្តរជាតិ
ជំនួបរវាងប្រមុខការទូតអាមេរិកនិងមន្ត្រីទីពីរកូរ៉េខាងជើង ត្រូវលើកពេលដោយគ្មានមូលហេតុ
លោក ប៉ុមប៉េអូ ចាប់ដៃលោក គីម យ៉ុងឈុល នៅព្រលានយន្តហោះព្យុងយ៉ាង (រូបភាព AFP)
×![]()
ដោយ: តន ចាន់រិទ្ធារ៉ា
ជំនួបចរចារវាងរដ្ឋមន្ត្រីការបរទេសអាមេរិក ម៉ៃ ប៉ុមប៉េអូ និងមន្ត្រីជាន់ខ្ពស់កូរ៉េខាងជើង គីម យ៉ុងឈុល ដែលគ្រោងធ្វើក្នុងសប្ដាហ៍នេះ ត្រូវបានលើកពេលវិញហើយ។ ក្រសួងការបរទេសអាមេរិក បានប្រកាសព័ត៌មាននេះនៅថ្ងៃទី៧ ខែវិច្ឆិកា គឺមួយថ្ងៃមុនកាលបរិច្ឆេទនៃជំនួប។ មិនមានមូលហេតុណាមួយត្រូវបានបញ្ចេញឡើយ ប៉ុន្តែមន្ត្រីក្រសួងការបរទេសអាមេរិកអះអាងថា ភាគីទាំងពីរនៅតែបន្តការជជែកគ្នាដដែល។
ជំនួបរវាងលោក ម៉ៃ ប៉ុមប៉េអូ និងមន្ត្រីកូរ៉េខាងជើង នឹងធ្វើឡើងនៅពេលវេលាក្រោយវិញ។ នេះជាការប្រកាសរបស់លោកស្រី Heather Nauert អ្នកនាំពាក្យក្រសួងការបរទេសអាមេរិកនៅថ្ងៃទី៧ ខែវិច្ឆិកា។ តាមគម្រោង លោក ប៉ុមប៉េអូ នឹងជួបជាមួយលោក គីម យ៉ុងឈុល មនុស្សជំនិតមេដឹកនាំកូរ៉េខាងជើង នៅថ្ងៃទី៨ ខែវិច្ឆិកា ដើម្បីបន្តការពិភាក្សាការលុបបំបាត់នុយក្លេអ៊ែរ និងលទ្ធភាពជំនួបលើកទីពីររវាងលោក ដូណាល់ ត្រាំ និងលោក គីម ជុងអ៊ុន។
ក្រោយលើកពេលជំនួបដែលគ្រោងធ្វើក្រុងញូវយ៉ក លោកស្រី Nauert មិនបញ្ជាក់ថា កាលបរិច្ឆេទថ្មីនឹងកើតឡើងនៅពេលណាឡើយ ដោយបានត្រឹមនិយាយថា ជំនួបលើកក្រោយនឹងធ្វើឡើង បើពេលវេលាអនុញ្ញាត។ នេះបើតាមការផ្សាយរបស់ទីភ្នាក់ងារព័ត៌មាន AFP ។
ខណៈអាមេរិកមិនប្រាប់មូលហេតុនៃការពន្យារពេលជំនួបដ៏សំខាន់នេះ កូរ៉េខាងជើងក៏ប្រកាន់ទម្លាប់មិននិយាយអ្វីដែរ។ លទ្ធផលការបោះឆ្នោតពាក់កណ្ដាលអាណត្តិមិនល្អ ទំនងជាកត្តាមួយដែលរដ្ឋបាលលោក ត្រាំ សម្រេចចិត្តប្ដូរពេលជួបមនុស្សសំខាន់របស់លោក គីម បែបនេះ។ លទ្ធផលបថមបង្ហាញថា បក្សសាធារណរដ្ឋរបស់លោក ត្រាំ បានបាត់បង់ការគ្រប់គ្រងរដ្ឋសភា តែបន្តកាន់កាប់ស្ថាប័នព្រឹទ្ធសភាដដែល។
យ៉ាងណាក៏ដោយចុះ ការលើកពេលភ្លាមៗនេះ ជាសញ្ញាមិនល្អឡើយសម្រាប់ការរំសាយនុយក្លេអ៊ែរកូរ៉េខាងជើង ស្របពេលការចរចាកន្លងមកដែលជាប់គាំងផងនោះ មិនមានផ្លែផ្កាដុំកំភួនអ្វីទេ។ ក្រុងព្យុងយ៉ាងបានទាមទារឲ្យក្រុងវ៉ាស៊ីនតោនព្យួរទណ្ឌកម្ម ជាថ្នូរនឹងវិធានការរបស់ខ្លួនក្នុងការលុបបំបាត់នុយក្លេអ៊ែរកន្លងមក។ ប៉ុន្តែក្រុងវ៉ាស៊ីនតោនមិនយល់ស្របឡើយ និងចង់ឲ្យរបបកុម្មុយនីស្តព្យុងយ៉ាងរំសាយនុយក្លេអ៊ែរទាំងស្រុងសិន ទើបខ្លួនអាចផ្ដល់ការលើកទឹកចិត្តបាន។
ភាពទាល់ច្រកក្នុងដំណើរការចរចា ទំនងធ្វើឲ្យកូរ៉េខាងជើងមិនពេញចិត្ត ដ្បិតអាមេរិកនៅតែមិនទាន់ផ្ដល់ការលើកទឹកចិត្តអ្វីដល់កូរ៉េខាងជើង ទោះជារដ្ឋមួយនេះបានធ្វើសកម្មភាពមួយចំនួនរួចហើយក្ដី។ កាន់តែបារម្ភ កាលពីចុងសប្ដាហ៍មុន ក្រសួងការបរទេសកូរ៉េខាងជើងបានសេចក្ដីថ្លែងការណ៍ព្រមានមួយថា ក្រុងព្យុងយ៉ាងនឹងពិចារណាត្រឡប់ទៅរកកម្មវិធីនុយក្លេអ៊ែររបស់ខ្លួនឡើងវិញ បើទណ្ឌកម្មអាមេរិកមិនត្រូវបានលើកលែងទេនោះ៕
Tag:
អាមេរិក
កូរ៉េខាងជើង
ម៉ៃ ប៉ុមប៉េអូ
គីម យ៉ុងឈុល
© រក្សាសិទ្ធិដោយ thmeythmey.com
