លីប៊ីត្រៀមរៀបចំសន្និសីទជាតិដើម្បីត្រួសត្រាយផ្លូវសម្រាប់ការបោះឆ្នោតកំណត់អនាគតប្រទេសជាថ្មី

អន្តរជាតិ

លីប៊ីត្រៀមរៀបចំសន្និសីទជាតិដើម្បីត្រួសត្រាយផ្លូវសម្រាប់ការបោះឆ្នោតកំណត់អនាគតប្រទេសជាថ្មី

09, Nov 2018 , 10:59 pm

រូបភាព

ដោយ: ថ្មីៗ

លីប៊ីនឹងរៀបចំសន្និសីទជាតិមួយនៅដើមសប្តាហ៍នាឆ្នាំ ២០១៩ខាងមុខដើម្បីត្រួសត្រាយផ្លូវសម្រាប់ការបោះឆ្នោតដែលអាចកើតឡើងនៅឆ្នាំក្រោយនេះ។ សន្និសីទជាតិមួយនេះនឹងក្លាយជាវេទិកាសំខាន់សម្រាប់ប្រជាជនលីប៊ីបង្ហាញទស្សនវិស័យសម្រាប់អនាគតរបស់ខ្លួន ក្រោយរងគ្រោះដោយសារសង្គ្រាមជាងប្រាំពីរឆ្នាំមកនេះ។

អ្នកតំណាងពិសេសរបស់អង្គការសហប្រជាជាតិទទួលបន្ទុកលីប៊ី Ghassan Salame នាថ្ងៃព្រហស្បតិ៍ទី ៨ ខែវិច្ឆិកាបានប្រាប់ក្រុមប្រឹក្សាប្រឹក្សាសន្តិសុខអង្គការសហប្រជាជាតិថា គម្រោងរៀបចំសន្និសីទថ្នាក់ជាតិនេះត្រូវបានពិភាក្សាគ្នាក្នុងចំណោមភាគីពាក់ព័ន្ធតាំងពីឆ្នាំមុនម្ល៉េះ។

មន្ត្រីជាន់ខ្ពស់របស់អង្គការសហប្រជាជាតិរូបនេះពន្យល់ថា វេទិកាដ៏សំខាន់មួយនេះនឹងអាចធានាបានពីការឯកភាពគ្នារវាងបណ្តាភាគីនយោបាយដែលកាន់អំណាចនៅក្នុងប្រទេស រួមទាំងអស់កំណត់អនាគតប្រទេសជាតិបានតាមរយៈការបោះឆ្នោតផងដែរ។

លោក Salame បាននិយាយដូច្នេះ៖«ឥឡូវនេះនេះ ស្ថានការណ៍សមស្របជាងមុន។ សន្និសីទថ្នាក់ជាតិនេះនឹងត្រូវរៀបចំឡើងនៅសប្តាហ៍នៅឆ្នាំ២០១៩។ ដំណើរការបោះឆ្នោតជារួមគួរតែអាចធ្វើឡើងបាននៅនិទាឃរដូវនៃឆ្នាំ ២០១៩ ដែរ»។

បេសកជនរូបនេះបានលើកឡើងពីការគាំទ្រលើសលុបរបស់ប្រជាជនលីប៊ីចំពោះការរៀបចំការបោះឆ្នោត និងស្វាគមន៍ការគាំទ្ររបស់សហគមន៍អន្តរជាតិលើការរៀបចំសន្និសីទនេះដែរ។ នៅសប្តាហ៍ក្រោយនេះដែរ អ៊ីតាលីនឹងរៀបចំវេទិកាពិភាក្សាមួយនៅក្រុង Sicily ដើម្បីជំរុញការកសាងទំនុកចិត្តរវាងភាគីពាក់ព័ន្ធ និងឈានទៅបង្កើនស្ថិរភាពនៅលីប៊ីដែលអំណោយផលដល់ការបោះឆ្នោត។

តាមពិតទៅ ផែនការរៀបចំការបោះឆ្នោតត្រូវបានពន្យារពេលជាច្រើនដងកន្លងមកនេះដោយសារការបន្តប្រយុទ្ធគ្នានិងការបន្តបែកខ្ញែកគ្នាខ្លាំងរវាងភាគីនយោបាយ។

កាលពីខែសមាជិកក្រុមប្រឹក្សាសន្តិសុខ បារាំងនោះធ្លាប់ដាក់ស្នើផែនការរៀបចំការបោះឆ្នោតនៅលីប៊ីនៅត្រឹមខែធ្នូឆ្នាំ ២០១៨នេះដែរ។ ប៉ុន្តែអាមេរិក រុស្ស៊ី និងមហាអំណាចផ្សេងទៀតដែលស្ថិតក្នុងក្រុមប្រឹក្សាសន្តិសុខបដិសេធកាលបរិច្ឆេទនេះ ដោយសារវាហាក់ដូចជាប្រញាប់ពេក។

ការបោះឆ្នោតនៅលីប៊ីជាវិធីសាស្ត្រមួយក្នុងការកំណត់ទំព័រប្រវត្តិសាស្ត្រថ្មីសម្រាប់លីប៊ីដើម្បីបញ្ចប់សង្គ្រាមស៊ីវិល និងការប្រេះឆានៅក្នុងសង្គមរយៈពេលជាងប្រាំពីរឆ្នាំបន្ទាប់ការផ្តួលរលំរបបដឹកនាំលោក Moamer Kadhafi។

ចាប់ពីឆ្នាំ ២០១៤មក លីប៊ីស្គាល់ការដណ្តើមអំណាចគ្នារវាងភាគីនយោបាយដោយមានការបង្កើតរដ្ឋាភិបាលពីរផ្សេងគ្នា។ រដ្ឋាភិបាលមួយតាំងទីនៅក្រុងទ្រីប៉ូលី ហើយរដ្ឋាភិបាលមួយទៀតស្ថិតនៅក្រុង Tobruk។ ពួកគេប្រយុទ្ធគ្នាដើម្បីដណ្តើមកានកាប់ទឹកដី និងឈានទៅគ្រប់គ្រងប្រេងដែលជាធនធានមហាសាលក្នុងរដ្ឋអាហ្វ្រិកខាងជើងមួយនេះ៕