មហាធៀ មិនជឿថា ដូណាល់ ត្រាំ នឹងជាប់ឆ្នោតជាថ្មីឆ្នាំ ២០២០ឡើយ

អន្តរជាតិ

មហាធៀ មិនជឿថា ដូណាល់ ត្រាំ នឹងជាប់ឆ្នោតជាថ្មីឆ្នាំ ២០២០ឡើយ

13, Nov 2018 , 5:10 pm

រូបភាព

ដោយ:

នាយករដ្ឋមន្ត្រីម៉ាឡេស៊ី មហាធៀ មហាម៉ាត់ យល់ថា ប្រធានាធិបតីអាមេរិក ដូណាល់ ត្រាំ នឹងមិនជាប់ឆ្នោតជាថ្មីសម្រាប់អាណត្តិទីពីរឡើយ ដែលវាជារឿងវិជ្ជមានសម្រាប់ពាណិជ្ជកម្មពិភពលោក។ លោកទស្សន៍ទាយបែបនេះដោយសម្អាងលើលទ្ធផលនៃការបោះឆ្នោតពាក់កណ្តាលអាណត្តិដើមខែវិច្ឆិកាដែលបក្សសាធារណរដ្ឋបាត់បង់សំឡេងភាគច្រើនក្នុងរដ្ឋសភានោះ។

ក្នុងកិច្ចសម្ភាសន៍ជាមួយទូរទស្សន៍ CNBC ថ្ងៃចន្ទទី ១២ ខែវិច្ឆិកាក្នុងពេលស្ថិតនៅប្រទេសសិង្ហបុរីសម្រាប់កិច្ចប្រជុំកំពូលអាស៊ានលើកទី៣៣ លោក មហាធៀ បានគូសបញ្ជាក់ថា លោកត្រាំ នឹងមិនជាប់ឆ្នោតសម្រាប់អាណត្តិទីពីរឡើយ។

ត្រង់ចំណុចនេះ នាយករដ្ឋមន្ត្រីម៉ាឡេស៊ីវ័យ ៩៣ឆ្នាំរូបនេះបានពន្យល់ថា លោកហ៊ាននិយាយបែបនេះ ដោយផ្អែកលើលទ្ធផលអវិជ្ជមាននៃការបោះឆ្នោតពាក់កណ្តាលអាណត្តិរនៅអាមេរិកនាថ្ងៃ ៦ ខែវិច្ឆិកាកន្លងទៅ ដែលគណបក្សសាធារណៈរបស់លោកត្រាំ បានបាត់បង់សំឡេងភាគច្រើនក្នុងរដ្ឋសភា។ លទ្ធផអវិជ្ជមាននេះបង្ហាញឲ្យឃើញថាប្រជាជនមិនពេញចិត្តការដឹកនាំរបស់លោក ត្រាំ ដែរ ដ្បិតថា វាជាប្រជាមតិសម្រាប់ការដឹកនាំរបស់លោកក្នុងពេលជិតពីរឆ្នាំមកនេះ។

ក្រៅពីបង្ហាញការទស្សន៍ទាយពីអនាគតនយោបាយលោកត្រាំ លោក មហាធៀ បានចាត់ទុកប្រធានាធិបតីអាមេរិកទី ៤៥ រូបនេះជាមនុស្សដែល«ពិបាកស្មានទុកមុន»។ លោក មហាធៀ និយាយបែបនេះ៖«យើងមិនធ្លាប់រំពឹងថា លោកនឹងទៅជួបផ្ទាល់ជាមួយមេដឹកនាំកូរ៉េខាងជើងនោះឡើយ។ ក្រោយមក លោកបានទៅជួប….ហើយនៅពេលខ្លះ លោកថា លោកមិនចង់ជួបវិញ។ ជាមួយលោកត្រាំ យើងមិនអាចរំពឹងទុកមុនបានឡើយ»។

ពេលសាកសួររឿងអវត្តមានរបស់លោក ត្រាំ នៅជំនួបកំពូលអាស៊ានឆ្នាំនេះ នាយករដ្ឋមន្ត្រីដែលត្រូវបានគេស្គាល់ថាជា «បិតានៃម៉ាឡេស៊ីយុគសម័យទំនើប» បានអះអាងថា លោកពុំខ្វល់ខ្វាយនឹងការសម្រេចមិនចូលរួមក្នុងជំនួបកំពូលអាស៊ាននៅសិង្ហបុរី របស់លោក ត្រាំ ឡើយ។ លើសពីនេះ លោកមហាធៀ ក៏បានទម្លាក់កំហុសលើលោកត្រាំថា ជាអ្នកបង្កភាពតានតឹងកាន់តែខ្លាំងឡើងៗរវាងក្រុងវ៉ាស៊ីនតោន និងក្រុងប៉េកាំង ជុំវិញសង្គ្រាមពាណិជ្ជកម្ម៕