ជាតិ
នយោបាយជាតិ
លោក កឹម សុខា ជួបម្តាយ នៅផ្ទះ ក្រោយពីលោក ត្រូវបានដោះលែងពីពន្ធនាគារ កាលពីអំឡុងខែកញ្ញា ឆ្នាំ២០១៨។ រូបពី AFP
×![]()
ដោយ: ម៉ៅ សុផា
ភ្នំពេញ៖ តាមច្បាប់ ជនត្រូវចោទ នឹងត្រូវដោះលែងឬក៏បញ្ជូនទៅជំនុំជម្រះ ក្រោយពីប្រើពេលយ៉ាងយូរត្រឹម១៨ខែ ក្នុងការស៊ើបសួរ។ តែចំពោះលោក កឹម សុខា តុលាការ អាចប្រើពេលលើសពី១៨ខែ ដើម្បីដាក់លោកឲ្យរស់នៅក្នុងផ្ទះ និងស្ថិតនៅក្រោមការត្រួតពិនិត្យ។
បច្ចុប្បន្ន លោក កឹម សុខា មានឈ្មោះជាជនត្រូវចោទ ដែលត្រូវបានអនុញ្ញាតឲ្យនៅក្រៅឃុំ។ តែលោក ត្រូវស្ថិតនៅក្រោមការគ្រប់គ្រងនិងការឃ្លាំមើលរបស់លោក គី ឫទ្ធី ចៅក្រមស៊ើបសួរនៃសាលាដំបូងរាជធានីភ្នំពេញ។
បើលោក កឹម សុខា ជាប់ឃុំក្នុងពន្ធនាគារ គឺលោក មិនត្រូវជាប់ឃុំលើសពី១៨ខែឡើយ។ រយៈពេល១៨ខែនៃការឃុំខ្លួនក្នុងពន្ធនាគារ ចៅក្រមស៊ើបសួរ ត្រូវតែចេញដីកាមួយ ដែលហៅថាដីកាដំណោះស្រាយ។
ដីកាដំណោះស្រាយរបស់ចៅក្រមស៊ើបសួរ តែងមានសេចក្តីសម្រេចពីរយ៉ាង គឺទម្លាក់បទចោទចេញពីជនត្រូវចោទ ហើយដោះលែងឲ្យមានសេរីភាពឡើងវិញ ឬ បើមិនដូច្នេះទេ ត្រូវបញ្ជូនសំណុំរឿងទៅជំនុំជម្រះ។
ប៉ុន្តែ រយៈពេលនៃការឃុំលោក កឹម សុខា មិនអាចយកនិយាយទៀតឡើយ ព្រោះពេលនេះ លោកមិនមែនមានឈ្មោះជាជនត្រូវចោទ ដែលជាប់ឃុំក្នុងពន្ធនាគារនោះទេ។ លោក ជាជនត្រូវចោទ ដែលត្រូវបានដោះលែងឲ្យនៅក្រៅឃុំជាបណ្តោះសន្ន។ គ្រាន់តែថា លោកជាប់កាតព្វកិច្ចដែលចៅក្រមស៊ើបសួរ ដាក់ឲ្យអនុវត្ត។
អ្វីដែលចៅក្រមស៊ើបសួរដាក់ឲ្យលោក កឹម សុខា អនុវត្តនោះ គឺការមិនឲ្យចេញទៅណាឆ្ងាយពីផ្ទះ មិនឲ្យជួបជនបរទេសដែលពាក់ព័ន្ធនឹងសំណុំរឿង និងមិនឲ្យជួបមន្ត្រី ឬអ្នននយោបាយនៃអតីតគណបក្សប្រឆាំង។
អ្វីដែលចៅក្រមស៊ើបសួរដាក់ឲ្យលោក កឹម សុខា អនុវត្តនោះ គឺការមិនឲ្យចេញទៅណាឆ្ងាយពីផ្ទះ មិនឲ្យជួបជនបរទេសដែលពាក់ព័ន្ធនឹងសំណុំរឿង និងមិនឲ្យជួបមន្ត្រី ឬអ្នននយោបាយនៃអតីតគណបក្សប្រឆាំង។
