ប្លែកៗ
អន្តរជាតិ
បុរសហូឡង់អាយុ៦៩ឆ្នាំ តវ៉ាផ្លូវច្បាប់ដើម្បីបញ្ចុះអាយុ២០ឆ្នាំ ព្រោះគាត់ថាខ្លួននៅក្មេង
×![]()
ដោយ: ធីតា
នៅសល់តែប៉ុន្មានខែទៀតប៉ុណ្ណោះ បុរសហូឡង់ដែលមានរូបរាងសង្ហាម្នាក់ ត្រូវប្រារព្ធខួបឈានចូលអាយុ៧០ឆ្នាំរបស់ខ្លួន។ ប៉ុន្តែគាត់ហាក់ដូចជាខ្មាស់អៀនយ៉ាងខ្លាំងពីព្រោះគាត់មើលឃើញថា ខ្លួនហាក់ដូចជានៅក្មេង នៅមានកម្លាំងធ្វើការ និងមានស្នេហា ដូច្នេះគាត់ស្នើតាមផ្លូវច្បាប់ទៅតុលាការ ដើម្បីកាត់បន្ថយអាយុ២០ឆ្នាំ។
ជារឿងដែលមិនធ្លាប់មានទាល់តែសោះនៅហូឡង់ លោក Emile Ratelband បានដាក់ពាក្យបណ្តឹងទៅតុលាការដើម្បីឲ្យបញ្ចុះអាយុរបស់ខ្លួនចំនួន២ទសវត្សរ៍ ដោយដាក់ថ្ងៃកំណើតថ្មី គឺថ្ងៃទី១១ ខែមិនា ឆ្នាំ១៩៦៩ ។
«ខ្ញុំមានអារម្មណ៍ថា ខ្លួនក្មេងជាងអាយុ ខ្ញុំចង់នៅក្មេងណាស់ ពីព្រោះខ្ញុំអាចរើសនារីដែលខ្ញុំស្រឡាញ់ ប៉ុន្តែមិនអាចនោះឡើយ បន្ទាប់ពីខ្ញុំប្រាប់ពួកគេថា ខ្ញុំអាយុ៦៩ឆ្នាំ»។ លោក Ratelband បានថ្លែងយ៉ាងដូច្នេះ ក្នុងបទសម្ភាសមួយជាមួយ AFP។
គ្រូបង្រៀនផ្នែកអប់រំជីវិត ជាពិសេសលើជំនាញអភិវឌ្ឍន៍ខ្លួនឯងរូបនេះ បានអះអាងថា លោកពិតជារងការរើសអើងដោយសារតែអាយុដ៏ចំណាស់របស់ខ្លួន។ គាត់មិនចង់រង់នៅជានិវត្តន៍ជននោះឡើយ ដូច្នេះលោកបានស្នើសុំភាពស្របច្បាប់ចំពោះការបន្ថយអាយុរបស់ខ្លួនចំនួន២០ឆ្នាំ។
«បច្ចុប្បន្ន យើងអាចជ្រើសរើសការងារ រើសភេទ នយោបាយ និងការប្តូរភេទជាដើម។ យើងថែមទាំងអាចប្តូរឈ្មោះបានទៀត។ ដូច្នេះតើហេតុអ្វីបានជាយើងគ្មានសិទ្ធិប្តូរអាយុ?»។ លោក Ratelband បានប្រៀបធៀបយ៉ាងដូច្នេះ ដោយអះអាងតាមពេទ្យថា មុខមាត់គាត់ សក្តិសមអាយុចន្លោះពី៤០ ទៅ៤៥ឆ្នាំ។
លោក Jan-Hein Kuijpers ដែលជាមេធាវីដ៏ល្បីឈ្មោះម្នាក់ បានអះអាងប្រាប់ AFP ថា នេះជាករណីមិនដែលធ្លាប់មានពីមុន ប៉ុន្តែលោករំពឹងថា នឹងទទួលបានលទ្ធផលវិជ្ជមានពីព្រោះច្បាប់តែងតែវិវត្តទៅតាមសម័យកាល៕
Tag:
ប្លែកៗ
ហូឡង់
© រក្សាសិទ្ធិដោយ thmeythmey.com
