ជាតិ
សង្គមជាតិ
×![]()
សៀមរាប៖ បច្ចុប្បន្នមិនថាមនុស្សចាស់ ឬក្មេង តែងមានអារម្មណ៍មិនល្អ ឆាប់ខឹង ស្មុគស្មាញនឹងការងារ លុយកាក់ ។ល។ កត្តានេះ ងាយនឹងឲ្យពួកគេកើតជំងឺស្ដ្រេស និងអាចបណ្តាលឲ្យមានបញ្ហាផ្លូវចិត្តផងដែរ។ ដើម្បីកុំឲ្យកើតអារម្មណ៍ទាំងនេះ ព្រះតេជគុណ គូ សុភាព អ្នកអប់រំផ្លូវចិត្តដ៏មានប្រជាប្រិយភាពនៅកម្ពុជា និងជាសាស្ដ្រាចារ្យនៃសាកលវិទ្យាល័យបញ្ញាសាស្ដ្រ បានផ្តល់ឱវាទមួយចំនួន អប់រំចិត្តកុំឲ្យមានបញ្ហាផ្លូវចិត្តធ្ងន់ធ្ងរ។
តាមព្រះភិក្ខុ គូ សុភាព ពិធីសាស្ដ្រកុំឲ្យមានបញ្ហាផ្លូវចិត្ត គឺគួរអានសៀវភៅអប់រំចិត្ត ទម្លាក់សម្ពាធការងារធ្ងន់ៗចោល រៀនដោះលែងខ្លួនឯង រឿងមិនល្អគួរកុំយកដាក់ក្នុងខ្លួនច្រើន មានពេលសមាធិ ដើរកម្សាន្ត រៀនសេពគប់មនុស្សមានទឹកចិត្តល្អៗ ចិត្តស្ងប់ រៀនសូត្រពីពួកគេ និងបើកចិត្តទទួលរឿងរ៉ាវល្អៗ។
ព្រះភិក្ខុអង្គនេះ មានថេរដីកាថា រាល់ថ្ងៃមនុស្សមានសម្ពាធនៅក្នុងជីវិតកាន់តែច្រើន ខ្លះទាក់ទងនឹងការងារ លុយកាក់ សង្គម គ្រួសារ។ល។ កង្វះនៃការអប់រំផ្លូវចិត្ត អាចបណ្តាលឲ្យមានជំងឺផ្លូវចិត្តបានយ៉ាងងាយ។ ក្នុងកម្មវិធីសមាធិដើម្បីសុខភាពផ្លូវចិត្ត ដែលរៀបចំឡើងកាលពីថ្ងៃទី៦ វិច្ឆិកា នៅសណ្ឋាគារសុខាសៀមរាប ព្រះអង្គ បានមានសង្ឃដីកាថា បុគ្គលខ្លះមានសុខភាពផ្លូវកាយល្អ តែចិត្តមិនល្អ គឺស្មុគស្មាញ ស្ដ្រេស ដូច្នេះគុណភាពជីវិតពួកគេក៏មិនល្អប្រសើរដែរ។ សម្ភារខាងក្រៅអាចជួយផ្លូវចិត្តបានខ្លះ តែមិនអាចធានាថាមានសេចក្តីសុខបានឡើយ។
លោកស្រី ដួង សុភាព ប្រធានក្លឹបធនធានមនុស្សខេត្តសៀមរាប និងជាអ្នកផ្តើមរៀបចំកម្មវិធីសមាធិនេះ បានឲ្យដឹងថា កម្មវិធីសមាធិនេះ ធ្វើឡើងដោយមើលឃើញថា មានយុវជនច្រើនចាប់អារម្មណ៍នឹងការអប់រំផ្លូវចិត្ត ដែលខុសពីមុនមានតែមនុស្សចាស់។ លោកស្រីបន្ថែមថា យុវវ័យឥឡូវមានបញ្ហាស្ដ្រេសច្រើនទាក់ទងនឹងការងារ សង្គម គ្មានពេលសម្រាប់ខ្លួនឯង ដូច្នេះពួកគេមានពេល ៣ម៉ោង ក្នុងការសមាធិរដើម្បីសេចក្តីសុខខ្លួនឯង ហើយប្រាសចាកពីរឿងដែលកន្លងមក។
គួរបញ្ជាក់ថា នេះជាលើកទី២ហើយ ដែលក្លឹបធនធានមនុស្សខេត្តសៀមរាបបានរៀបចំកម្មវិធីនេះឡើង ដោយលើកទីមួយ ធ្វើក្នុងខែ កក្កដា នៅអង្គការហ្វារពន្លឺសិល្បៈ ហើយលើកទីពីរនេះ មានមនុស្សចូលរួមប្រមាណ ៣០០នាក់ មកពីស្ថាប័នខុសៗគ្នា ដូចជាសណ្ឋាគារ ក្រុមហ៊ុនទេសចរណ៍ ធនាគារ អ្នករកស៊ី មគ្គុទ្ទេសក៍ទេសចរណ៍ ជាដើម៕
Tag:
ព្រះអង្គ គូ សុភាព
© រក្សាសិទ្ធិដោយ thmeythmey.com