កាលពីថ្ងៃទី១៩ ខែកញ្ញា ឆ្នាំ២០១៨ អ្នកនាំពាក្យនៃអយ្យការអមសាលាដំបូងរាជធានីភ្នំពេញ បានចេញសេចក្តីថ្លែងការណ៍មួយពន្យល់ថា៖«ករណីលោក កឹម សុខា ដែលដាក់ឲ្យស្ថិតនៅក្រោមការត្រួតពិនិត្យតាមផ្លូវតុលាការនេះ ពុំមែនជាករណីនៃការឃុំខ្លួនក្នុងផ្ទះនោះទេ»។
មជ្ឈដ្ឋានខ្លះ ជាពិសេសមន្ត្រីអតីតគណបក្សប្រឆាំងយល់ឃើញថា លោក កឹម សុខា មិនទាន់ត្រូវបានដោះលែងឲ្យមានសេរីភាពពិតប្រាកដឡើយ ពោលគឺលោក កឹម សុខា គ្រាន់តែត្រូវបានប្តូរពីការឃុំខ្លួនក្នុងពន្ធនាគារ មកជាការឃុំខ្លួនក្នុងផ្ទះប៉ុណ្ណោះ។
ករណីរបស់លោក កឹម សុខា កំពុងក្លាយជាប្រធានបទមួយដែលត្រូវបានគេជជែកគ្នាយ៉ាងផុសផុល ក្រោយពីលោក សម រង្ស៊ី និង សម្តេច ហ៊ុន សែន យកមកធ្វើជាល្បែងភ្នាល់គ្នា។
លោក សម រង្ស៊ី អះអាងថា លោកសុខចិត្តដើរចូលស្រុកឲ្យសមត្ថកិច្ចចាប់ខ្លួន បើលោក កឹម សុខា មិនត្រូវបានដោះលែង នៅថ្ងៃទី២៩ ខែធ្នូ ឆ្នាំ២០១៨ ឬក៏យ៉ាងយូរបំផុត នៅត្រឹមថ្ងៃទី៣ ខែមីនា ឆ្នាំ២០១៩។ ជាការឆ្លើយតបនឹងលោក សម រង្ស៊ី សម្តេច ហ៊ុន សែន បានប្រកាសថា លោកនឹងចុះចេញពីតំណែង បើលោក កឹម សុខា ត្រូវបានដោះលែងនៅក្នុងអំឡុងពេលនេះ។
នៅពេលដែលលោក សម រង្ស៊ី យល់ថា លោក កឹម សុខា អាចត្រូវបានដោះលែងនៅថ្ងៃទី២៩ ខែធ្នូ ឆ្នាំ២០១៨ នោះគឺដោយសារតែ ថ្ងៃនោះគឺជាទិវានយោបាយឈ្នះ-ឈ្នះរបស់គណបក្សប្រជាជនកម្ពុជា និយាយឲ្យចំគឺរបស់សម្តេច ហ៊ុន សែន។ តែបើនៅក្នុងទិវានយោបាយឈ្នះ-ឈ្នះ លោក កឹម សុខា នៅតែមិនត្រូវបានដោះលែង លោក សម រង្ស៊ី ជឿជាក់ថា លោក កឹម សុខា នឹងត្រូវបានដោះលែងនៅថ្ងៃទី៣ ខែមីនា ឆ្នាំ២០១៩ ឯណោះវិញ។ លោក សម រង្ស៊ី សំអាងថា ច្បាប់នៅកម្ពុជា ពុំអនុញ្ញាតឲ្យឃុំលោក កឹម សុខា ដែលជាជនត្រូវចោទឲ្យលើសពី១៨ខែឡើយ។ គិតពីថ្ងៃចាប់លោក កឹម សុខា រហូតដល់ថ្ងៃទីថ្ងៃ៣ ខែមីនា ឆ្នាំ២០១៩ នឹងមានរយៈពេល១៨ខែ។
