អាមេរិក ចាប់ដៃអូស្ត្រាលីបើកមូលដ្ឋានទ័ពថ្មីនៅ ប៉ាពូអាស៊ី នូវែលហ្គីណេ ទប់ទល់ចិន

អន្តរជាតិ

អាមេរិក ចាប់ដៃអូស្ត្រាលីបើកមូលដ្ឋានទ័ពថ្មីនៅ ប៉ាពូអាស៊ី នូវែលហ្គីណេ ទប់ទល់ចិន

17, Nov 2018 , 9:19 pm

រូបភាព

អនុប្រធានាធិបតីអាមេរិក ម៉ៃ ផេន នៅវេទិកាAPEC

ដោយ: សៅ ផលនិស្ស័យ (Sao Phal Niseiy)

អាមេរិកសប្តាហ៍នេះបានប្រកាសសាធារណថា ខ្លួននឹងបង្កើតមូលដ្ឋានទ័ពនៅប៉ាពូ អាស៊ីនូវែលហ្គីណេ នៅពេលខាងមុខ។ អាមេរិកនឹងចូលរួមជាមួយសម្ព័ន្ធមិត្តខ្លួនអូស្ត្រាលីក្នុងការអភិវឌ្ឍមូលដ្ឋានទ័ពជើងទឹកយុទ្ធសាស្ត្រនេះ។

ថ្ងៃសៅរ៍ទី ១៧ ខែវិច្ឆិកា មុនកិច្ចប្រជុំសហប្រតិបត្តិការសេដ្ឋកិច្ចអាស៊ីប៉ាស៊ីហ្វិកមកដល់នៅប៉ាពូ អាស៊ីនូវែលហ្គីណេ តំណាងប្រធានាធិបតីអាមេរិក ដូណាល់ ត្រាំ អនុប្រធានាធិបតីលោក ម៉ៃ ផេន បានប្រកាសថា អាមេរិកនឹងចូលរួមជាមួយអូស្ត្រាលីដើម្បីបើកដំណើរការមូលដ្ឋានទ័ពជើងទឹក Lombrum។

ទីភ្នាក់ងារព័ត៌មាន AFP បានដកស្រង់សម្តីលោក ម៉ៃ ផេន ដូច្នេះ៖« អាសមេរិកនឹងសហការជាមួយប៉ាពូអាស៊ី នូវែលហ្គីណេ និងអូស្ត្រាលីក្នុងគម្រោងរួមគ្នានៅមូលដ្ឋានកងទ័ពជើងទឹក Lombrum។ យើងនឹងធ្វើការងារជាមួយប្រទេសទាំងពីរដើម្បីការពារអធិបតេយ្យ និងសិទ្ធិគ្រប់គ្រងដែនសមុទ្ររបស់កោះប៉ាស៊ីហ្វិក»។

ការប្រកាសបើកដំណើរការមូលដ្ឋានទ័ពជើងទឹករបស់ខ្លួននៅកោះប៉ាស៊ីហ្វិកនេះមិនមែនជារឿងគួរឲ្យភ្ញាក់ផ្អើលឡើយ ដ្បិតវាមានការលេចចេញព័ត៌មានជុំវិញការចរចាគ្នារវាងអាមេរិកនិងរដ្ឋាភិបាលប៉ាពូអាស៊ី នូវែលហ្គីណេច្រើនដែរ។ កាលពីខែសីហា មេទ័ពអាមេរិកប្រចាំទីបញ្ជាការកងទ័ពឥណ្ឌូប៉ាស៊ីហ្វិក. Philip Davidson បានទៅទស្សនកិច្ចនៅរដ្ឋធានី Port Moresby ហើយលោកបានជួបពិភាក្សាជាមួយមេដឹកនាំប៉ាពូអាស៊ី នូវែលហ្គីណេដែរ។

មូលដ្ឋានទ័ពនេះត្រូវបានសាងសង់ឡើងដោយកងទ័ពអាមេរិកតាំងពីឆ្នាំ ១៩៤៤ ម្ល៉េះនៅលើកោះ Manus ដែលមានទំហំប្រហែល ២០០០ គីឡូម៉ែការ៉េដែលស្ថិតនៅភាគខាងជើងកោះ New Britain។ កាលនោះអាមេរិកក៏បានសង់ផ្លូវរត់សម្រាប់យន្តហោះមានចម្ងាយ ២,៧ គីឡូម៉ែត្រ និងទីតាំងស្នាក់អាស្រ័យនៅសម្រាប់កងទ័ពចំណុះដល់រាប់ម៉ឺននាក់ផង។ ប៉ុន្មានឆ្នាំចុងក្រោយនេះ កោះ Manus ត្រូវបានអូស្ត្រាលីប្រើប្រាស់ជាមជ្ឈមណ្ឌឃុំខ្លួនជនអន្តោប្រវេសន៍ខុសច្បាប់ដែលប៉ងចូលទឹកដីអូស្ត្រាលី។

យ៉ាងណាក៏ដោយចុះ ការឈានទៅបើកមូលដ្ឋានទ័ពថ្មីរបស់អាមេរិកដោយចាប់ដៃអូស្ត្រាលីជាសម្ព័ន្ធមិត្តនេះជាការឆ្លើយតបនឹងការកើនឡើងនៃឥទ្ធិពលរបស់ចិនមិនឈប់ឈរនៅក្នុងតំបន់ជាពិសេសតាមបណ្តាកោះប៉ាស៊ីហ្វិករួមទាំងប៉ាពូអាស៊ី នូវែលហ្គីណេផង។ អូស្ត្រាលីភ័យបារម្ភចំពោះការកើនឡើងនៃឥទិ្ធពលរបស់ចិនក្នុងតំបន់ និងបារម្ភផងដែរថា ចិននឹងអាចបើកមូលដ្ឋានទ័ពរបស់ខ្លួននៅទីនោះផង។ បើតាមរបាយការណ៍វិទ្យាស្ថាន Lowy ចិនផ្តល់ជំនួយយ៉ាងហោចណាស់ ២,៣ពាន់លានដុល្លារចាប់ពីឆ្នាំ ២០០៦ ដល់បណ្តាប្រទេសក្នុងតំបន់ ហើយបន្តចំណាយទុនកាន់តែច្រើនវិនិយោគក្នុងតំបន់នេះក្រោមគម្រោងខ្សែក្រវាត់មួយវិថីមួយ (BRI)។

តាមពិតទៅ កោះ Manus ជាតាំងយុទ្ធសាស្ត្រសម្រាប់អាមេរិក និងអូស្ត្រាលី ដោយសារវាមានចម្ងាយត្រឹម ១៦០០ គីឡូម៉ែត្រប៉ុណ្ណោះពីកោះអាមេរិកហ្កាម ដែលកងទ័ពម៉ារីនអាមេរិកនឹងឈរជើងក្រោយប្តូរទីតាំងពីកោះអូហ្គីណាវ៉ាជប៉ុននោះ។ កោះនេះក៏ស្ថិតនៅចម្ងាយប្រហែល ២០០០ គីឡូម៉ែត្រពីកោះ Darwin របស់អូស្ត្រាលីដែលជាមូលដ្ឋានកងទ័ពម៉ារីន ២៥០០នាក់ឈរជើងដែរ៕