អន្តរជាតិ
ជំនួប APEC៖ ប៉ាពួអាស៊ីនូវែលហ្គីណេ ដាក់ពង្រាយកងកម្លាំងបរទេសយ៉ាងច្រើនដើម្បីការពារសន្តិសុខ
×![]()
ប៉ាពូអាស៊ីនូវែល ហ្គីណេ បានដាក់ពង្រាយនាវាចម្បាំង, យន្តហោះចម្បាំង និងកងទ័ពប្រយុទ្ធប្រឆាំងនឹងអំពើភេរវកម្ម មកពីចម្រុះជាតិសាសន៍ ដើម្បីការពារមេដឹកនាំពិភពលោក ដែលនឹងអញ្ជើញចូលរួមកិច្ចប្រជុំកំពូលនារដ្ឋធានីរបស់ខ្លួន នាចុងសប្តាហ៍នេះ។
កងទ័ពប្រមាណ៤០០០នាក់ ដែលពាក់កណ្តាលនៃកងទ័ពទាំងនោះគឺសុទ្ធតែជារបស់បរទេស នឹងត្រូវធ្វើការជាមួយប៉ូលីសរបស់ប៉ាពូអាស៊ីនូវែល ហ្គីណេរាប់រយនាក់ ដើម្បីយាមល្បាត អំឡុងវេទិកាកិច្ចសហប្រតិបត្តិការសេដ្ឋកិច្ចប្រចាំតំបន់ អាស៊ី-ប៉ាស៊ីហ្វិក (APEC)។ កិច្ចប្រជុំកំពូលប្រចាំឆ្នាំនេះដែរ នឹងត្រូវចាប់ផ្តើមនាថ្ងៃទី១៧ ខែវិច្ឆិកាខាងមុខ។
ក្នុងចំណោមមេដឹកនាំពិភពលោកកំពូលៗទាំងនោះ គឺរួមមានដូចជា ប្រធានាធិបតីចិន ស៊ី ជិនភីង, នាយករដ្ឋមន្ត្រីជប៉ុន ស៊ីនហ្សូ អាបេ និងអនុប្រធានាធិបតីអាមេរិក Mike Pence ជាដើម ។ ជាមួយគ្នានេះ ប្រតិភូតំណាងជាង១៥០០០នាក់ផ្សេងទៀត ក៏រំពឹងថានឹងចូលរួមកិច្ចប្រជុំកំពូលនេះផងដែរ។
ដើម្បីធានាសុវត្ថិភាពប្រតិភូតំណាងទាំងនោះ រដ្ឋាភិបាលប៉ាពូអាស៊ីនូវែល ហ្គីណេបានស្នើសុំជំនួយផ្នែកយោធាពីអូស្ត្រាលី សហរដ្ឋអាមេរិក និងនូវែលសេឡង់។ បើតាមទីភ្នាក់ងារព័ត៌មាន AFP នាវាយោធាអូស្ត្រាលីនូវែលហ្សែឡង់ និងសហរដ្ឋអាមេរិក នឹងធ្វើការយាមល្បាតនៅតាមបណ្តោយឆ្នេរនៃរដ្ឋធានីរបស់ប៉ាពូអាស៊ីនូវែល ហ្គីណេ។ លើសពីនេះ ប្រទេសទាំងបីនេះ ក៏បានផ្តល់កងកម្លាំងពិសេសជូនប្រទេសនេះថែមទៀតផង។
ជាការបំពានដែនអធិបតេយ្យរបស់ប៉ាពូអាស៊ីនូវែល ហ្គីណេ?
