ជាតិ
សេដ្ឋកិច្ច
មណ្ឌលកម្សាន្ត ផ្សារទំនើប រួមចំណែកបង្កើនកញ្ចប់ផលិតផលទេសចរណ៍ថ្មីដល់ខេត្តសៀមរាប
× សៀមរាប៖ វត្តមានមជ្ឈមណ្ឌលកម្សាន្ត ផ្សារទំនើប ចូលរួមបង្កើនកញ្ចប់ផលិតផលទេសចរណ៍ថ្មីដល់ខេត្តសៀមរាប ជាពិសេសការពន្យាពេលកម្សាន្តរបស់ទេសចរ។ នេះជាការមើលឃើញរបស់ ប្រតិបត្តិករទេសចរណ៍ និងអ្នករកស៊ីលើវិស័យទេសចរណ៍ ស្របពេលដែលមជ្ឈមណ្ឌលកម្សាន្ត ហេរីថេក វ៉ក ដ៏ធំនៅខេត្តសៀមរាប ត្រូវបានបើកសម្ពោធជាផ្លូវការនៅថ្ងៃទី១៦ វិច្ឆិកា ឆ្នាំ២០១៨។
ប្រធានក្លឹបប្រតិបត្តិករទេសចរណ៍ខេត្តសៀមរាប លោក កៅ ហ្វីលីព មើលឃើញចំណុចវិជ្ជមាននៃការបង្ហាញវត្តមានមជ្ឈមណ្ឌលកម្សាន្ត ផ្សារដោយលោកពន្យល់ថា ជាធម្មតាទេសចរតែងដើរកម្សាន្ត និងចង់ដឹងពីផលិតផលក្នុងតំបន់នោះ ដូចជាមកខេត្តសៀមរាប ពួកគេចង់ស្គាល់អង្គរ បឹងទន្លេសាប ឬភ្នំគូលែន តែអំឡុងពេលកម្សាន្តនោះ ពួកគេក៏ត្រូវការហូបអាហារ ដើរផ្សារទិញរបស់ផ្សេងៗ និងការកម្សាន្តមួយចំនួនទៀតផងដែរ។
ដូចគ្នានេះដែរ លោក ផាវ ព្រឿន ប្រធានទីភ្នាក់ងារទេសចរណ៍កម្ពុជាខេត្តសៀមរាប ក៏យល់ស្របចំពោះការលើកឡើងរបស់លោក ហ្វីលីព ដែរ។ លោកថា ភ្ញៀវទេសចរមកទស្សនាអង្គរវត្ត តែពួកគេក៏ត្រូវការការកម្សាន្តនៅក្នុងទីក្រុងផងដែរ ហើយផ្សារទំនើប ឬមជ្ឈមណ្ឌលកម្សាន្ត គឺជាជម្រើសល្អសម្រាប់ពួកគេ ដូច្នេះពួកគេនឹងចំណាយពេលមួយ ឬពីរយប់ ដើម្បីការកម្សាន្តទាំងនោះ។
លោកស្រី ធៀង កតិកា ប្រធានប្រតិបត្តិក្រុមហ៊ុន Metro Lifestyle Development បានអះអាងពីការបង្កើត មជ្ឈមណ្ឌលកម្សាន្ត ហេរីថេក វ៉ក ក្នុងបំណងបំពេញបន្ថែមនូវតម្រូវការក្នុងវិស័យទេសចរណ៍ខេត្តសៀមរាប ៕
© រក្សាសិទ្ធិដោយ thmeythmey.com