លោក ហ៊ុន ម៉ានី៖ ព្រឹត្តិការណ៍៤០គីឡូម៉ែត្រ ទៅកាន់ប្រវត្តិសាស្ត្រ គឺជាការហ្វឹកហាត់ភាពម៉ឺងម៉ាត់ របស់យុវជនសម័យថ្មី

ជាតិ

លោក ហ៊ុន ម៉ានី៖ ព្រឹត្តិការណ៍៤០គីឡូម៉ែត្រ ទៅកាន់ប្រវត្តិសាស្ត្រ គឺជាការហ្វឹកហាត់ភាពម៉ឺងម៉ាត់ របស់យុវជនសម័យថ្មី

12, Nov 2018 , 9:39 pm

រូបភាព

ដោយ: ភួង វ៉ាន់ថា

ភ្នំពេញ៖ សហភាពសហព័ន្ធយុវជនកម្ពុជា (ស.ស.យ.ក) នឹងរៀបចំព្រឹត្តិការណ៍ ៤០ គីឡូម៉ែត្រ ទៅកាន់ប្រវត្តិសាស្ត្រ ដើម្បីរម្លឹកដល់វិរៈភាពយុវជនជំនានមុន ក្នុងការតស៊ូសង្គ្រោះជាតិ ក៏ដូចជាការហ្វឹកហាត់ ភាពម៉ឺងម៉ាត់ របស់យុវជនសម័យថ្មី។ ព្រឹត្តិការណ៍ ៤០ គីឡូម៉ែត្រ ទៅកាន់ប្រវត្តិសាស្ត្រ នឹងប្រព្រឹត្តិទៅ នៅថ្ងៃទី២៩ ខែវិច្ឆិកា ដល់ថ្ងៃទី១ ខែធ្នូ ឆ្នាំ២០១៨ ស្ថិតក្នុងស្រុកស្នួល ខេត្តក្រចេះ។

លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា (ស.ស.យ.ក)បានលើកឡើងថាព្រឹត្តិការណ៍មួយនេះ គឺជាការបង្រៀនដល់ យុវជន យុវតីឲ្យចេះរួបរួមគ្នាក្នុងគ្រាលំបាក និងគ្រាសុខសាន្ត ដើម្បីស្វែងយល់ពីកម្រិតសមត្ថភាពរបស់ខ្លួន នៃការតស៊ូដោយភាពអត់ធ្មត់ និងសមត្ថភាពដោះស្រាយបញ្ហាជាក់ស្តែង ។ ជាពិសេសការស្វែងយល់បន្ថែមពីប្រវត្តិសាស្ត្រ តាមរយៈការធ្វើដំណើរថ្មើរជើងរួមគ្នា និងជាការរម្លឹកដល់វិរៈភាពយុវជនជំនាន់មុនក្នុងការតស៊ូសង្គ្រោះជាតិ។

លោក ហ៊ុន សែន លើកឡើងថា៖«យុវជនម្នាក់ៗ ត្រូវត្រៀមដោយខ្លួនឯង សាកល្បងហាត់ដើរដោយខ្លួនឯង ហើយត្រូវដឹងថា តើអ្វីត្រូវយកតាមខ្លះ និងអ្វីដែលមិនត្រូវយកតាមខ្លូននោះ មានតែការសាកល្បង និងការអត់ធ្មត់ តស៊ូខំប្រឹងប្រែង ហើយមានតែការត្រៀមពីដំណាក់កាលមួយទៅដំណាក់មួយទៀត ដោយខ្លួនឯងទេ ទើបអាចធ្វើឱ្យយើងទទួលបានជោគជ័យ ។ហើយចំពោះក្រុមការងារបានជួយត្រឹមតែមូលដ្ឋានសាមញ្ញប៉ុណ្ណោះ ក្រៅពីនោះ គឺត្រូវតែយកចិត្តទុកដាក់ដោយខ្លួនឯង»។

