ប្រធានាធិបតីអាមេរិក ដូណាល់ ត្រាំ នៅថ្ងៃទី១៣ ខែវិច្ឆិកា បានបន្តនិយាយវាយប្រហារប្រធានាធិបតីបារាំង អេម៉ានុយអែល ម៉ាក្រុង ជុំវិញមហិច្ឆតាបង្កើតកងទ័ពប្រចាំអឺរ៉ុប។ លោក ត្រាំ ដែលមិនពេញចិត្តនឹងគំនិតនេះ បានរំឭកបារាំងពីបរាជ័យក្នុងសម័យសង្គ្រាមលោកទាំងពីរលើក រហូតស្ថិតក្រោមការគ្រប់គ្រងរបស់អាល្លឺម៉ង់ទៅទៀត។ បំណងបង្កើតយោធាអឺរ៉ុបផ្ទាល់ ក៏ត្រូវបានអធិការបតីអាល្លឺម៉ង់ អែនជេឡា មឺហ្គែល គាំទ្រជាសាធារណៈដែរ និងចង់ធ្វើឲ្យដូចណាតូទៅទៀត។
មិនប៉ុន្មានថ្ងៃក្រោយចាកចេញពីបារាំង ប្រធានាធិបតីអាមេរិក ដូណាល់ ត្រាំ បាននិយាយរិះគន់ប្រធានាធិបតីបារាំង អេម៉ានុយអែល ម៉ាក្រុង យ៉ាងខ្លាំង។ ទំនងមិនទាន់អស់កំហឹងនឹងការប្រកាសបង្កើតទ័ពអឺរ៉ុបពីសំណាក់មេដឹកនាំបារាំងដែលទទួលបានការគាំទ្រពីអាល្លឺម៉ង់ហើយនោះ លោក ត្រាំ បានប្រើបណ្ដាញសង្គម Twitter វាយប្រហារលោក ម៉ាក្រុង ជាចំហ និងបានឌឺដងពីការធ្លាក់ប្រជាប្រិយភាពរបស់លោក ម៉ាក្រុង ផង។
ទំនាក់ទំនងរវាងលោក ត្រាំ និងលោក ម៉ាក្រុង ធ្លាប់តែល្អូកល្អឺនខ្លាំងនាពេលកន្លងមក ប៉ុន្តែបន្តិចម្ដងៗ ទំនាក់ទំនងនេះបែរជាឈានទៅរកភាពជូរចត់ទៅវិញ។ លោក ត្រាំ បានវាយប្រហារលោក ម៉ាក្រុង ម្ដងហើយមុនពេលធ្វើដំណើរទៅកាន់ក្រុងប៉ារីសដើម្បីចូលរួមខួបទី១០០ នៃការបញ្ចប់សង្គ្រាមលោកលើកទីពីរ។ ប៉ុន្តែពេលជួបគ្នានៅចុងសប្ដាហ៍មុន មេដឹកនាំទាំងពីរហាក់សម្រួលគ្នាវិញ និងចាត់ទុកការខ្វែងគំនិតគ្នាជារឿងយល់ច្រឡំប៉ុណ្ណោះ។
«លោក ម៉ាក្រុង ចង់បង្កើតកងទ័ពដើម្បីការពារអឺរ៉ុបប្រឆាំងអាមេរិក រុស្ស៊ី និងចិន។ តែតាមពិតអាល្លឺម៉ង់ឯណោះទេដែលមានអំណាចក្នុងសង្គ្រាមលោកលើកទី១ និងទី២។ តើវាអាចកើតឡើងចំពោះបារាំងតាមណា? ពួកគេបានចាប់ផ្ដើមរៀនភាសាអាល្លឺម៉ង់នៅប៉ារីសមុនអាមេរិកចូលជួយ។ បង់លុយឲ្យណាតូឬអត់!» នេះជាអត្ថន័យក្នុង Twitter របស់លោក ត្រាំ ដែលចង់សំដៅដល់បរាជ័យរបស់បារាំងក្នុងសង្គ្រាម ហើយអាល្លឺម៉ង់ក៏កាន់កាប់ទឹកដីមួយភាគធំផង។
លោក ត្រាំ ថា ម៉ាក្រុង យកបញ្ហាកងទ័ពអឺរ៉ុបដើម្បីស្ដារប្រជាប្រិយភាពខ្លួនឯង
ជារឿងភ្ញាក់ផ្អើលដែលមេដឹកនាប្រទេសមួយវាយប្រហារជាសាធារណៈលើមេដឹកនាំប្រទេសមួយទៀត ហើយដែលជាសម្ព័ន្ធមិត្តជិតស្និទ្ធទៅទៀត។ លោក ត្រាំ បានភ្ជាប់ករណីកងទ័ពប្រចាំអឺរ៉ុបនេះទៅនឹងបញ្ហាក្នុងស្រុករបស់បារាំង ការធ្លាក់ចុះប្រជាប្រិយភាពរបស់លោក ម៉ាក្រុង ហើយថែមទាំងរិះគន់គោលនយោបាយពាណិជ្ជកម្មរបស់បារាំងផង ជាពិសេសការលក់ស្រាតែម្ដង។ លោក ត្រាំ ចោទបារាំងថា យក់ពន្ធនាំចូលស្រាពីអាមេរិកខ្ពស់ ខណៈស្រាបារាំងលក់នៅអាមេរិកដោយស្រួល។
