កីឡាជាតិ
ជាតិ
ពានរង្វាន់បាល់ទាត់ចំនួន២២ នឹងប្រគល់ជូនម្ចាស់ជ័យលាភីក្នុងកម្មវិធី Award Night
កម្មវិធី Award Night កាលពីឆ្នាំ២០១៧, រូបភាពពី CNCC
×![]()
ពានរង្វាន់បាល់ទាត់នៃក្របខណ្ឌលីគកំពូល, ពានសម្តេច ហ៊ុន សែន និងពានរង្វាន់ផ្សេងៗសរុបចំនួន២២រង្វាន់ នឹងប្រគល់ជូនម្ចាស់ជ័យលាភីនៅក្នុងកម្មវិធី Cambodian Football Award នៅថ្ងៃទី១៦ ខែវិច្ឆិកា ឆ្នាំ២០១៨ នេះ។ ក្រៅពីការប្រគល់រង្វាន់ ក៏មានការប្រគំតន្ត្រីក្រោមវត្តមានតារាចម្រៀងល្បីៗរបស់កម្ពុជាផងដែរ។
លោក ឆាំង ពិសិដ្ឋ លេខាប្រតិបត្តិនៃគណៈកម្មការប្រកួតបាល់ទាត់ជាតិកម្ពុជា(CNCC)បានបញ្ជាក់ថា CNCC នឹងប្រគល់ពានរង្វាន់បាល់ទាត់ចំនួន២២ ជូនដល់ម្ចាស់ជ័យលាភី ដែលបានទន្ទឹងរង់ចាំអស់រយៈពេលជាច្រើនសប្តាហ៍។ ការប្រគល់ជូននេះ នឹងធ្វើឡើងក្នុងកម្មវិធី Cambodian Football Award នៅថ្ងៃទី១៦ ខែវិច្ឆិកា ឆ្នាំ២០១៨ នៅមជ្ឈមណ្ឌលពាណិជ្ជកម្មសែនសុខ។
លោក ឆាំង ពិសិដ្ឋ លេខាប្រតិបត្តិ CNCC ក្នុងសន្និសីទសារព័ត៌មានស្តីពី Award Night កាលពីកន្លងទៅ
ពានរង្វាន់ដែលត្រូវប្រគល់ជូនទាំងនោះរួមមានក្រុមជើងឯក ក្រុមលេខ២ ក្រុមលេខ៣, ក្រុម Fair Play, កីឡាករ គ្រូបង្វឹក និងអ្នកចាំទីល្អ, កីឡាកររកបានគ្រាប់បាល់ច្រើនជាងគេ និងក្រុមអាជ្ញាកណ្តាលល្អ នៃពានរង្វាន់ក្របខណ្ឌលីគកំពូលនិងពានសម្តេច ហ៊ុន សែន ប្រចាំឆ្នាំ២០១៨។ បន្ថែមលើនេះមានពានរង្វាន់សម្រាប់កីឡាករ គ្រូបង្វឹក និងអ្នកគាំទ្រប្រជាប្រិយ, កីឡាករសង្ហាជាងគេ និងអ្នកថតរូបល្អជាងគេ ហើយក៏មានពានរង្វាន់៥ផ្សេងទៀតផងដែរ ដែល CNCC សុំមិនបង្ហាញ។
សម្រាប់ការចូលរួមទស្សនាកម្មវិធី Cambodian Football Award គឺតម្រូវឲ្យទស្សនិកជនទិញសំបុត្រក្នុងតម្លៃ៣ដុល្លារក្នុងម្នាក់ ដើម្បីទទួលបានអាហារសម្រន់ និងភេសជ្ជៈផ្សេងៗ។ ក្រៅពីអាហារសម្រន់ និងទស្សនាការប្រគល់រង្វាន់ដល់ក្រុម និងកីឡាករក្នុងចិត្ត ទស្សនិកជនអាចទស្សនាការប្រគំតន្ត្រី និងថតរូបអនុស្សាវរីយ៍ជាមួយរូបភាពផ្សេងៗជាដើម។
នេះជាលើកទី២ហើយដែលគណៈកម្មការប្រកួតបាល់ទាត់ជាតិរៀបចំឲ្យមានកម្មវិធីនេះឡើង ខណៈលើកទី១រៀបចំនៅណាហ្គាវើល តែពេលនោះពុំមានការលក់សំបុត្រនោះទេ។ ទោះបីយ៉ាងនេះក្តី លោក ឆាំង ពិសិដ្ឋ រំពឹងថា ទស្សនិកជនយ៉ាងច្រើនកុះករនឹងមកចូលរួមនៅឆ្នាំនេះ។ លោកបន្ថែមថា នៅឆ្នាំក្រោយៗទៀត CNCC នឹងរៀបចំឲ្យមានទ្រង់ទ្រាយកាន់តែធំជាងនេះ បើសិនមានអ្នកចូលរួមច្រើននៅឆ្នាំនេះ៕
Tag:
បាល់ទាត់
ឆាំង ពិសិដ្ឋ
Award Night
© រក្សាសិទ្ធិដោយ thmeythmey.com
