ជាតិ
កម្ពុជាកំពុងទាមទារវត្ថុបុរាណពីបណ្ដាប្រទេសអាស៊ានវិញ
× ភ្នំពេញ៖ ក្រសួងវប្បធម៌ និងវិចិត្រសិល្បៈ កំពុងរៀបចំឯកសារផ្លូវច្បាប់ដាក់ទៅប្រទេសមួយចំនួនក្នុងតំបន់អាស៊ាន ក្នុងការចរចាទាមទារសម្បត្តិបេតិកភណ្ឌរបស់កម្ពុជាមកវិញ ។
ប្រទេសដែលក្រសួងវប្បធម៌ ស្នើសុំវត្ថុបុរាណនោះ រួមមានដូចជាប្រទេស វៀតណាម ហ្វីលីពីន រុស្សី ចិន។ លោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ ដែលបានផ្តល់បទសម្ភាសដល់សារព័ត៌មានដូច្នេះថា៖ «ក្រសួងបានកំពុងរៀបចំស្នើសុំប្រទេសមួយចំនួនក្នុងអាស៊ាន ឯកសាមួយចំនួនបានឆ្លើយឆ្លង និងមួយចំនួនកំពុងធ្វើ តែមិនទាន់បានចុះហត្ថលេខាទេ យើងបានផ្ញើសំណើខ្លះទៅប្រទេសមួយចំនួនហើយ ប្រទេសខ្លះបានឆ្លើយ ប្រទេសខ្លះកំពុងពិនិត្យមើល»។
កន្លងមកក្រសួងវប្បធម៌ បានចុះហត្ថលេខាជាមួយប្រទេសចំនួនពីរគឺ សហរដ្ឋអាមេរិក និងប្រទេសថៃ ក្នុងការធានាការពារ និងទប់ស្កាត់ការជួញដូរវត្តុបុរាណពីកម្ពុជា។ « តាមរយៈ អនុស្សរណៈវប្បធម៌ទាំងនោះហើយ ដែលធ្វើឲ្យកម្ពុជាបានទទួលវត្តុបុរាណជាច្រើនពីប្រទេសថៃក្តី អាមេរិកក្ដី បានជួយច្រើនដល់ប្រទេសកម្ពុជា ក្នុងការទាមទាររបស់យើងមកវិញ»។ នេះបើតាមលោកស្រី ភឿង សកុណា។
កាលពីថ្ងៃទី៦ វិច្ឆិកា សហរដ្ឋអាមេរិក និងក្រសួងវប្បធម៌ និងវិចិត្រសិល្បៈ បានចុះកិច្ចព្រមព្រៀងលើការបន្តអនុស្សរណៈយោគយល់ ស្ដីពីការដាក់កម្រិតហាមប្រាមនូវការនាំចូលបុរាណវត្ថុរបស់កម្ពុជា រយៈពេល៥ឆ្នាំ ២០១៨-២០២៣ និង ការផ្ដល់ថវិកាចំនួន២០ម៉ឺន ដុល្លារ ដើម្បីជួសជុលជណ្តើរខាងជើងនៃប្រាសាទព្រះវិហារ កាលពីថ្ងៃទី៦ ខែវិច្ចិកា ម្សិលមិញនេះផងដែរ។
រដ្ឋមន្ត្រីក្រសួងវប្បធម៌ បាននិយាយដូច្នេះថា៖«ការចុះហត្ថលេខានៃអនុស្សរណៈវប្បធម៌ និងAFCPនេះ បានបង្ហាញ ពីការប្តេជ្ញានិងការខិតខំប្រឹង ដើម្បីសហការនិងពង្រឹងមិត្តភាពនិងការយោគយល់គ្នារវាងព្រះរាជាណាចក្រកម្ពុជា និងរដ្ឋាភិបាលសហរដ្ឋអាមេរិក ដើម្បីគាំទ្រការថែរក្សាបេតិកភណ្ឌវប្បធម៌ខ្មែរ សម្រាប់ ប្រយោជន៍ដល់ប្រជាជនខ្មែរ សហរគមន៍អន្តរជាតិនិងសម្រាប់អ្នកជំនាន់ក្រោយ»៕
© រក្សាសិទ្ធិដោយ thmeythmey.com