មេដឹកនាំអាមេរិករូបនេះអះអាងថា ប្រជាប្រិយភាពរបស់លោក ម៉ាក្រុង ធ្លាក់ដល់កម្រិតទាបបំ់ផុតត្រឹមតែ២៦ភាគរយ ហើយអត្រាអត់ការងារធ្វើវិញមានដល់ទៅ១០ភាគរយឯណោះ។ ដោយសារបែបនេះ លោក ត្រាំ ក៏វាយតម្លៃថា លោក ម៉ាក្រុង ចង់បង្វែរស្ថានការណ៍ទៅប្រធានបទផ្សេងក្នុងន័យស្ដារមុខមាត់របស់ខ្លួន។ យ៉ាងណាមិញ លោកក៏បានសរសើរបារាំងដែរថា ជាប្រទេសមានជាតិនិយមខ្លាំងជាងគេបំផុត និងមានប្រជាជនប្រកបដោយមោទកភាព។
ពាក្យរិះគន់របស់លោក ត្រាំ លើលោក ម៉ាក្រុង ក៏រងប្រតិកម្មខ្លាំងដែរ ខណៈពាក្យនេះកើតចេញថ្ងៃពេលដែលបារាំងកំពុងរំឭកខួបទី៣ នៃការវាយប្រហារភេរវកម្មក្នុងទីក្រុងប៉ារីសកាលពីឆ្នាំ២០១៥ ដែលសម្លាប់មនុស្ស១៣០នាក់។ អតីតរដ្ឋមន្ត្រីការបរទេសអាមេរិក John Kelly បានរំឭកលោក ត្រាំ ពីការជួយរបស់បារាំងក្នុងសង្គ្រាមឯករាជ្យ និងការស្លាប់របស់ទាហានបារាំងនៅអាហ្វហ្គានីស្ថាន។ លោក Kelly បន្តថា លោក ត្រាំ ស្រឡាញ់លោក គីម ជុងអ៊ុន តែបែរជាមាក់ងាយសម្ព័ន្ធមិត្តឯងទៅវិញ។
លោកស្រី មឺហ្គែល៖ អឺរ៉ុបត្រូវការពារខ្លួនឯងដោយដៃខ្លួនផ្ទាល់
បន្ទាប់ពីលោក ត្រាំ ចាត់ទុកគម្រោងបង្កើតកងទ័ពអឺរ៉ុបជារឿងមាក់ងាយអាមេរិកនោះ អធិការបតីអាល្លឺម៉ង់ អែនជែឡា មឺហ្គែល បានប្រកាសច្បាស់ៗថា អឺរ៉ុបត្រូវកងទ័ពមួយពិតប្រាកដ។ ក្នុងកិច្ចប្រជុំសភាអឺរ៉ុបក្នុងទីក្រុង Strasbourg មេដឹកនាំអាល្លឺម៉ង់រូបនេះក៏ស្នើបង្កើតក្រុមប្រឹក្សាសន្តិសុខអឺរ៉ុប ដែលនឹងទទួលបន្ទុកគោលនយោបាយសន្តិសុខ និងការការពាររបស់ទ្វីបមួយនេះ។ បើលេចជារូបរាងមែន សម្ព័ន្ធយោធាណាតូដែលដឹកមុខដោយអាមេរិក នឹងវីវរមិនខាន។
ចំពោះមុខសមាជិកសភាអឺរ៉ុបនៅថ្ងៃទី១៣ ខែវិច្ឆិកា លោកស្រី មឺហ្គែល និយាយថា បើមើលទៅការវិវត្តក្នុងរយៈពេលកន្លងទៅ អ្វីដែលសំខាន់ គឺការគិតគូរពីទស្សនៈវិស័យដើម្បីថ្ងៃមួយឈានដល់ការបង្កើតកងទ័ពអឺរ៉ុបដ៏ពិតប្រាកដ។ ប៉ុន្តែកងទ័ពរបស់អឺរ៉ុប មិនមែនជាការជំនួសឲ្យសម្ព័ន្ធយោធាមានស្រាប់ឡើយ តែនឹងដើរស្របគ្នាកិច្ចសហប្រតិបត្តិការអន្តរអាត្លង់ទិកក្នុងក្របខណ្ឌសម្ព័ន្ធយោធាណាតូរបស់អាមេរិក។
ជុំវិញគម្រោងបង្កើតយោធានេះដែរ ប្រធានគណៈកម្មការអឺរ៉ុប ហ្សង់-ក្លូដ ចាំងគើ ក៏បានដាក់លក្ខខណ្ឌដែរថា កងទ័ពអឺរ៉ុបនឹងត្រូវតែដើរស្របគ្នាជាមួយណាតូ ហើយមិនជាការប្រឆាំង ឬគូប្រកួតរបស់ណាតូឡើយ។ ទោះជាណាក្ដី លោកស្រី មើហ្គែល ចង់ឃើញអឺរ៉ុបមួយដែលមានសមត្ថភាពខ្លាំងដោយខ្លួនឯងដើម្បីការពារសុវត្ថិភាពតំបន់ទាំងមូល៕