ពីនេះ ពីនោះ
«គណៈកម្មការ» និង«គណៈកម្មាធិការ» មានន័យខុសគ្នាដូចម្តេច?
× ពាក្យទាំងពីរនេះ មានសាធារណជនច្រើនតែប្រើច្របូកច្របល់គ្នា។ វចនានុក្រមរបស់សម្តេចព្រះសង្ឃរាជ ជួន ណាត ពន្យល់យ៉ាងច្បាស់ថា «គណៈកម្មការ» សំដៅលើជនមួយក្រុម ជ្រើសរើសដោយការបោះឆ្នោត សម្រាប់ឲ្យធ្វើកិច្ចការណាមួយ។ ចំណែក «គណៈកម្មាធិការ» សម្រាប់បង្ហាញពីសមាជិកមួយក្រុម ដែលតាំងឡើងនៅក្នុងក្រសួងរាជការ។
«គណៈកម្មការ» ត្រូវបានគេចាត់ទុកថាជាអ្នក ត្រួតពិនិត្យ ដែលមានបទពិសោធន៍ មានចំណេះវិជ្ជាជ្រៅជ្រះ សម្រាប់ផ្តល់ជាមតិយោបល់។ ឧទាហរណ៍៖ អ្នកប្រឡងចម្រៀង ត្រូវឆ្លងកាត់ការជ្រើសរើសពីគណៈកម្មការជាមុនសិន ទើបអាចទៅវគ្គបន្តបាន។
នៅក្នុងវចនានុក្រមរបស់សម្តេចព្រះសង្ឃរាជ ជួន ណាត ពន្យល់ដូច្នេះថា៖ «គណៈកម្មការ ជាជនមួយក្រុម ឬក្រុមជំនុំដែលគេចាត់តាំងពីការបោះឆ្នោត សម្រាប់ឲ្យពិនិត្យកិច្ចការណាមួយដាច់មុខដោយឡែក»។ ឧទាហរណ៍៖ គណៈកម្មការអង្កេត បោះសម្អាត និងប្រយុទ្ធប្រឆាំងអំពើពុករលួយ,គណៈកម្មការសិទ្ធិមនុស្ស ទទួលបណ្តឹង និងអង្កេត។
ចំណែក «គណៈកម្មាធិការ» មានន័យថា ជាបុគ្គលដែលគេតាំងនៅក្នុងក្រសួងរាជការ ឬសភាដើម្បី ឲ្យប្រតិបត្តិសម្រេចការណាមួយ។ ឧទាហរណ៍៖ គណៈកម្មាធិការជាតិរៀបចំការបោះឆ្នោត(គ.ជ.ប.), គណៈកម្មាធិការជាតិភាសាខ្មែរ, គណៈកម្មាធិការជាតិសុវត្ថិភាពផ្លូវគោក ជាដើម៕
© រក្សាសិទ្ធិដោយ thmeythmey.com