បើតាមលោក ហ៊ុន ម៉ានី យុវជន និងអ្នកចុះឈ្មោះចូលរួមក្នុង ព្រឹត្តិការណ៍ ៤០ គីឡូ ទៅកាន់ប្រវត្តិសាស្ត្រ ត្រូវត្រៀមសម្ភារប្រើប្រាស់ផ្សេងៗដោយខ្លួនឯង និងត្រូវគោរពវិន័យក្រុមក្នុងការសម្រេចទៅដល់គោលដៅទាំងអស់គ្នា។

ក្នុងពិធីជួបសំណេះសំណាលជាមួយក្រុមយុវជន ដើម្បីត្រៀមទៅចូលរួមក្នុងព្រឹត្តិការណ៍៤០ គីឡូនាល្ងាចថ្ងៃទី៩ ខែវិច្ឆិកា ឆ្នាំ២០១៨ ប្រធានសហភាពសហព័ន្ធយុវជនកម្ពុជា បន្ថែមថា៖« នេះមិនមែនជាការលេងសើចសប្បាយនោះទេ ការដើរ៤0គីឡូម៉ែត្រនេះ មិនមែនត្រឹមតែយើងធ្វើតេស្តខ្លួនឯងនោះទេ តែក៏យើងចង់ដឹងមួយទៀតដែរថា នៅពេលដែលប្រទេសជាតិមានអាសន្ន តើយើងអាចលះបង់អ្វីដែលខ្លួនមាន រួបរួមគ្នា សាមគ្គីគ្នា ដាក់ផលប្រយោជន៍ប្រទេសជាតិជាចម្បង ហើយរួមគ្នាដើម្បីសម្រេចគោលដៅនេះបានដែរឬទេ? យើងមិនចាំបាច់ ដល់ប្រទេសមានអាសន្ន ទើបយើងភ្ញាក់រលឹកខ្លួនឯងនោះទេ ដែលនេះជាកាសាកល្បងខ្លួនឯង និងចង់ចាំនូវស្មារតីមួយនេះ ព្រោះយើងមិនដឹងថា ពេលណាប្រទេសមានសង្គ្រាមនោះទេ កាលះបង់ដើម្បីប្រទេសជាតិគឺមានតែការអត់ធ្មត់ តស៊ូ ពុះពាររួមគ្នាហើយ ដាក់ផលប្រយោជន៍ប្រទេសជាចម្បង ទើបជាកាលះបង់ដើម្បីសង្គមជាតិ»។

កញ្ញា ផាន់ ឡៃហេង និស្សិតនៃសកលវិទ្យាល័យភូមិន្ទភ្នំពេញបានឲ្យដឹងថាព្រឹត្តិការណ៍ ៤០ គីឡូនេះល្អណាស់ ហើយកញ្ញាក៏ចង់សាកល្បងដែរ ដើម្បីដឹងពីសមត្ថភាពខ្លួន ក្នុងការដើរយៈប្រវែងឆ្ងាយ រួមទាំងការបង្កើតអនុស្សាវរីយមិត្តភាពជាមួយយុវជន ដែលចូលរួមជាច្រើនផ្សេងទៀត។ ជាពិសេសបានដឹងពីប្រវត្តិសាស្ត្រ២ធ្នូផង។ កញ្ញា ឡៃហេង សង្ឃឹមថា ខ្លួននឹងអាចធ្វើបាន ខណៈរូបនាងកំពុងតែខំហ្វឹកហាត់ក្នុងការដើរ ជាមួយមិត្តភក្តិស្ទើររាល់ថ្ងៃ ។

ព្រឹត្តិការណ៍ ៤០ គីឡូ ទៅកាន់ប្រវត្តិសាស្ត្រនឹងប្រព្រឹត្ត នៅថ្ងៃទី២៩ ខែវិច្ឆិកា ដល់ថ្ងៃទី១ ខែធ្នូ ឆ្នាំ២០១៨ ស្ថិតក្នុងស្រុកស្នួល ខេត្តក្រចេះ។ បើតាមគម្រោង សហភាពសហព័ន្ធយុវជនកម្ពុជា នឹងផ្ដល់ឱកាសឲ្យយុវជន៥០០នាក់ចូលរួមក្នុងកម្មវិធីនេះ តាមរយៈការពិនិត្យមើលសុខភាព និងកាយសម្បទា៕