អ្នកកាសែត CNN ប្រចាំសេតវិមានលោក Jim Acosta ត្រូវបានសេតវិមានអាមេរិកបដិសេធឲ្យចូលយកព័ត៌មានទៀតនៅថ្ងៃពុធទី ៧ ខែវិច្ឆិកា។ ការសម្រេចរបស់សេវិមាននេះ កើតឡើងបន្ទាប់ពីប្រធានាធិបតី ដូណាល់ ត្រាំ ខឹងសម្បារនឹងការបន្តសួរសំណួររបស់ Acosta ហើយថែមទាំងហៅលោកថាជា«មនុស្សចរិកឈ្លើយ និងយ៉ាប់»ទៀតក្នុងសន្និសីទព័ត៌មានទៀត។
ការបដិសេធផ្តល់បណ្ណសម្គាល់អ្នកព័ត៌មាននេះត្រូវបានប្រកាសដោយរដ្ឋមន្ត្រីព័ត៌មានលោកស្រី Sarah Sanders ផ្ទាល់។ លោកស្រីអះអាងថា ការសម្រេចនេះមិនពាក់ព័ន្ធនឹងការបំពានសិទ្ធិសេរីភាពសារព័ត៌មានអ្វីឡើយ ប៉ុន្តែអ្នកសារព័ត៌មាន CNN មានកំហុស។
ក្នុងគណនី Twitter របស់ខ្លួនលោកស្រី Sanders បានថ្លែងថា វិធានការរបស់សេតវិមានគឺត្រូវដាក់ចេញចំពោះបុគ្គលដែលមានឥរិយាបថមិនសមរម្យ និងប៉ះពាល់ស្ត្រីភេទប៉ុណ្ណោះ។
លោកស្រីនិយាយដូច្នេះ៖ «ប្រធានាធិបតី ត្រាំ ជឿជាក់លើសេរីភាពព័ត៌មាន និងរំពឹងក៏ដូចជាស្វាគមន៍សំណួរពិបាកៗដែលទាក់ទិននឹងរូបលោក ក៏ដូចជារដ្ឋបាលរបស់លោកដែរ។ ប៉ុន្តែយើងមិនលើកលែងដល់អ្នកកាសែតដែលដាក់ដៃរបស់ខ្លួនលើស្ត្រីដែលកំពុងព្យាយាមធ្វើការងាររបស់ខ្លួនក្នុងនាមជាបុគ្គលិកហាត់ការឡើយ។ វាជាឥរិយាបថមួយដែលមិនអាចទទួលយកបានឡើយ»។
«ដូច្នេះ ជាលទ្ធផល សេតវិមានកំពុងព្យួរការផ្តល់កាតសម្គាល់ខ្លួនសម្រាប់អ្នកសារព័ត៌មានដល់អ្នកកាសែតពាក់ព័ន្ធចាប់ពីពេលនេះរហូតដល់មានការប្រកាសជូនដំណឹងបន្ថែមទៀតនៅពេលក្រោយ»។
តាមពិតទៅ លោក Acosta បានចោទជាសំណួររសើបមួយចំនួនទាក់ទិននឹងគោលនយោបាយរើសអើងប្រឆាំងអន្តោប្រវេសន៍ត្រូវបានដាក់ចេញមុនបោះឆ្នោតពាក់កណ្តាលអាណត្តិទៅកាន់ប្រធានាធិបតីនៅក្នុងសន្និសីទនាថ្ងៃពុធនេះ។ លោក ត្រាំ បញ្ជាឲ្យលោក Acosta អង្គុយចុះ ប៉ុន្តែលោកបដិសេធ និងមិនបានឲ្យក្បាលមេក្រូទៅឲ្យបុគ្គលិកហាត់ការនៅសេតវិមានវិញឡើយ ដោយលោកព្យាយាមសួរសំណួរប្រធានាធិបតីបន្ថែមទៀត។ ពេលនោះហើយ បុគ្គលិកហាត់ការនោះព្យាយាមដណ្តើមយកក្បាលមេក្រូពីលោក Acosta មកវិញ រហូតដល់ប៉ះដៃលោកផង។
