កីឡាអន្តរជាតិ
អន្តរជាតិ
Ibrahimovic ប្រជែងឈ្នះ Rooney លើកពានកីឡាករចំណូលថ្មីឆ្នើមបំផុតនៅ MLS រូបភា AFP
× Zlatan Ibrahimovic ត្រូវបានជ្រើសរើសជាកីឡាករចំណូលថ្មីល្អបំផុតនៃក្របខណ្ឌកីឡាបាល់ទាត់អាមេរិក Major League Soccer ប្រចាំរដូវកាល ២០១៨ បន្ទាប់ពីយកឈ្នះពិន្ទុអតីតមិត្តរួមក្រុម Manchester United កីឡាករ Wayne Rooney។
ខ្សែប្រយុទ្ធ Los Angeles Galaxy កីឡាករ Ibrahimovic បានទទួលសំឡេងឆ្នោតគាំទ្រពីសំណាក់គ្រូបង្វឹក អ្នកសារព័ត៌មាន កីឡាករនៅ MLS រួមទាំងបណ្តាញផ្សព្វផ្សាយ រហូតដល់ទៅ ៣៦,៣៦ភាគរយ នាំមុខ Rooney ខ្សែប្រយុទ្ធ DC United ដែលបានសំឡេង ៣២,២៥ភាគរយ។ កីឡាករម៉ិកស៊ិក Carlos Vela របស់ក្លិប Los Angeles FC ស្ថិតនៅចំណាត់លេខ៣បានសំឡេង ១៣,៤៧ ភាគរយ។
Ibrahimovic វ័យ៣៧ឆ្នាំ ដែលជាអតីតខ្សែប្រយុទ្ធមុតស្រួចរបស់ក្រុមជម្រើសជាតិស៊ុយអែត អាចរកគ្រាប់បាល់បាន ២២គ្រាប់ និងបញ្ជូនបាល់ឲ្យមិត្តរួមក្រុមសម្រេចទី១០លើក ក្នុងការបង្ហាញខ្លួន ២៧ប្រកួតឲ្យ LA Galaxy បន្ទាប់ពីចាកចេញពីទឹកដី Old Trafford កាលពីខែមីនាឆ្នាំ២០១៨ ក្រោយរួមរស់ជាមួយ Man Utd ២រដូវកាល។
Ibrahimovic និង Rooney ដែលមិត្តរួមក្រុមចាស់ ក៏ត្រូវបានជ្រើសរើសចូលក្នុងបញ្ជីឈ្មោះ៥នាក់ចុងក្រោយដើម្បីប្រជែងពានរង្វាន់កីឡាករឆ្នើមប្រចាំរដូវកាល (Most Valuable Player) ឆ្នាំ ២០១៨។ អ្នកទាំងពីរក៏ជាប់ឈ្មោះជាកីឡាករ១១នាក់ល្អបំផុត XI នៅ MLS ប្រចាំរដូវកាលនេះដែរ៕
© រក្សាសិទ្ធិដោយ thmeythmey.com