វៀតណាម ជួយឡាវកសាងទិន្នន័យផែនទីដើម្បីគ្រប់គ្រងធនធានធម្មជាតិកាន់តែមានប្រសិទ្ធភាព

អន្តរជាតិ

វៀតណាម ជួយឡាវកសាងទិន្នន័យផែនទីដើម្បីគ្រប់គ្រងធនធានធម្មជាតិកាន់តែមានប្រសិទ្ធភាព

21, Nov 2018 , 10:59 am

រូបភាព

ដោយ:

បន្ទាប់ពីការជ្រោមជ្រែងទាំងផ្នែកបច្ចេកទេស និងហិរញ្ញវត្ថុពីរដ្ឋាភិបាលក្រុងហាណូយ នៅសល់ពេលមិនច្រើននោះទេ រដ្ឋាភិបាលក្រុងវៀងចន្ទន៍ នឹងអាចមានទិន្នន័យផែនទីមួយផ្លូវការដើម្បីបង្កភាពងាយស្រួលក្នុងការធ្វើដំណើរ និងគ្រប់គ្រងតំបន់ធនធានធម្មជាតិកាន់តែមានប្រសិទ្ធភាព។

ក្រសួងធនធានធម្មជាតិ និងបរិស្ថានវៀតណាម និងក្រសួងមហាផ្ទៃឡាវ កាលពីថ្ងៃ១៧ វិច្ឆិកា បានចេញសេចក្តីប្រកាសព័ត៌មានមួយស្តីពីជោគជ័យក្នុងការកសាងមូលដ្ឋានទិន្នន័យផែនទីប្រទេសឡាវ ដែលគ្របដណ្តប់តំបន់ភាគជើង និងតំបន់ភាគកណ្តាល នៃប្រទេស។ នេះបើយោងតាមការចុះផ្សាយរបស់សារព័ត៌មានវៀតណាម Vietnam News។

តាមការបញ្ជាក់របស់អនុរដ្ឋមន្ត្រីវៀតណាម Nguyễn Thị Phương Hoa គម្រោងកសាងមូលដ្ឋានទិន្នន័យផែនទីនេះ មានគោលដៅជួយឡាវក្នុងការប្រើប្រាស់ និងគ្រប់គ្រងធនធានធម្មជាតិ និងបរិស្ថានរបស់ខ្លួនប្រកបដោយប្រសិទ្ធភាព ហើយគម្រោងនេះដែរ ត្រូវបានចុះហត្ថលេខាក្រោមកិច្ចព្រមព្រៀងស្តីពីសេដ្ឋកិច្ច វប្បធម៌ ការអប់រំ និង វិទ្យាសាស្ត្រនិងបច្ចេកវិទ្យាតាំងពីឆ្នាំ២០១២មកម្ល៉េះ។

អនុរដ្ឋមន្ត្រីដដែលនោះ បន្ថែមថា គម្រោង ដែលប្រើប្រាស់ខ្ទង់ចំណាយប្រមាណ ៧,៩ លានដុល្លារនេះ គឺជាជំនួយឥតសំណងរបស់រដ្ឋាភិបាលវៀតណាម ដែលមានបំណងដើម្បីពង្រឹងទំនាក់ទំនងពិសេសរវាងប្រទេសទាំងពីរ។ គម្រោងនេះផងដែរ នឹងបញ្ចប់បញ្ហានៃការវង្វែងផ្លូវរបស់អ្នកទស្សនាទៅកាន់ឡាវទៀតហើយ។

តាមមន្ត្រីជាន់ខ្ពស់វៀតណាមរូបនេះ វៀតណាម ក្រៅពីជួយកសាងកម្មវិធីសម្រាប់ឡាវរួចហើយ វៀតណាម នឹងនៅតែបន្តជួយបណ្តុះបណ្តាលមន្ត្រីឡាវបន្ថែមទៀតក្នុងការប្រើប្រាស់កម្មវិធីនេះឲ្យរលូន។ ជុំវិញគម្រោងនេះដែរ អនុរដ្ឋមន្ត្រីក្រសួងមហាផ្ទៃឡាវ Thongchanh Manixay បានអះអាងថា ជោគជ័យគម្រោងនេះ គឺជាមរតកមួយដ៏សំខាន់រវាងទំនាក់ទំនងប្រទេសទាំងពីរ៕