ឃើញបែបនេះ លោក ត្រាំ ទំនងជាខឹងសម្បារខ្លាំងដែរ ហើយបានហៅលោក Acosta ថាជាមនុស្សមានចរិតឈ្លើយ និងអន់ថែមទៀត។ លោក ត្រាំ បន្តដូច្នេះ៖«ខ្ញុំនឹងប្រាប់អ្នកថា CNN គួរតែខ្មាសអៀនខ្លួនឯងដែលមានមនុស្សធុនអ្នកឯងធ្វើការងារជាមួយ។អ្នកឯងជាមនុស្សចរិតឈ្លើយ និងយ៉ាង។ អ្នកឯងមិនគួរធ្វើការងារជាមួយ CNN ទេ»។
បន្ទាប់ពីវាយប្រហារដោយពាក្យសម្តីលើលោក Acosta មិនទាន់អស់ចិត្ត លោកត្រាំ ចាប់ផ្តើមវាយប្រហារលើ CNN ទៀត ដោយលោកចោទប្រកាន់ថា CNN ផ្សាយតែព័ត៌មានក្លែងក្លាយ។
យ៉ាងណាក៏ដោយ អ្នកសារព័ត៌មានរួមអាជីពជាច្រើនដែលនៅក្នុងហេតុការណ៍នោះផ្ទាល់បានចេញមុខការពារលោក Acosta ប្រឆាំងនឹងការចោទប្រកាន់ខុសទំនងដែលថា លោកបានព្យាយាមយកដាក់ដៃលើបុគ្គលិកហាត់ការជាស្ត្រីភេទនោះ។ ក្នុងចំណោមនោះ កាសែត MSNBC បានបញ្ចេញវីដអូខ្លីមួយដែលបង្ហាញពីសកម្មភាពដែលកើតឡើង ដែលបញ្ជាក់ច្បាស់ថា មន្ត្រីសេតវិមានគ្រាន់តែយកលេសនោះបដិសេធអ្នកកាសែត CNN ចូលយកព័ត៌មានប៉ុណ្ណោះ។
លោក Acosta បានសរសេរក្នុងគណនី Twitter របស់ខ្លួនដោយចាត់ទុកការចោទប្រកាន់ថាលោកប៉ះពាល់ស្ត្រីពីសំណាក់រដ្ឋមន្ត្រីព័ត៌មាននោះជារឿងកុហកបោកប្រាស់ដែរ។
ចំណែក CNN ឯណោះវិញក៏បានចេញសេចក្តីថ្លែងការណ៍មួយដែរដើម្បីឆ្លើយតបជុំវិញការចោទប្រកាន់របស់សេតវិមាន និងបញ្ហាដែលបានកើតឡើងដែរ។ CNN បានប្រកាសថា ខ្លួនគាំទ្រពេញទំហឹងចំពោះអ្នកសារព័ត៌មានខ្លួនលោក Acosta ហើយក៏ហៅចាត់ទុកផងដែរថា ការសម្រេចចិត្តរបស់សេតវិមានជារឿងដែលគ្រប់គ្នាមិនរំពឹងថានឹងកើតឡើងសោះ ព្រោះវាផ្អែកទាំងស្រុងលើការភូតកុហក។
CNN លើកឡើងក្នុងសេចក្តីថ្លែងការណ៍ខ្លួនដូច្នេះថា៖ «វាត្រូវបានដាក់ចេញដើម្បីសងសឹកលោក Acosta ដែលសួរសំណួរពិបាកៗទៅកាន់ប្រធានាធិបតី។ ក្នុងសេចក្តីពន្យល់របស់ខ្លួន រដ្ឋមន្ត្រីព័ត៌មាន Sarah Sanders បានកុហកបោកប្រាស់។ លោកស្រីផ្តល់ការចោទប្រកាន់ដែលក្លែងក្លាយ និងលើកយកបញ្ហាដែលមិនបានកើតមានទាល់តែសោះ។ ការសម្រេចចិត្តបែបនេះជាការគំរាមកំហែងលើប្រជាធិបតេយ្យរបស់យើង។ ប្រទេសយើងសក្តិសមនឹងស្ថានភាពល្អប្រសើរជាងនេះ»៕