លោក សម រង្ស៊ី អាចគិតត្រឹមត្រូវ បើលោក កឹម សុខា ជាប់ឃុំក្នុងពន្ធនាគារមែននោះ។ ប៉ុន្តែ លោក កឹម សុខា មិនមែនជាប់ឃុំឡើយ។ ហេតុដូច្នេះ បើទោះបីជាផុតថ្ងៃទី៣ ខែមីនា ឆ្នាំ២០១៩ ចៅក្រមស៊ើបសួរ នៅតែមិនដកបម្រាមចេញពីលោក កឹម សុខា ហើយបន្តដាក់លោក ឲ្យស្ថិតនៅក្រោមការត្រួតពិនិត្យ ក៏មិនខុសច្បាប់ដែរ។
ដោយខ្លាចមហាជនយល់ច្រឡំនឹងការលើកឡើងរបស់លោក សម រង្ស៊ី អ្នកនាំពាក្យក្រសួងយុត្តិធម៌ បានចេញសេចក្តីថ្លែងការណ៍ កាលពីថ្ងៃទី១១ ខែវិច្ឆិកា ឆ្នាំ២០១៨ ដោយបកស្រាយយ៉ាងដូច្នេះថា៖«[….] លោក កឹម សុខា ត្រូវបានដាក់ឲ្យស្ថិតនៅក្រោមការត្រួតពិនិត្យតាមផ្លូវតុលាការ និងមិនស្ថិតក្នុងការឃុំខ្លួនបណ្តោះអាសន្ន ដែលទាក់ទងនឹងរយៈពេលយ៉ាងច្រើន១៨ខែនោះឡើយ […..]»។
អ្នកស្រី ម៉េង សុភារី មេធាវីម្នាក់របស់លោក កឹម សុខា បានលើកឡើងថា ការដោះលែងជនត្រូវចោទ ឲ្យនៅក្រៅឃុំបណ្តោះអាសន្ន ប៉ុន្តែដាក់ឲ្យស្ថិតនៅក្រោមការត្រួតពិនិត្យតាមផ្លូវតុលាការ គឺមានចែងក្នុងមាត្រា២១៨ និង មាត្រា២២៣ នៃក្រមនីតិវិធីព្រហ្មទណ្ឌ។ អ្នកស្រី បានសរសេរលើគណនីហ្វេសប៊ុកយ៉ាងដូច្នេះថា៖«វា មានន័យថា ជនត្រូវចោទរូបនោះ ត្រូវបានដោះលែងឲ្យនៅក្រៅឃុំបណ្តោះអាសន្ន ប៉ុន្តែមិនមានសេរីភាពពេញលេញ ពីព្រោះមានភ្ជាប់កាតព្វកិច្ចមួយចំនួន ដែលកំណត់ដោយចៅក្រមស៊ើបសួរ ដូចជា មិនឲ្យជនត្រូវចោទចេញក្រៅព្រំប្រទល់ដែនដីកំណត់ ឬ មិនឲ្យជួបបុគ្គលមួយចំនួនផ្សងទៀតជាដើម»។
អ្នកស្រី ម៉េង សុភារី បានប្រាប់សារព័ត៌មានថ្មីៗ តាមទូរសព្ទថា ការដាក់ជនត្រូវចោទ ឲ្យស្ថិតនៅក្រោមការត្រួតពិនិត្យរបស់តុលាការ ដូចជាមិនកំណត់ពីពេលវេលាឡើយ។ អ្នកស្រី លើកឡើងបែបនេះថា៖«ខ្ញុំ ដូចអត់ដែលឃើញច្បាប់យើង ចែងពីថេរវេលាទេ។ តាមបទពិសោធរបស់ខ្ញុំកន្លងមក កូនក្តីខ្ញុំខ្លះ ជួបករណីបែបហ្នឹង គឺតុលាការ ឲ្យនៅក្រៅឃុំ តែជាប់កាតព្វកិច្ច ដូចជា មិនឲ្យចេញពីខេត្តរបស់គាត់ ឬមិនឲ្យចេញទៅក្រៅប្រទេស ជាដើម។ មានអ្នកខ្លះ ជាប់កាតព្វកិច្ចដល់ទៅ២-៣ឆ្នាំ ក៏មិនទាន់រួចផង ហើយតុលាការ ក៏មិនអត់កំណត់ថាប៉ុន្មានឆ្នាំដែរ»។
