អន្តរជាតិ
×![]()
ដោយ: តន ចាន់រិទ្ធារ៉ា
នាយករដ្ឋមន្ត្រីចិន លី ខឹឈាំង នៅថ្ងៃទី៦ ខែវិច្ឆិកា និយាយថា ចិនមិនទាន់សក្តិសមឈ្មោះប្រទេសអភិវឌ្ឍនៅឡើយទេ។ លោក លី និយាយបែបនេះនាជំនួបតុមូល ១+៦ ជាមួយប្រធានស្ថាប័នហិរញ្ញវត្ថុ និងសេដ្ឋកិច្ចធំៗរបស់ពិភពលោកក្នុងរដ្ឋធានីប៉េកាំង។
នរណាក៏ដឹងដែរថា ចិនជាមហាអំណាចសេដ្ឋកិច្ចលំដាប់ទី២ បន្ទាប់ពីអាមេរិក តែប្រទេសនេះនៅតែជាប់ឈ្មោះជាប្រទេសកំពុងអភិវឌ្ឍដដែល បើគិតតាមសូចនាកររបស់ស្ថាប័នអន្តរជាតិធំៗ។ ស្ថិតក្នុងបញ្ជីប្រទេសកំពុងអភិវឌ្ឍ ចិនអាចអនុវត្តគោលនយោបាយជាច្រើនដែលប្រទេសអភិវឌ្ឍពិបាកនឹងធ្វើ ជាពិសេសនយោបាយជួយក្រុមហ៊ុនក្នុងស្រុកតាមរយៈការឧបត្ថម្ភធន។ ប្រធានាធិបតីអាមេរិក ដូណាល់ ត្រាំ មិនពេញចិត្តនឹងចំណាត់ថ្នាក់របស់ចិន ដែលផ្ទុយស្រឡះពីទំហំសេដ្ឋកិច្ចរបស់ខ្លួន។
យ៉ាងណាមិញ នាយករដ្ឋមន្ត្រីចិន លី ខឹឈាំង បានចេញមុខបកស្រាយថា ចិនជាប្រទេសកំពុងអភិវឌ្ឍដដែល។ ក្នុងវេទិកាតុមូលជាមួយប្រធានស្ថាប័នហិរញ្ញវត្ថុអន្តរជាតិធំនៅថ្ងៃទី៦ ខែវិច្ឆិកា លោក លី និយាយថា វាជារឿងមិនស្របការពិតឡើយដែលថា ចិនជាប្រទេសអភិវឌ្ឍ ហើយគួរបំពេញកាតព្វកិច្ចជាប្រទេសអភិវឌ្ឍ។
បើតាមទីភ្នាក់ងារព័ត៌មានរដ្ឋចិន Xinhua មេដឹកនាំលំដាប់ទី២ របស់ក្រុងប៉េកាំងរូបនេះបានពន្យល់ថា៖ «បច្ចុប្បន្ន ផលិតផលក្នុងស្រុកសរុបសម្រាប់មនុស្សម្នាក់មានតិចជាង៩ពាន់ដុល្លារ ដែលនេះស្មើនឹង៨០ភាគរយនៃអត្រាមធ្យមរបស់ពិភពលោក។ ទោះជាគិតតាមសន្ទស្សន៍អភិវឌ្ឍមនុស្ស (HDI) របស់ធនាគារពិភពលោកដែលចិនស្ថ្តិតនៅលំដាប់ទី៨៦ ឬតាមសូចនាកររបស់របៀបវារៈសម្រាប់ការអភិវឌ្ឍឆ្នាំ២០៣០ក្ដី ចិននៅតែមានលក្ខណៈសម្បត្តិជាប្រទេសកំពុងអភិវឌ្ឍដដែល»។
ដោយហៅខ្លួនឯងជាប្រទេសកំពុងអភិវឌ្ឍធំជាងគេ លោក លី បង្ហាញឆន្ទៈរបស់ចិនក្នុងការអនុវត្តកាតព្វកិច្ចរបស់ខ្លួនជាប្រទេសកំពុងអភិវឌ្ឍបន្តទៀត ស្របតាមកម្រិតអភិវឌ្ឍ និងសមត្ថភាពរបស់ខ្លួន។
បើទោះជាចិនមានសេដ្ឋកិច្ចធំយ៉ាងណាក្ដី តែប្រជាជនចិនភាគច្រើននៅតែបន្តរស់នៅក្នុងស្ថានភាពក្រីក្រដដែល ខណៈការអភិវឌ្ឍក៏មិនកើតមានឡើងនៅទូទាំងប្រទេសឡើយ។ ម្យ៉ាងទៀត ចិនខ្លួនឯងក៏ចង់ធ្វើខ្លួនជាអ្នកកំពុងអភិវឌ្ឍបន្តទៀត ដើម្បីចៀសផុតពីការទទួលខុសត្រូវខ្ពស់ក្នុងនាមជាមហាអំណាចផងដែរ៕
Tag:
ចិន
លី ខឹឈាំង
© រក្សាសិទ្ធិដោយ thmeythmey.com
