កីឡាអន្តរជាតិ
អន្តរជាតិ
Pacquiao ថាក្រោយជំនួបជាមួយ Broner អ្នកបន្ទាប់ប្រហែលជា Floyd
× និយាយពីជំនួបសងសឹកជាមួយ Floyd Mayweather កំពូលអ្នកប្រដាល់អាស៊ី Manny Pacquiao ថាត្រូវរង់ចាំរហូតដល់រូបគេឡើងសង្វៀនប្រកួតការពារខ្សែក្រវាត់ WBA ទល់នឹងអ្នកប្រដាល់អាមេរិក Adrien Broner រួចរាល់សិន។
Pacquiao និង Broner បានត្រូវរូវគ្នារួចរាល់ហើយសម្រាប់ការប្រកួតប្រដាល់សកលដណ្តើមខ្សែក្រវាត់ទម្ងន់មធ្យមនៅសង្វៀន MGM Grand Garden Arena ក្នុងក្រុងឡាសវេហ្កាស សហរដ្ឋអាមេរិក នាថ្ងៃទី១៩ ខែមករា ឆ្នាំ២០១៩។
ឆ្លើយនឹងសំណួរអ្នកកាសែតដែលសួរអំពីអ្នកប្រដាល់មិនដែលចាញ់ Mayweather ក្នុងសន្និសីទសារព័ត៌មាននៅទីក្រុងញូវយ៉ក អ្នកប្រដាល់ហ្វីលីពីន វ័យ៣៩ឆ្នាំ ថាបើសិន Floyd ពិតជាត្រឡប់ពីការចូលនិវត្តន៍របស់គេមែននោះ យើងនឹងជួបគ្នានៅបន្ទាប់ពីការប្រកួតនេះ។ នេះបើតាមការផ្សាយរបស់ទីភ្នាក់ងារព័ត៌មាន Reuters។
Pacquiao បន្ថែមថា៖«ប៉ុន្តែយើងក៏មិនអាចមើលស្រាល Adrien Broner បានដែរ យើងមិនអាចមើលស្រាលការប្រកួតនេះទេ ខ្ញុំត្រូវឆ្លងកាត់ការប្រកួតនេះជាមុនសិនមុននឹងនិយាយអំពីការប្រកួតជាមួយ Floyd Mayweather»។
មានការប៉ាន់ស្មានអំពីការប្រកួតសងសឹករវាងអ្នកទាំងពីរម្តងដែរចាប់តាំងពី Mayweather បានឈ្នះពិន្ទុជាឯកច្ឆន្ទលើ Pacquiao នាជំនួបនៃព្រឹត្តិការណ៍ «The Fight of the Century» នៅសង្វៀន MGM Grand Garden Arena ក្នុងទីក្រុងឡាសវេហ្កាស សហរដ្ឋអាមេរិក កាលពីខែឧសភា ឆ្នាំ ២០១៥ ប៉ុន្តែអ្វីៗត្រូវបញ្ចប់វិញក្រោយលេចលឺថាមានភាគីម្ខាងត្រូវបានរំខានដោយរបួសស្មាស្តាំ។
អ្នកប្រដាល់មិនដែលស្គាល់ចាញ់របស់អាមេរិកដែលបច្ចុប្បន្នមានវ័យ៤១ឆ្នាំ បានប្រកាសពីការចូលនិវត្តន៍ពីអាជីពជាអ្នកប្រដាល់របស់គេម្តងរួចមកហើយក្រោយពីទទួលបានកំណត់ត្រាប្រកួត៥០ ឈ្នះទាំង៥០ដង ជាមួយនឹងជ័យជម្នះចុងក្រោយលើកីឡាករវាយក្នុងទ្រុង Conor McGegor នៅខែសីហា ឆ្នាំ២០១៧។
Floyd ធ្លាប់បានសរសេរនៅលើបណ្តាញសង្គម Instagram របស់ខ្លួនកាលពីខែកញ្ញាថា រូបគេនឹងត្រឡប់ពីការចូលនិវត្តន៍វិញដើម្បីតទល់នឹង Pacquiao ជាថ្មីម្តងទៀត។ ការបង្ហោះនោះរួមបញ្ចូលទាំងវីដេអូរបស់ Mayweather និង Pacquiao និយាយឌឺដងគ្នាទៅវិញទៅមក នៅឯព្រឹត្តិការណ៍ប្រគុំតន្ត្រីនៅមួយនាទីក្រុងតូក្យូ ប្រទេសជប៉ុន។
Pacquiao ដែលនឹងឈានចូលដល់វ័យ ៤០ ឆ្នាំនៅខែធ្នូខាងមុខនេះ ថាខ្លួនកំពុងផ្តោតខ្លាំងលើការប្រកួតជាមួយអ្នកប្រដាល់អាមេរិក Broner វ័យ២៩ឆ្នាំជាមុនសិន និងមិនចង់បែកអារម្មណ៍គិតពីជំនួបផ្សេងឡើយ៕
Tag:
ប្រដាល់
Adrien Broner
Manny Pacquiao
Floyd Mayweather
© រក្សាសិទ្ធិដោយ thmeythmey.com