ភា សុថៃ ក្លាយជាជើងឯកកីឡាវាយសីប្រចាំឆ្នាំ២០១៨ ក្រោយឈ្នះកីឡាករឆ្នើមៗ

កីឡាជាតិ

ជាតិ

ភា សុថៃ ក្លាយជាជើងឯកកីឡាវាយសីប្រចាំឆ្នាំ២០១៨ ក្រោយឈ្នះកីឡាករឆ្នើមៗ

15, Nov 2018 , 7:19 pm

រូបភាព

ដោយ:

កីឡាករ ភា សុថៃ មកក្លិបក្រសួងសេដ្ឋកិច្ចនិងហិរញ្ញវត្ថុបានឈ្នះមេដាយមាសជាលើកដំបូង ពីការប្រកួតកីឡាវាយសីជ្រើសរើសជើងឯកថ្នាក់ជាតិប្រចាំឆ្នាំ២០១៨ ក្រោយយកឈ្នះកីឡាករ ម៉ែន សារ័ត្ន នៅវគ្គផ្តាច់ព្រ័ត្រ។ ការឈ្នះមេដាយមាសជាជោគជ័យមួយ តែការឈ្នះកីឡាករ វ៉ាត វ៉ាន់ធន់ ដែលទទួលបានមេដាយមាសក្នុងការប្រកួតយុវជនចម្រុះជាតិសាសន៍នៅអាហ្សង់ទីនជាគោលដៅរបស់ សុថៃ ដែលបានប៉ង។

ការប្រឹងប្រែងហ្វឹកហាត់ជាមួយការកំណត់គោលដៅច្បាស់លាស់ ធ្វើឲ្យកីឡាករ ភា សុថៃ ទទួលបានជោគជ័យក្នុងការប្រកួតកីឡាវាយសីជ្រើសរើសជើងឯកថ្នាក់ជាតិប្រចាំឆ្នាំ២០១៨ តាមរយៈការឈ្នះមេដាយមាសលើវិញ្ញាសាវាយទោលអាយុក្រោម១៨ឆ្នាំ។ មេដាយមាសលើកដំបូងរបស់ សុថៃ កើតឡើងក្រោយរូបគេយកឈ្នះកីឡាករ ម៉ែន សារ័ត្ន យ៉ាងតានតឹងនៅវគ្គផ្តាច់ព្រ័ត្រកាលពីថ្ងៃទី១៤ ខែវិច្ឆិកា ឆ្នាំ២០១៨ នៅទីលានវាយសីក្នុងពហុកីឡដ្ឋានជាតិ។

មុនឡើងដល់វគ្គផ្តាច់ព្រ័ត្រ កីឡាករមកពីក្លិបក្រសួងសេដ្ឋកិច្ចនិងហិរញ្ញវត្ថុរូបនេះ បានទម្លាក់កីឡាករ វ៉ាត វ៉ាន់ធន់ ម្ចាស់មេដាយមាសពីការប្រកួតចម្រុះជាតិសាសន៍ក្នុងព្រឹត្តិការណ៍យុវជនអូឡាំពិកនៅអាហ្សង់ទីននៅវគ្គពាក់កណ្តាលផ្តាច់ព្រ័ត្រ។ សម្រាប់ សុថៃ ការឈ្នះមេដាយមាសជារឿងមួយ តែការឈ្នះ វ៉ាន់ធន់ គឺជាគោលបំណងដ៏សំខាន់សម្រាប់គេ។

