ជាតិ
មន្ត្រីខ្មែរ បដិសេធទទួលប្រាក់រៀល ជាករណីដែលមិនគួរឲ្យកើតមានទាល់តែសោះ!
× ជាមន្ត្រីនៃអគ្គនាយកដ្ឋានអត្តសញ្ញាណកម្ម តែបែរជាបដិសេធប្រាក់រៀល ដែលជារូបិយបណ្ណរបស់ជាតិទៅវិញ។ ករណីអ្នកស្រី គ្រី ណារី ដែលបម្រើការការងារនៅទីស្នាក់ការផ្ដល់លិខិតឆ្លងដែនប្រចាំនៅផ្សារអ៊ីអនម៉លទី២ អាចជារឿងដ៏កម្រមួយនៅកម្ពុជា។
រឿងរ៉ាវដែលកើតឡើងកាលពីថ្ងៃទី១៥ ខែវិច្ឆិកា បានល្បីល្បាញពេញបណ្តាញសង្គម។ នៅថ្ងៃនោះ ពលរដ្ឋម្នាក់បានទៅដាក់ពាក្យស្នើផ្ដល់លិខិតឆ្លងដែន បន្ទាប់ពីបានបំពេញ បែបបទរួច អ្នកស្នើសុំបានមកបញ្ជរបង់ប្រាក់ ដោយស្នើបង់សេវាចំនូន ៤០ម៉ឺនរៀល។ ពេលនោះដែរ មន្ត្រីទទួលបន្ទុកខាងសេវាបានទាមទារឱ្យបង់ ៤២ម៉ឺនរៀល ប៉ុន្តែការណ៍នេះធ្វើឱ្យអ្នកស្នើសុំមិនពេញចិត្ត ក៏មានការជជែកគ្នាតវ៉ាលើអត្រាប្តូរប្រាក់។
បន្ទាប់មកអ្នកស្រី គ្រី ណារី ក៏បានបញ្ឈប់មិនទទួលយកប្រាក់រៀល ដោយបានឲ្យលោក សេង សុខរ៉េម ដែលអ្នកស្នើសុំបង់ជាប្រាក់ដុល្លារវិញ ហើយក្រោមមក អ្នកស្នើសុំដដែលនេះក៏យល់ព្រមបង់ប្រាក់ដុល្លារទៅតាមការទាមទាររបស់មន្ត្រី។
រឿងរ៉ាវនេះ បានល្បីល្បាញពេញបណ្តាញសង្គម ហើយមួយថ្ងៃក្រោយមក អគ្គនាយកដ្ឋានអត្តសញ្ញាណកម្មនៃក្រសួងមហាផ្ទៃ បានចេញសេចក្តីប្រកាសព័ត៌មាន ដោយរៀបរាប់លំអិតពីហេតុការណ៍ដែលបានកើតឡើង។ ជាមួយគ្នានេះ អគ្គនាយកដ្ឋានទទួលស្គាល់ថា ការបដិសេធមិនទទួលយកប្រាក់រៀល ជាកំហុសរបស់មន្ត្រីទទួលបន្ទុកផ្តល់សេវា។
តាមរយៈសេចក្តីប្រកាសព័ត៌មាន អគ្គនាយកដ្ឋានអត្តសញ្ញាណកម្ម បានសម្រេចដក អ្នកស្រី គ្រី ណារី ពីទីស្នាក់ការផ្ដល់លិខិតឆ្លងដែនប្រចាំនៅផ្សារអ៊ីអនម៉លទី២ ឲ្យទៅបម្រើការនៅនាយកដ្ឋានលិខិតឆ្លងដែនវិញដើម្បីត្រួតពិនិត្យ និងពិចារណាអំពីគោលការវិន័យនៃអង្គភាព៕
Tag:
ប្រាក់រៀល-ដុល្លារ
គ្រី ណារី
© រក្សាសិទ្ធិដោយ thmeythmey.com