កិច្ចប្រជុំកំពូលអាស៊ានលើកទី ៣៣ ចាប់ផ្តើមឡើងនៅថ្ងៃចន្ទទី ១២ ខែវិច្ឆិកានេះនៅប្រទេសសិង្ហបុរីដែលជាប្រធានអាស៊ានឆ្នាំនេះ។ ក្នុងកិច្ចប្រជុំកំពូលនេះដែរ មេដឹកនាំអាស៊ានទាំងដប់នឹងអនុម័តយកផែនការគោលស្តីពីបណ្តាញទីក្រុងឆ្លាតរបស់អាស៊ាន (ASEAN Smart Cities Network Framework) ជាផ្លូវការដែរ។
មេដឹកនាំអាស៊ានទាំងដប់នឹងអនុម័តយក ផែនការគោលស្តីពីបណ្តាញទីក្រុងឆ្លាតរបស់អាស៊ាន (ASCN) ជាផ្លូវការនៅក្នុងកិច្ចប្រជុំកំពូលអាស៊ានសប្តាហ៍នេះ ។ តាមពិតទៅ គំនិតផ្តួចផ្តើមទីក្រុងឆ្លាតរបស់សិង្ហបុរីដែលជាប្រធានអាស៊ានប្តូរវេនឆ្នាំនេះ ត្រូវបានប្រកាសជាសាធារណៈតាំងពីខែមេសាមកម្ល៉េះ។
ផែនការគោលស្តីពីទីក្រុងឆ្លាតអាស៊ាននេះត្រូវបានរៀបចំឡើងដោយមានការសហការគ្នារវាងទីក្រុងជាសមាជិកទាំងអស់ ហើយវាមានគោលដៅកំណត់និយមន័យនៃទីក្រុងឆ្លាត និងដាក់ផែនការសកម្មភាពជាក់លាក់សម្រាប់ការអភិវឌ្ឍទីក្រុងរបស់អាស៊ានចន្លោះពីឆ្នាំ ២០១៨ ដល់ឆ្នាំ ២០២៥។ លើសពីនេះទៅទៀតនោះ ផែនការគោលនេះក៏កំណត់ចង្អុលពីលទ្ធភាពក្នុងការសហការជាមួយប្រទេសខាងក្រៅជាដៃគូអាស៊ានថែមទៀតដើម្បីអភិវឌ្ឍទីក្រុងឆ្លាតរបស់ខ្លួននេះដែរ។
តាមពិតទៅ ក្នុងជំហានដំបូង ទីក្រុងចំនួន ២៦ ត្រូវបានគេដាក់ក្នុងគម្រោងបណ្តាញទីក្រុងឆ្លាតអាស៊ាននេះ។ ក្នុងចំណោមទីក្រុងទាំងនោះ ទីក្រុងបីរបស់កម្ពុជាមានសៀមរាប បាត់ដំបងនិងរាជធានីភ្នំពេញក៏ ស្ថិតក្នុងគម្រោងទីក្រុងឆ្លាតនេះដែរ។
សម្រាប់អាស៊ាន នគរូបនីយកម្មឬការអភិវឌ្ឍទីក្រុងជាបញ្ហាធំ។ បើគ្មានការយកចិត្តទុកដាក់ក្នុងនោះមានការកកស្ទះចរចាចរណ៍, បំពុលខ្យល់, ភាពក្រីក្រ គម្លាតសង្គម ការបែងចែកគ្នារវាងប្រជាជនទីក្រុងនិងជនបទ រួមទាំងបញ្ហាសន្តិសុខ និងសុវត្ថិភាពរបស់ប្រជាជនផង។ ដូច្នេះហើយការងាកទៅរកដំណោះស្រាយដោយប្រើប្រាស់បច្ចេកវិទ្យាតាមការបង្កើតបណ្តាទីក្រុងឆ្លាតនេះ នឹងអាចជួយដោះស្រាយបញ្ហាប្រឈមមុខ។
បណ្តាញទីក្រុងឆ្លាតដែលស្នើឡើងដោយសិង្ហបុរីនេះ មានគោលដៅជំរុញការប្រើប្រាស់បច្ចេកវិទ្យាឌីជីថលដើម្បីសម្រួល និងលើកស្ទួយជីវភាពរស់នៅរបស់ប្រជាជនអាស៊ានទាំង ៦០០លាននាក់។ វានឹងជំរុញការ សហការគ្នាដើម្បីអភិវឌ្ឍផែនការសកម្មភាពសម្រាប់ទីក្រុងឆ្លាត, ចែករម្លែកបទពិសោធន៍ ក្នុងការអភិវឌ្ឍទីក្រុងរបស់ខ្លួន និងប្រមែរប្រមូលហរិញ្ញវត្ថុពីដៃគូខាងក្រៅរបស់អាស៊ានដូចជាស្ថាប័នហិរញ្ញវត្ថុឬប្រទេសជាដៃគូអភិវឌ្ឍដើម្បីគាំទ្រការអភិវឌ្ឍនៃទីក្រុងឆ្លាតផងដែរ។
សូមបញ្ជាក់ថា ក្នុងកិច្ចប្រជុំកំពូលអាស៊ានលើកទី ៣២ កាលពីខែមេសា នាយករដ្ឋមន្ត្រីសិង្ហបុរី និងជាប្រធានអាស៊ាន លី សៀនឡុង បានបញ្ជាក់ក្នុងសុន្ទរកថាបើកកិច្ចប្រជុំថា ក្រៅពីបណ្តាញទីក្រុងឆ្លាតអាស៊ាន សិង្ហបុរីក៏ស្នើឲ្យមានការពង្រឹងកិច្ចសហប្រតិបត្តិការលើសន្តិសុខអ៊ីនធឺណិត (ASEAN Cyber Security Cooperation)ផងដែរ៕