ទោះជាបានប្ដេជ្ញាចិត្តរំសាយនុយក្លេអ៊ែរក្ដី កូរ៉េខាងជើងនៅតែដំណើរការមូលដ្ឋានបាញ់មីស៊ីលចំនួន១៣កន្លែងផ្សេងគ្នា ដែលក្រុងព្យុងយ៉ាងមិនបានប្រកាសពីមុនមក។ នេះបើតាមរបាយការណ៍របស់ស្ថាប័នស្រាវជ្រាវមួយរបស់អាមេរិកនៅថ្ងៃទី១២ ខែវិច្ឆិកា។ ទីតាំងសម្ងាត់ទាំងនោះ មានស្តុកមីស៊ីលគ្រប់ប្រភេទរាប់ទាំងមីស៊ីលបាលីស្ទិកធុន Hwasong ដែលអាចបាញ់ដល់ទឹកដីអាមេរិកផង។ លទ្ធផលក្នុងរបាយការណ៍នេះ ហាក់ផ្ទុយពីការប្ដេជ្ញាចិត្តរបស់មេដឹកនាំកូរ៉េខាងជើង និងធ្វើឲ្យប្រធានាធិបតី ដូណាល់ ត្រាំ បាក់មុខដែរ។
កូរ៉េខាងជើងកំពុងបន្តអនុវត្តកម្មវិធីមីស៊ីលបាលីស្ទិករបស់ខ្លួនជាសម្ងាត់ ខណៈកំពុងចរចាជាមួយអាមេរិកលើការរំសាយនុយក្លេអ៊ែរ។ ក្នុងរបាយការណ៍របស់មជ្ឈមណ្ឌលសម្រាប់ការសិក្សាអន្តជាតិ និងយុទ្ធសាស្ត្រ (CSIS) ក្រុងព្យុងយ៉ាងបានលាក់បាំងពីដំណើរការរបស់មូលដ្ឋានមីស៊ីលយ៉ាងហោចណាស់១៣កន្លែងក្នុងចំណោមទីតាំងចំនួន២០ ដែលភាគច្រើននៅស្ថិតនៅតំបន់ភ្នំដាច់ស្រយាលរបស់ប្រទេសនេះ។
បើតាមរបាយការណ៍ចេញផ្សាយថ្ងៃទី១២ ខែវិច្ឆិកា មូលដ្ឋានទាំងនោះជាបណ្ដាញមួយដែលក្រុងព្យុងយ៉ាងព្យាយាមរក្សាយ៉ាងគត់មត់ដែលមានសមត្ថភាពបាញ់មីស៊ីលដែលរត់ដល់ទឹកដីអាមេរិក ទោះជារងការវាយប្រហារផ្លូវអាកាសពីសំណាក់កម្លាំងយោធាអាមេរិក និងកូរ៉េខាងត្បូងក្ដី។ របាយការណ៍នេះ នឹងធ្វើឲ្យការចរចារវាងអាមេរិក និងកូរ៉េខាងជើងកាន់តែស្មុគស្មាញថែមទៀត ខណៈមិនមានលទ្ធផលជាដុំកំភួនអ្វីផងនោះ។
រូបភាពមូលដ្ឋាន Sakkanmil ពីលើអាកាស
យោងតាមរូបភាពថតដោយផ្កាយរណប CSIS បានបញ្ចេញព័ត៌មានលម្អិតមួយចំនួនទាក់ទងមូលដ្ឋាន Sakkanmol ។ មូលដ្ឋាននេះមានចម្ងាយ១៣៥គីឡូម៉ែត្រពីរដ្ឋធានីសេអ៊ូល មានផ្លូវចូលទីតាំងមីស៊ីលក្រោមដីចំនួន៧ច្រក និងកន្លែងបាញ់មីស៊ីលដែលត្រូវបានលាក់បាំងជិត។ ស្ថាប័នស្រាវជ្រាវនេះអះអាងថា គិតត្រឹមខែវិច្ឆិកា ឆ្នាំ២០១៨ មូលដ្ឋាននេះនៅតែមានសកម្មភាព និងត្រូវបានថែទាំយ៉ាងល្អតាមស្តង់ដាកូរ៉េខាងជើង។
កូរ៉េខាងជើងចែកមូលដ្ឋានបាញ់មីស៊ីលជាបីតំបន់
ក្នុងរបាយការណ៍ដាច់ដោយឡែកមួយទៀត CSIS រកឃើញថា យោធាកូរ៉េខាងជើងកំពុងធ្វើប្រតិបត្តិការទីតាំងមីស៊ីលចន្លោះពី១៥ ទៅ២០ ។ លទ្ធផលនេះបានមកពីការស្រាវជ្រាវស៊ីជម្រៅ រួមបញ្ចូលទាំងការសម្ភាសជាមួយអ្នកភៀសខ្លួន មន្ត្រីរដ្ឋាភិបាល ការពារជាតិ និងចារកម្មនៅជុំវិញពិភពលោក។ អ្វីគួរឲ្យកត់សម្គាល់នោះ កូរ៉េខាងជើងបានចែកមូលដ្ឋានមីស៊ីលរបស់ខ្លួនជា៣តំបន់ដាច់ពីគ្នា ដោយទីតាំងជិតបំផុតស្ថិតនៅមូលដ្ឋាន Sakkanmol ឬហៅថាតំបន់កលយុទ្ធ។
