ជាតិ
×![]()
ដោយ: ភួង វ៉ាន់ថា
ភ្នំពេញ៖ ភ្ញៀវទេសចរអន្តរជាតិបានមកទស្សនាប្រទេសកម្ពុជា ក្នុងរយៈពេល៩ខែ មានចំនួន៤,៣៧៦,០៣៣នាក់ កើនឡើង១១.៨ភាគរយ បើធៀបនឹងរយៈពេលដូចគ្នាក្នុងឆ្នាំ២០១៧។ ចំណែកខែកញ្ញា មានភ្ញៀវទេសចរចំនួន ៤១៣,៩៤៧នាក់។ នេះបើយោងតាមរបាយការណ៍របស់ក្រសួងទេសចរណ៍។
របាយការណ៍បានបង្ហាញថា ភ្ញៀវទេសចរអន្តរជាតិពីប្រទេសចំនួន១០ បានទស្សនាកម្ពុជាច្រើនជាងគេ ដោយក្នុងនោះប្រទេសចិនឈលំដាប់លេខ១ ,វៀតណាមលេខ២ ,ឡាវ, ថៃ កូរ៉េ, អាមេរិច, ជប៉ុន, ម៉ាឡេស៊ី, បារាំង និងចក្រភពអង់គ្លេស។ តំបន់ដែលមានភ្ញៀវទេសចរទៅទស្សនាច្រើនមានដូចជា ទីក្រុងភ្នំពេញ សៀមរាប តំបន់ឆ្នេរ និងតំបន់អេកូទេសចរណ៍។
របាយការណ៍ក្រសួងទេសចរ បានបញ្ជាក់ដូច្នេះថា៖«ភ្ញៀវទេសចរចិនមានចំនួន ១,៤៤០,៧២១ នាក់, ភ្ញៀវវៀតណាមមានចំនួន ៥៨៤,២៦៩ នាក់, ភ្ញៀវឡាវ ២៧៤,៥៩២នាក់, ថៃមានចំនួន ២៣៥, ៣២១នាក់, កូរ៉េមានចំនួន ២២២, ៩៨៩នាក់, អាមេរិកមានចំនួន ១៨១,៣២០នាក់, ជប៉ុន ១៤៥, ៣៥៣, ម៉ាឡេស៊ី ១៣៥,៣០១, បារាំង ១១៩,៤០៨, ចក្រភពអង់គ្លេស ១១៧,៨៨៧»។
ជាមួយគ្នានេះ ក៏មានពលរដ្ឋកម្ពុជា ចេញទៅទេសចរណ៍ក្រៅប្រទេសចំនួន ១,៤៥៩,៥០៧ នាក់ដែរ ហើយចំនួននេះ មានការកើនឡើង ១០.៦ភាគរយ បើធៀបនឹងរយៈពេលដូចគ្នានឹងឆ្នាំ២០១៧។ នេះបើតាមរបាយការណ៍ដដែល។
គួរបញ្ជាក់ថា ក្នុងឆ្នាំ២០១៧ មានភ្ញៀវទេសចរបរទេសមកទស្សនាប្រទេសកម្ពុជាចំនួន ៥,៦ លាននាក់។ កម្ពុជាគ្រោងនឹងទទួលទេសចរអន្តរជាតិប្រមាណ ៦.២លាននាក់ សម្រាប់ឆ្នាំ២០១៨។ ចំណែកឆ្នាំ២០២០ កម្ពុជា ដាក់ទិសដៅទទួលទេសចរអន្តរជាតិ ៧លាននាក់ ជាមួយនឹងចំណូលទេសចរណ៍ប្រមាណ ៥ពាន់លានដុល្លារ និងបង្កើតការងារ-មុខរបរដោយផ្ទាល់ជិត ១លាននាក់។ រីឯឆ្នាំ២០២៥ កម្ពុជា គ្រោងនឹងទទួលទេសចរអន្តរជាតិ១០លាននាក់ មុននឹងឡើងដល់១៤លាននាក់ នៅឆ្នាំ២០៣០៕
Tag:
កម្ពុជា
ភ្ញៀវទេសចរ
© រក្សាសិទ្ធិដោយ thmeythmey.com