កាសែតក្នុងស្រុករបស់ប៉ាពូអាស៊ីនូវែល ហ្គីណេមួយឈ្មោះថា Post-Courier បានចុះផ្សាយអត្ថបទទំព័រមុខមួយ ដោយមានចំណងជើងថា «ការឈ្លានពានរបស់ APEC»។ ទោះបីជាយ៉ាងនេះក្តី អគ្គស្នងការនៃកងកម្លាំងសន្តិសុខជាតិប៉ាពូអាស៊ីនូវែល ហ្គីណេ លោក Gari Baki បានប្រាប់ប្រជាជន កុំឲ្យមានការព្រួយបារម្ភពីកងទ័ពបរទេសទាំងអស់នោះ។
ត្រង់នេះ លោក Gari បានអះអាងយ៉ាងដូច្នេះ៖ «ខ្ញុំសូមបញ្ជាក់ប្រាប់ប្រជាជនឲ្យច្បាស់ថា ពួកគេមិនគួរភ្ញាក់ផ្ញើលពីបញ្ហាទាំងនេះឡើយ ដ្បិតថា កងកម្លាំងអន្តរជាតិទាំងនោះ គឺមកកាន់ទីនេះ តាមការស្នើសុំរបស់រដ្ឋាភិបាលយើងប៉ុណ្ណោះ»។
មុនរៀបចំជំនួបកំពូលនេះ រដ្ឋាភិបាលប៉ាពូអាស៊ីនូវែល ហ្គីណេបានអនុម័តច្បាប់ដើម្បីអនុញ្ញាតឲ្យកងសន្តិសុខអន្តរជាតិប្រើប្រាស់កម្លាំងប្រដាប់អាវុធ ប្រសិនចាំបាច់ដើម្បីទប់ទល់នឹងការគំរាមកំហែងណាមួយ អំឡុងកិច្ចប្រជុំកំពូលនេះ។ ទាក់ទិននឹងការដាក់ពង្រាយកងកម្លាំងបរទេសយ៉ាងច្រើនសម្បើមបែបនេះ អតីតមេទ័ពកំពូលប៉ាពូអាស៊ីនូវែល ហ្គីណេ លោក Jerry Singirok បានលើកឡើងពីក្តីកង្វល់របស់លោកថា ចំណាត់ការថ្មីនេះនឹងមានឥទ្ធិពលអវិជ្ជមានទៅលើអធិបតេយ្យជាតិ។
យ៉ាងណាមិញ សមាគមការពារជាតិអូស្ត្រាលី ដែលមានមូលដ្ឋាននៅរដ្ឋធានី Canberra បានបកស្រាយថា ប្រសិនបើប្រទេសកំពុងអភិវឌ្ឍដូចជា ប៉ាពូអាស៊ីនូវែល ហ្គីណេ ពុំទទួលយកជំនួយផ្នែកសន្តិសុខពីបរទេសនោះទេ ក៏ពួកគេគ្មានសមត្ថភាពធ្វើជាម្ចាស់ផ្ទះព្រឹត្តិការណ៍ដ៏សំខាន់ដូចជា កិច្ចប្រជុំកំពូល APEC ដូច្នេះដែរ។
ជាឱកាសសម្រាប់ឲ្យពិភពលោកស្គាល់ប្រទេសក្រីក្រក្នុងតំបន់អូសេអានីមួយនេះ
រដ្ឋាភិបាលប៉ាពូអាស៊ីនូវែល ហ្គីណេ បានសម្លឹងឃើញកិច្ចប្រជុំកំពូលមួយនេះ ជាឱកាសដ៏កម្របំផុតមួយ ដើម្បីបង្ហាញប្រទេសខ្លួនទៅកាន់ពិភពលោកឲ្យបានស្គាល់ និងព្យាយាមទាក់ទាញការវិនិយោគ មកកាន់ប្រជាជាតិក្រជាងគេបំផុតក្នុងចំណោមសមាជិក APEC ទាំង២១ប្រទេសនេះផងដែរ។
ជុំវិញរឿងនេះ រដ្ឋមន្ត្រីទទួលខុសត្រូវរៀបចំគម្រោងកិច្ចប្រជុំកំពូលនេះ លោក Justin Tkatchenko បានគូសបញ្ជាក់ថា៖ «យើងពុំធ្លាប់មានមេដឹកនាំកំពូលៗដូចនេះធ្វើដំណើរមកកាន់ប្រទេសយើងឡើយ។ ពិភពលោកទាំងមូលកំពូលសម្លឹងមើលយើងមិនដាក់ភ្នែកឡើយ»។
គួរបញ្ជាក់ផងដែរថា ច្រើនជាងមួយភាគបីនៃប្រជាជនប៉ាពូអាស៊ីនូវែល ហ្គីណេ ប្រមាណ៨,៥លាននាក់ កំពុងរស់នៅក្រោមបន្ទាត់នៃភាពក្រីក្រ៕
Tag:
កិច្ចប្រជុំកំពូល APEC
ប៉ាពូអាស៊ីនូវែល ហ្គីណេ
© រក្សាសិទ្ធិដោយ thmeythmey.com
