អន្តរជាតិ
យាយអាយុ៨៥ឆ្នាំ រត់ម៉ារ៉ាតុនលើកទី១៦នៅញូវយ៉ក ដោយប្រើថិរវេលា៦ម៉ោងនិង១៩នាទី
× លោកយាយ Ginette Bedard អាយុ៨៥ឆ្នាំ បានចូលរួមក្នុងព្រឹត្តិការណ៍ TCS New York City Marathon ឆ្នាំ២០០៨ និងជាលើកទី១៦ក្នុងជីវិតរបស់ខ្លួន។ ក្នុងចំណោមមនុស្សរាប់ពាន់នាក់ ដែលបានចូលរួមក្នុងព្រឹត្តិការណ៍ក្នុងក្រុងញូវយ៉ក កាលពីដើមខែវិច្ឆិកា កន្លងមកនេះ លោកយាយសញ្ជាតិបារាំង-អាមេរិក រូបនេះ បានទៅដល់ទីជាមួយនឹងការបញ្ចប់ក្នុងថិរវេលា ៦ម៉ោង និង១៩នាទី។
មានកំណើតនៅក្រុង Mietz ប្រទេសបារាំង លោកយាយ Bedard ដែលបច្ចុប្បន្នរស់នៅតំបន់ Howard-Beach ក្រុងញូវយ៉ក ជាមនុស្សម្នាក់ដែលចូលចិត្តដើរបំផុត ជាពិសេសក្រោយការចូលនិវត្តន៍។ គាត់មានទម្លាប់ដើរយ៉ាងហោចណាស់៣ម៉ោង ឬប្រមាណ២០គីឡូម៉ែត្រ ក្នុង១ថ្ងៃ និង៣៦៥លើ៣៦៥ថ្ងៃក្នុងឆ្នាំ។
យោងតាម AFP លោកយាយដែលមានសញ្ជាតិបារាំង-អាមេរិក រូបនេះ បានទៅចូលរួមព្រឹត្តិការណ៍រត់ម៉ារ៉ាតុនក្រុងញូវយ៉ក ជាលើកទី១៦ ដោយដំណើររបស់គាត់គ្មានការសម្រាកជាពិសេស ការបរិភោគអាហារតាមផ្លូវ ឬការស្តាប់តន្ត្រីនោះឡើយ។
គាត់បានទៅដល់គោលដៅក្នុងរយៈពេល ៦ម៉ោង១៩នាទី និង១វិនាទី ក្នុងនាមជាអ្នកចូលរួមដ៏មានវ័យចំណាស់ជាងគេ។ ជាមួយគ្នានោះ លោកយាយជប៉ុន Yoshiko Takahashi អាយុ៨៣ឆ្នាំ ទៅដល់គោលដៅក្នុងថិរវេលា ៧:៤០:56 លោកយាយអាមេរិក Ulkrike Klopfer អាយុ៨២ឆ្នាំ ទៅដល់គោលដៅក្នុងថិរវេលា ៨:៥៤:០៥ ។
ចំណែកខាងបុរសដែលមានអាយុ៨០ឆ្នាំដូចគ្នា លោកតាអាល្លឺម៉ង់ Juergen Kuhlmey ប្រើថិរវេលា ៥:៣១:០៦ លោកតាអាមេរិក Roland Ratmeyer ប្រើថិរវេលា ៥:៥០:50 និងលោកតាបែលហ្សិក Leo Vleminckx ប្រើថិរវេលា ៦:០០:០២ ។
លោកយាយ Bedard ដែលចេញពីបារាំងទៅរស់នៅញូវយ៉ក កាលពីអំឡុងឆ្នាំ១៩៧០ បានអះអាងថា លោកយាយមិនចង់បានអ្វីក្រៅពីសុខភាពល្អបរិបូរណ៍នោះឡើយ។ លោកយាយមានរបបអាហារត្រឹមត្រូវ ដោយគាត់បានអះអាង ការដើរ និងរត់ ធ្វើឲ្យគាត់មានអារម្មណ៍ថា ខ្លួននៅក្មេងជាដរាប។
កំណត់ត្រាដ៏ល្អបំផុតរបស់លោកយាយ Bedard ក្នុងព្រឹត្តិការណ៍ម៉ារ៉ាតុនញូវយ៉ក សម្រេចបានកាលពីគាត់នៅអាយុ៧២ឆ្នាំ ពោលគឺក្នុងឆ្នាំ២០០៥ ដោយប្រើថិរវេលា ៣ម៉ោង និង៤៦នាទី៕
© រក្សាសិទ្ធិដោយ thmeythmey.com