ជាតិ
នយោបាយជាតិ
លោកស្រី ស្មីត ស្នើឲ្យតុលាការ ផ្តល់សេរីភាពពេញលេញជូនលោក កឹម សុខា រូបពី AFP
× មុននឹងចាកចេញពីប្រទេសកម្ពុជា លោកស្រី រ៉ូណា ស្មីត អ្នករាយការណ៍ពិសេសនៃអង្គការសហប្រជាជាតិ បានស្នើម្តងទៀត ទៅរដ្ឋាភិបាលកម្ពុជា ក៏ដូចជាតុលាការ ឲ្យផ្តល់សេរីភាពពេញលេញជូនលោក កឹម សុខា អតីតប្រធានគណបក្សសង្គ្រោះជាតិ។
សំណើរបស់លោកស្រី រ៉ូណា ស្មីត គឺធ្វើឡើងនៅក្នុងសន្និសីទកាសែត ដែលរៀបចំនៅការិយាល័យឧត្តមស្នងការទទួលបន្ទុកសិទ្ធិមនុស្សនៃអង្គការសហប្រជាជាតិប្រចាំកម្ពុជា។ អ្នករាយការណ៍ពិសេសរូបនេះ ថ្លែងយ៉ាងដូច្នេះថា៖«ខ្ញុំ សូមអំពាវនាវឲ្យដោះលែង លោក កឹម សុខា ពីការឃុំឃាំងដ៏រឹតត្បិត និងបញ្ចប់ការស៊ើបអង្កេតឲ្យបានឆាប់លើសំណុំរឿងរបស់គាត់ ដើម្បីធានាពីសិទ្ធិរបស់គាត់ ក្នុងការទទួលបានការកាត់ក្តីក្នុងរយៈពេលសមស្រប ដោយឈរលើការវាយតម្លៃភស្តុតាងមួយច្បាស់លាស់ និងមានតម្លាភាព។ បើពុំដូច្នេះទេ ត្រូវទម្លាក់បទចោទចំពោះគាត់»។
លោកស្រី រៀបចំសន្និសីទកាសែតនេះ គឺដើម្បីបង្ហាញពីការមើលឃើញរបស់លោកស្រី ចំពោះស្ថានការណ៍នយោបាយនិងសិទ្ធិមនុស្សនៅកម្ពុជា បន្ទាប់ពីលោកស្រី បានបំពេញទស្សនកិច្ចរយៈពេល១១ គឺចាប់ពីថ្ងៃទី២៩ ខែតុលា ដល់ថ្ងៃទី៨ ខែវិច្ឆិកា ឆ្នាំ២០១៨។ លោកស្រី នឹងចាកចេញពីប្រទេសកម្ពុជា នៅថ្ងៃទី៩ ខែវិច្ឆិកានេះ។
ក្នុងដំណើរទស្សនកិច្ចលើកនេះ លោកស្រី រ៉ូណា ស្មីត ក៏ឆ្លៀតសុំជួបលោក កឹម សុខា ផងដែរ ដូចកាលដែលលោកស្រី មកលើកមុន ក្នុងឆ្នាំ២០១៧។ ប៉ុន្តែសំណើរបស់លោកស្រី នៅតែត្រូវបានច្រានចោលដូចលើកមុន។
កាលពីចុងខែកញ្ញា ឆ្នាំ២០១៨ ចៅក្រមស៊ើបសួរនៃតុលាការរាជធានីភ្នំពេញ បានសម្រេចដោះលែងលោក កឹម សុខា ឲ្យនៅក្រៅឃុំជាបណ្តោះអាសន្ន តែបានភ្ជាប់ជាមួយនឹងលក្ខខណ្ឌយ៉ាងតឹងរឹងមួួយចំនួន។ លក្ខខណ្ឌទាំងនោះ រួមមាន មិនឲ្យលោក កឹម សុខា ចេញឆ្ងាយពីផ្ទះ មិនឲ្យជួបជនបរទេស ដែលពាក់ព័ន្ធនឹងសំណុំរឿង និង មិនឲ្យជួបមន្រ្តីឬអ្នកនយោបាយនៃអតីតគណបក្សប្រឆាំង៕
Tag:
កឹម សុខា
រ៉ូណា ស្មីត
© រក្សាសិទ្ធិដោយ thmeythmey.com