អន្តរជាតិ
ក្រុមសិទ្ធិមនុស្ស UN ចាត់ទុកការបញ្ជូនជនភៀសខ្លួនរ៉ូហ៊ីងយ៉ាពាក់កណ្តាលខែវិច្ឆិកា ថាជាចំណាត់ការទាន់ហន់
×![]()
ដោយ: ថ្មីៗ
អ្នកជំនាញអង្គការសិទ្ធិមនុស្សអង្គការសហប្រជាជាតិ បានព្រមានពីផលអវិជ្ជមានជុំវិញការរៀបចំបញ្ជូនជនភៀសខ្លួនជនជាតិភាគតិចរ៉ូហ៊ីងយ៉ារបស់បង់ក្លាដែសទៅកាន់មីយ៉ាន់ម៉ា។ អ្នកជំនាញ មើលឃើញថាស្ថានភាពរបស់មីយ៉ាន់ម៉ា នៅមិនទាន់មានសភាពល្អប្រសើរសម្រាប់ជនភៀសខ្លួនអាចវិលត្រឡប់ទៅវិញឡើយ។
ថ្មីៗនេះ មន្ត្រីរដ្ឋាភិបាលបង់ក្លាដែសនិយាយថា រដ្ឋាភិបាលក្រុងដាហ្កា និងរដ្ឋាភិបាលក្រុងណៃពិដោរ បានឯកភាពគ្នាក្នុងការរៀបបញ្ជូនជនភៀសខ្លួនមួយចំនួនដែលកំពុងតែស្នាក់នៅក្នុងជំរំជនភៀសខ្លួន នៃប្រទេសបង់ក្លាដែស ដែលនឹងចាប់ផ្តើមនៅក្នុងពាក់កណ្តាលខែវិច្ឆិកាខាងមុខ។ គេរំពឹងថា ផែនការនេះនឹងអាចកើតឡើង ខណៈផែនការមុនៗ ត្រូវបានពន្យារពេលជាបន្តបន្ទាប់។
យ៉ាងណាក៏ដោយ ការរៀបចំបញ្ជូនជនភៀសខ្លួនឲ្យទៅមីយ៉ាន់ម៉ារបស់បង់ក្លាដែស មិនទទួលបានការស្វាគមន៍ពីលោកស្រី Yanghee Lee អ្នករាយការណ៍ពិសេសស្តីពីសិទ្ធិមនុស្សរបស់អង្គការសហប្រជាជាតិប្រចាំមីយ៉ាន់ម៉ាឡើយ។ សម្រាប់អ្នកជំនាញ ផែនការនេះហាក់ដូចជាទាន់ហន់ពេកហើយ បើទោះបីជាបញ្ហាជនភៀសខ្លួន បានអូសបន្លាយរយៈពេលជាងមួយឆ្នាំហើយក៏ដោយ។
លោកស្រី Yanghee Lee បានចេញសេចក្តីថ្លែងការណ៍មួយ ដោយបញ្ជាក់ថា លោកស្រី មិនឃើញមានអ្វីជាភស្តុតាងបង្ហាញថា រដ្ឋាភិបាលមីយ៉ាន់ម៉ា បានបង្កើតបរិយាកាសមួយ ដែលជាកន្លែងសម្រាប់ជនភៀសខ្លួន អាចវិលត្រឡប់ទៅរស់នៅ ដែលរួមបញ្ចូលទាំងការធានាពីសុវត្ថិភាព និងសិទ្ធិរបស់ពួកគេផងដែរ។
លោកស្រី នៅតែបារម្ភ ដ្បិត រដ្ឋាភិបាលមីយ៉ាន់ម៉ា នៅតែមិនអាចធានាថា ទុក្ខវេទនា និងការឈឺចាប់របស់ជនជាតិភាគតិចរ៉ូហ៊ីងយ៉ា នឹងមិនវិលត្រឡប់មកពួកគេវិញឡើយ។ លោកស្រី ក៏បានទទូចឲ្យរដ្ឋាភិបាលបង់ក្លាដែស និងមីយ៉ាន់ម៉ា បញ្ឈប់ផែនការនេះជាបន្ទាន់ផងដែរ។
អ្វីដែលលោកស្រី ចង់ឃើញពីចំណាត់ការរបស់មីយ៉ាន់ម៉ា គឺឬសគល់នៃវិបត្តិ ត្រូវបានដោះស្រាយរួចរាល់ ដែលក្នុងនោះរាប់បញ្ចូលទាំងសិទ្ធិជាពលរដ្ឋស្របច្បាប់ និងសេរីភាពក្នុងការដើរហើរជាដើម។ កន្លងមករដ្ឋាភិបាលមីយ៉ាន់ម៉ា មិនដែលចាត់ទុកជនជាតិភាគតិចឥស្លាមរ៉ូហ៊ីងយ៉ា ជាពលរដ្ឋស្របច្បាប់របស់ខ្លួនឡើយ។ សម្រាប់មីយ៉ាន់ម៉ា ជនជាតិភាគតិចរ៉ូហ៊ីងយ៉ា គឺជាជនជាតិភាគតិចខុសច្បាប់ដែលមានដើមកំណើតមកពីបង់ក្លាដែស។
គួរជម្រាបផងដែរថា ក្រោយនៃការវាយប្រហារគ្នានៅចុងឆ្នាំមុននៅក្នុងរដ្ឋរ៉ាខានរបស់មីយ៉ាន់ម៉ា មានជនភៀសខ្លួនជនជាតិភាគតិចរ៉ូហ៊ីងយ៉ាមិនជាងកន្លះលាននាក់ឡើយ បានភៀសខ្លួនទៅបង់ក្លាដែស ។ ហើយតាមរបាយការណ៍របស់អង្គការសិទ្ធិមនុស្ស ដែលស្រង់ពីសម្ភាសន៍ជាមួយនឹងជនភៀសខ្លួន ពួកគេ បានរងការគំរាមសម្លាប់ រំលោភ និងថែមទាំងរងការដុតបំផ្លាញផ្ទះសម្បែងពីអាជ្ញាធរមីយ៉ាន់ម៉ា ៕
Tag:
រ៉ូហ៊ីងយ៉ា
មីយ៉ាន់ម៉ា
អាស៊ាន
© រក្សាសិទ្ធិដោយ thmeythmey.com