«ចុះឧទាហរណ៍ថា ចៅក្រមស៊ើបសួរ កំណត់ឲ្យឯកឧត្តម កឹម សុខា រស់នៅក្នុងផ្ទះរហូតដល់ទៅ៤-១០ឆ្នាំ ដោយលើកហេតុផលថា ដើម្បីបន្តការស៊ើបសួរ តើគិតយ៉ាងម៉េចទៅវិញ?» អ្នកស្រីមេធាវី បានឆ្លើយយ៉ាងដូច្នេះថា៖«មិនយូរដល់ថ្នាក់ហ្នឹងពេកទេ។ ចំពោះករណីរបស់ឯកឧត្តម កឹម សុខា បើចៅក្រមស៊ើបសួរ បន្តស៊ើបសួរយូរពេក យើង នឹងដាក់ពាក្យ ដើម្បីសុំឲ្យបិទការស៊ើបសួរ ឬក៏សុំទម្លាក់បទចោទតែម្តង»។
ចំណែកលោក ឡៅ ម៉ុងហៃ អ្នកតាមដានស្ថានការណ៍នយោបាយនៅកម្ពុជា បានបញ្ចេញមតិថា បើចង់រួចផុតការឃុំឃាំង លោក កឹម សុខា គួរតែសុំតុលាការ ទៅជាប់ឃុំក្នុងពន្ធនាគារវិញ។ លោក បានបង្ហោះសារលើគណនីហ្វេសប៊ុកបែបនេះថា៖«ឯកឧត្តម កឹម សុខា ត្រូវបដិសេធដីកាដាក់ក្រោមការត្រួតពិនិត្យរបស់តុលាការ [ហើយ] សុំជាប់ឃុំក្នុងគុកវិញ ទើបអាចបានដោះលែង ក្រោមការឃុំឃាំងយ៉ាងយូរ១៨ខែ»។
យ៉ាងណាក៏ដោយ ក្នុងអំឡុងពេលនេះ ពោលគឺនៅមុនថ្ងៃទី៣ ខែមីនា ឆ្នាំ២០១៩ ចៅក្រមស៊ើបសួរ នៅតែអាចសម្រេចសេចក្តីអ្វីមួយលើសំណុំរឿងរបស់លោក កឹម សុខា ដោយមិនពាក់ព័ន្ធនឹងការភ្នាល់រវាងលោក សម រង្ស៊ី និង សម្តេច ហ៊ុន សែន ឬក៏ឥទ្ធិពលរបស់បុគ្គលនិងអន្តរជាតិណាឡើយ (បើតុលាការ ពិតជាឯករាជ្យ)។ បើចង់ទម្លាក់បទចោទ ហើយដកបម្រាមចេញពីលោក កឹម សុខា ដើម្បីឲ្យលោក មានសេរីភាពពេញលេញ ក៏ចៅក្រមស៊ើបសួរអាចសម្រេចបានដែរ។ តែបើចង់បញ្ជូនសំណុំរឿងរបស់លោក ទៅជំនុំជម្រះ ក៏ចៅក្រមស៊ើបសួរ អាចសម្រេចបានដូចគ្នា។
សូមរម្លឹកថា លោក កឹម សុខា ត្រូវបានចាប់ខ្លួនកាលយប់ថ្ងៃទី២ ឈានចូលថ្ងៃទី៣ ខែកញ្ញា ឆ្នាំ២០១៧ ក្រោមការសង្ស័យថា បានសហការជាមួយបរទេស ដើម្បីផ្តួលរំលំរដ្ឋាភិបាលកម្ពុជា។ រហូតដល់ថ្ងៃទី១០ ខែកញ្ញា ឆ្នាំ២០១៨ លោក ក៏ត្រូវបានចៅក្រមស៊ើបសួរ សម្រេចដោះលែងឲ្យចេញពីពន្ធនាគារត្រពាំងផ្លុង ក្នុងខេត្តត្បូងឃ្មុំ ហើយឲ្យទៅរស់នៅក្នុងផ្ទះ ដោយភ្ជាប់ជាមួយនឹងលក្ខខណ្ឌយ៉ាងតឹងរឹង៕
Tag:
កឹម សុខា
ច្បាប់
© រក្សាសិទ្ធិដោយ thmeythmey.com