«ខ្ញុំធ្លាប់ចាញ់កីឡាករ វ៉ាត វ៉ាន់ធន់ កាលពីឆ្នាំមុន។ ប៉ុន្តែដោយសារការខិតខំហ្វឹកហាត់ធ្វើឲ្យខ្ញុំអាចសងសឹកកីឡាករ វ៉ាត វ៉ាន់ធន់ បានសម្រេចនៅឆ្នាំនេះ។ ខ្ញុំមានអារម្មណ៍សប្បាយរីករាយ ដែលខ្ញុំអាចធ្វើបានដូចថ្ងៃនេះ ព្រោះក្នុងអំឡុងពេលហ្វឹកហាត់គោលបំណងរបស់ខ្ញុំ គឺចង់ឈ្នះរូបគេ»។ កីឡាករ ភា សុថៃ បានបញ្ជាក់ដូច្នេះ ហើយបានបន្ថែមថា រូបគេនឹងបង្កើនការហ្វឹកហាត់ឲ្យកាន់តែខ្លាំងទ្វេដង ដើម្បីចាប់យកឱកាសទៅប្រកួតនៅលើឆាកអន្តរជាតិ ពិសេសការប្រកួតស៊ីហ្គេមឆ្នាំ២០២៣ នៅកម្ពុជា។

សម្រាប់កីឡាករ វ៉ាត វ៉ានធន់ ការបែងចែកពេលវេលាមិនបានច្បាស់លាស់រវាងការសិក្សា និងការហ្វឹកហាត់ជាកត្តានាំឲ្យរូបគេធ្វើមិនបានល្អក្នុងការប្រកួតជើងឯកនៅឆ្នាំនេះ។ ក្រោយបរាជ័យក្រោមថ្វីដៃរបស់កីឡាករ ភា សុថៃ នៅវគ្គពាក់កណ្តាលផ្តាច់ព្រ័ត្រធ្វើឲ្យ វ៉ាន់ធន់ អស់ឱកាសឡើងទៅប្រជែងដណ្តើមជើងឯក ដោយទទួលបានត្រឹមចំណាត់ថ្នាក់លេខ៣តែប៉ុណ្ណោះ។

ក្នុងបទសម្ភាសជាមួយអ្នកសារព័ត៌មាន កីឡាករមកពីខេត្តកំពង់ឆ្នាំងរូបនេះបានរៀបរាប់ដូច្នេះថា៖«ចំពោះការប្រកួតដែលខ្ញុំទទួលបានត្រឹមលេខ៣នេះ គឺដោយសារឆ្នាំនេះជាឆ្នាំខ្ញុំត្រូវប្រឡងបាក់ឌុប ជាហេតុធ្វើឲ្យបែងចែងពេលហ្វឹកហាត់មិនបានច្បាស់លាស់ ដែលនាំឲ្យកម្លាំង និងបច្ចេកទេសខ្ញុំធ្លាក់ចុះ»។

ទោះបីទទួលបានត្រឹមចំណាត់ថ្នាក់លេខ៣ក៏ដោយ វ៉ាន់ធន់ មិនបានបង្ហាញអារម្មណ៍អន់ចិត្តនោះទេចំពោះលទ្ធផលនេះ ដោយរូបគេយល់ថា ការប្រកួតតែងតែមានឈ្នះនិងចាញ់ជារឿងធម្មតា។ លើសពីនេះរូបគេប្តេជ្ញាថា ខ្លួននឹងបង្កើនការហ្វឹកហាត់ទ្វេដងក្នុងការពង្រឹងសមត្ថភាព ដើម្បីត្រៀមប្រជែងដណ្តើមជើងឯកនៅឆ្នាំក្រោយៗទៀត។

ក្រោយឆ្លងកាត់ការប្រកួតយ៉ាងស្វិតស្វាញអស់រយៈពេល៤ថ្ងៃក្លិបក្រសួងសេដ្ឋកិច្ចនិងហិរញ្ញវត្ថុឈរលេខ១ក្រោយឈ្នះមេដាយមាស៤ និងប្រាក់៣ ខណៈក្លិបកំពង់ឆ្នាំងទទួលបានលេខ២ក្រោយឈ្នះមេដាយមាស២ ប្រាក់១ និងសំរឹទ្ធ៣ និងសមាគមន៍ក្រសួងមហាផ្ទៃឈរចំណាត់ថ្នាក់លេខ៣ បន្ទាប់ពីបានមេដាយមាស២ ប្រាក់១ និងសំរឹទ្ធ២៕