អន្តរជាតិ
×![]()
ដោយ: គី ចំណា
ខ្យល់អាកាសកខ្វក់អាប់អួរកំពុងតែបង្កគ្រោះថ្នាក់ដល់ប្រជាជនរបស់ទីក្រុងញ៉ូវដេលីប្រទេសឥណ្ឌា។ ក្មេងៗសិស្សសាលាជាច្រើនចាំបាច់ត្រូវពាក់ម៉ាស់ការពារពេលចេញទៅសាលា ព្រោះការបំពុលខ្យល់នេះអាចបង្កគ្រោះថ្នាក់ដល់ភ្នែកនិងផ្លូវដង្ហើម។ 
ការបំពុលខ្យល់នៅឥណ្ឌាតាមពិតទៅកើតឡើងដោយសារកំណើននៃចំនួនយានយន្តនៅតាមដងផ្លូវ ការដុតសំរាម និងធូលីដីដែលមានវត្តមានមកពីតំបន់កសិដ្ឋាននានាជុំវិញទីក្រុងដែលមានប្រជាជនរស់នៅយ៉ាងកុះករមួយនេះ។
ទីក្រុងមួយចំនួននៅឥណ្ឌាដូចជាទីក្រុង ញូវដេលី, Varanasi និង Lucknow ត្រូវបានគេចាត់ទុកថាជាទីក្រុងដែលមានការបំពុលបរិយាកាសធ្ងន់ធ្ងរខ្លាំងជាងគេ។
បើតាមការផ្សព្វផ្សាយរបស់អង្គការសហប្រជាជាតិដែលទទួលបន្ទុកខាងបរិស្ថាន មនុស្សប្រមាណជាប្រាំពីរលាននាក់ក្នុងពិភពលោកបានស្លាប់ដោយសារបញ្ហាកង្វក់អាកាសក្នុងមួយឆ្នាំៗ។
ដើម្បីជួយដោះស្រាយបញ្ហានេះ ភ្នាក់ងារពាក់ព័ន្ធជាច្រើនបានខំប្រឹងប្រែងជួយណែនាំឲ្យប្រជាកសិករនៅទីនោះកាត់បន្ថយការដុតកម្តៅដីក្រោយប្រមូលផលរួច។ ចំណែកប្រជាជនឥណ្ឌាជាច្រើនបានត្អូញត្អែរចំពោះពីការបន្តនាំគ្នាដុតដីធ្វើស្រែចម្ការរបស់កសិករមួយចំនួន ព្រោះថាស្ថានភាពខ្យល់អាកាសកាន់តែកខ្វក់ ហើយការដង្ហើបក៏ពិបាកទៀត។
ឆ្លើយតបនឹងបញ្ហានេះ រដ្ឋាភិបាលឥណ្ឌាក៏ព្យាយាមជួយដោះស្រាយបញ្ហាបំពុលបរិយាកាសនេះ ដោយចាប់ផ្តើមរឹតបន្តឹងការបើកដំណើរការរោងចក្រផលិតអគ្គីសនីដើរដោយចំហេះធ្យូងថ្មនៅក្បែរទីក្រុងដែរ។
ប៉ុន្តែថ្វីអនុវត្តសកម្មភាពដើម្បីកាត់បន្ថយការបំពុលខ្យល់ដូចបានរៀបរាប់ខាងលើនេះក្តី ការសាងសង់សំណង់នានានៅក្នុងទីក្រុងញូវដេលី នៅតែមិនទាន់មានការគ្រប់គ្រងគ្រប់ជ្រុងជ្រោយនៅឡើយទេ។ ការគ្រប់គ្រងសំណង់ទាំងនោះនៅតែជាបញ្ហាចោទ ហើយវាក៏មានចំណែកក្នុងការបំពុលខ្យល់អាកាសដែរ។
កាសែតអាមេរិក New York Times បានផ្សាយថា ប្រជាជនឥណ្ឌាមួយចំនួនពិតជាពេញចិត្តក្នុងការផ្លាស់ប្តូរដែលជួយថែរក្សាបរិស្ថាន និងកាត់បន្ថយការបំពុលខ្យល់ ប៉ុន្តែប្រជាជនខ្លះទៀតត្រូវតែបង្ខំចិត្តធ្វើសកម្មភាពខ្លះដែលបំផ្លិចបំផ្លាញបរិស្ថាន ដោយសារតែបញ្ហាជីវភាពនោះ៕
Tag:
បរិស្ថាន
ឥណ្ឌា
បំពុលខ្យល់
© រក្សាសិទ្ធិដោយ thmeythmey.com
