ជាតិ
នយោបាយជាតិ
សម្តេច ហ៊ុន សែន នឹងចុះចេញពីតំណែង បើភ្នាល់ចាញ់លោក សម រង្ស៊ី
× ការដោះលែងលោក កឹម សុខា ឬមិនដោះលែង បានក្លាយជាល្បែងភ្នាល់យកឈ្នះ-ចាញ់គ្នារវាងសម្តេច ហ៊ុន សែន និង លោក សម រង្ស៊ី។ លោក សម រង្ស៊ី អះអាងថា ដោយសារតែសម្ពាធពីអន្តរជាតិ លោក កឹម សុខា នឹងត្រូវដោះលែង តែសម្តេច ហ៊ុន សែន ថាអត់ជាដាច់ខាត។
លោក សម រង្ស៊ី ប្រកាសពីក្រៅប្រទេសមកថា បើលោក កឹម សុខា មិនត្រូវបានដោះលែង ដូចការអះអាងរបស់លោកទេ លោក នឹងស្ម័គ្រចិត្តត្រឡប់មកប្រទេសកម្ពុជា ដើម្បីប្រគល់ខ្លួនឲ្យអាជ្ញាធរចាប់។ លោក បានសរសេរសារលើទំព័រហ្វេសប៊ុកនៅយប់ថ្ងៃទី៩ ខែវិច្ឆិកា ឆ្នាំ២០១៨នេះ យ៉ាងដូច្នេះថា៖««បើខ្ញុំចាញ់លោក ហ៊ុន សែន ខ្ញុំសុខចិត្តដើរចូលឲ្យគាត់ចាប់ខ្ញុំ យកទៅឃុំទន្ទឹមនឹងលោក កឹម សុខា....»។
សាររបស់លោក សម រង្ស៊ី បង្ហោះមិនទាន់បានប៉ុន្មានម៉ោងផង សម្តេច ហ៊ុន សែន ក៏ចេញមកឆ្លើយតប។ សម្តេច ហ៊ុន សែន បានប្រាប់ទៅសារព័ត៌មានហ្វ្រេសញូបែបនេះថា៖«ខ្ញុំហ៊ានភ្នាល់ជាមួយលោក សម រង្ស៊ី។ បើមានការដោះលែង កឹម សុខា មែន ខ្ញុំ សុខចិត្តចុះចេញពីតំណែងតាមការបបួលភ្នាល់របស់ សម រង្ស៊ី។ ប៉ុន្តែបើ លោក កឹម សុខា មិនត្រូវបានដោះលែងទេ លោក សម រង្ស៊ី ត្រូវហ៊ានចុះចាញ់ ហើយទទួលស្គាល់ការភ្នាល់របស់ខ្លួន ដោយចូលមកឲ្យចាប់ខ្លួនភ្លាមៗបន្ទាប់ពីបញ្ចប់ការភ្នាល់»។
តាមរយៈសារលើទំព័រហ្វេសប៊ុក លោក សម រង្ស៊ី ហ៊ានសន្និដ្ឋានថា លោក កឹម សុខា ដែលជាដៃគូនយោបាយរបស់លោក នឹងត្រូវដោះលែង នៅថ្ងៃទី២៩ ខែធ្នូ ឆ្នាំ២០១៨ ឬក៏យូរបំផុត នៅត្រឹមថ្ងៃទី៣ ខែមីនា ឆ្នាំ២០១៩។ លោក សម រង្ស៊ី បញ្ចេញសារនេះ បន្ទាប់ពីសម្តេច ហ៊ុន សែន បដិសេធថា លោក កឹម សុខា នឹងមិនត្រូវដោះលែងឡើយ។
ក្នុងពិធីជួបសំណេះសំណាលជាមួយកម្មករ-កម្មការិនី ក្នុងខេត្តតាកែវ នៅថ្ងៃទី៧ ខែវិច្ឆិកា ឆ្នាំ២០១៨ សម្តេច ហ៊ុន សែន បានចំអកថា លុះត្រាតែសេះដុះស្តែង ទើបលោក កឹម សុខា ត្រូវបានដោះលេង។ មូលហេតុ ដែលសម្តេច ហ៊ុន សែន ចេញមកបដិសេធ គឺដោយសារតែលោក សម រង្ស៊ី ចេញមកនិយាយមុនថា រដ្ឋាភិបាលនិងតុលាការកម្ពុជា នឹងដោះលែងលោក កឹម សុខា៕
Tag:
កឹម សុខា
ហ៊ុន សែន
សម រង្ស៊ី
© រក្សាសិទ្ធិដោយ thmeythmey.com