តំបន់មួយទៀតស្ថិតចន្លោះ៥០ទៅ៩០គីឡូម៉ែត្រពីតំបន់គ្មានយោធាដែលខណ្ឌចែកឧបទ្វីបកូរ៉េជាពីរក្រោយចប់សង្គ្រាមឆ្នាំ១៩៥៣ ។ មូលដ្ឋានក្នុងតំបន់មានសមត្ថភាពវាយប្រហារគោលដៅពីរភាគបីនៃតំបន់ភាគខាងជើងរបស់កូរ៉េខាងត្បូង តែក៏ស្ថិតក្នុងតំបន់មានសុវត្ថិភាពពីការវាយប្រហារកាំភ្លើងត្បាល់របស់កូរ៉េខាងត្បូង និងអាមេរិកដែរ។ មូលដ្ឋានឆ្ងាយជាងគេស្ថិតនៅចម្ងាយច្រើនជាង១៥០គីឡូម៉ែត្រពីព្រំដែន ហើយដែលមានផ្ទុកមីស៊ីលធុន Hwasong បាញ់ដល់ទ្វីបអាមេរិកតែម្ដង។
របាយការណ៍ដដែលបន្តថា ទីតាំងទាំងនេះ ដែលអាចបាញ់មីស៊ីលបាលីស្ទិកគ្រប់ចម្ងាយមិនថាខ្លី មធ្យម ឬវែងនោះ សុទ្ធតែត្រូវប្រកាស ពិនិត្យឡើងវិញ និងកម្ទេចទាំងអស់ក្រោមកិច្ចព្រមព្រៀងណាមួយក្នុងការរំសាយនុយក្លេអ៊ែរ។
លោក គីម កំពុងបោកលោក ត្រាំ ?
ជាមួយនឹងរបាយការណ៍ខាងលើនេះ តើប្រមុខដឹកនាំកូរ៉េខាងជើង គីម ជុងអ៊ុន កំពុងបោកប្រាស់ប្រធានាធិបតីអាមេរិក ដូណាល់ ត្រាំ ឬ? កន្លងមក លោក ត្រាំ តែងអួតអាងពីដំណើរការទៅមុខក្នុងការបង្ខំឲ្យកូរ៉េខាងជើងបញ្ឈប់ការគំរាមកំហែងផ្នែកយោធាដាក់អាមេរិក។ ភាពស្ងៀមស្ងាត់របស់កូរ៉េខាងជើងក្នុងការសាកល្បងនុយក្លេអ៊ែរ ឬការបាញ់មីស៊ីល ព្រមទាំងការបំផ្លាញទីតាំងបាញ់មីស៊ីលមួយចំនួន ធ្វើឲ្យលោក ត្រាំ ញញឹមបិទមាត់មិនជិតឡើយ។
យ៉ាងណាមិញ ក្នុងរបាយការណ៍របស់ CSIS ការបិទមូលដ្ឋានបាញ់ផ្កាយរណប Sohae នៅក្បែរព្រំដែនចិន ដែលទាក់ទាញចំណាប់អារម្មណ៍ពីប្រព័ន្ធផ្សព្វផ្សាយជាច្រើននោះ បានជួយកូរ៉េខាងជើងលាក់បាំងសកម្មភាពនៅមូលដ្ឋាន Sakkanmol និងមូលដ្ឋានលាក់កំបាំងផ្សេងទៀត។ ការរក្សាការសម្ងាត់ពីមូលដ្ឋានបាញ់មីស៊ីល ត្រូវធ្វើឡើងជាច្រើនដំណាក់កាលដើម្បីធានាថា វាអាចរួចពីការវាយប្រហារទុកមុនសត្រូវ និងអំឡុងពេលធ្វើសង្គ្រាមដែរ។
វាក៏បង្កការសង្ស័យដែរថា កូរ៉េខាងជើងនឹងបញ្ចេញរាល់កម្មវិធីនុយក្លេអ៊ែរ ឬមីស៊ីលរបស់ខ្លួន ហើយអនុវត្តតាមពាក្យសម្ដីក្នុងការជជែកដោយស្មោះត្រង់ជាមួយអាមេរិក ខណៈដែលលោក ត្រាំ កំពុងអួតក្ដែងៗពីទំនាក់ទំនងល្អជាមួយមេដឹកនាំកូរ៉េខាងជើងនោះ។ បើកូរ៉េខាងជើងប្រើល្បិចមែននោះ លោក ត្រាំ ទំនងជាបាក់មុខខ្លាំងមិនខាន ព្រោះទោះជាមិនបាញ់មីស៊ីលមែន តែកូរ៉េខាងជើងសម្ងំផលិតមីស៊ីលកាន់តែច្រើនទៅវិញ៕