ជាតិ
បុណ្យអុំទូក
ត្រីគល់រាំង និងត្រីរាជ ធ្វើចរាចរផ្លាស់ទីចេញបឹងទន្លេសាប មកដល់មុខព្រះបរមរាជវាំង ចំពេលពិធីបុណ្យអុំទូក ត្រីគល់រាំង និងត្រីរាជធ្វើចរាចរចេញពីបឹងទន្លេសាប។ រូបភាពឯកសាររបស់លោកបណ្ឌិត ហ្សេប ហូហ្គេន / គម្រោងអច្ឆរិយភាពនៃទន្លេមេគង្គ។
× ពិធីបុណ្យអុំទូក គឺជាបុណ្យប្រពៃណីដ៏ធំមួយនៅក្នុងប្រទេសកម្ពុជា ដែលប្រជាជនខ្មែរតែងតែប្រារព្ធធ្វើឡើង រយៈពេលបីថ្ងៃ ក្នុងខែវិច្ឆិកា ត្រូវនឹងថ្ងៃ១៤-១៥កើត និង១រោច ខែកត្តិក ជារៀងរាល់ឆ្នាំ។ ពិធីបុណ្យនេះ មានប្រវត្តិជាយូរលង់ណាស់មកហើយ តាំងពីក្នុងរច្ចកាល ព្រះបាទជ័យវរ្ម័នទី៧មកម្ល៉េះ ក្នុងគ្រឹស្តសករាជ ១១៧៧ - ១១៨១ដើម្បីរំលឹកទៅដល់កងទ័ពជើងទឹក ។ ក្រោយមក ការប្រារព្ធពិធីបុណ្យអុំទូកនេះ គឺដើម្បីដឹងគុណដល់ព្រះគង្គា និងព្រះធរណី ដែលបានផ្តល់ជីវភាពរស់នៅ និងសុខមាលភាពល្អប្រសើរ ដល់ប្រជាជន។
ពិធីបុណ្យអុំទូកនេះ ប្រារព្ធធ្វើឡើងនៅមុខព្រះបរមរាជវាំង រាជធានីភ្នំពេញ។ ប្រជាជនខ្មែរ មកពីបណ្តាខេត្ត បានមកពពាក់ពពួនគ្នា យ៉ាងច្រើនកុះករ។ ទូកង ដែលរចនាយ៉ាងល្អប្លែកភ្នែក ក៏បានបណ្តែតខ្លួនលើផ្ទៃទឹក បង្អួតអ្នកទស្សនានៅលើច្រាំង ទន្លេសាបយ៉ាងច្រើនកុះករ អមដោយសូរសម្លេងយ៉ាងកងរំពង។
ស្របពេលជាមួយគ្នានោះ ខណៈពេលដែលទូកងកំពុងប្រឡងប្រជែងយកឈ្នះចាញ់ ត្រីរាជ និងត្រីគល់រាំង ដែលជាប្រភេទត្រីទឹកសាបមានមាឌធំជាងគេលើលោក ក៏បានធ្វើចរាចរចេញពីបឹងទន្លេសាប មកដល់មុខព្រះរមរាជវាំង ទន្លេចតុមុខដែរ។ ត្រីរាជ មានឈ្មោះវិទ្យាសាស្ត្រ (Pangasianodon gigas) និងឈ្មោះជាភាសាអង់គ្លេស Mekong giant catfish។ ត្រីរាជ មានដងខ្លួនអតិបរមាប្រវែង ៣០០ស.ម និងទម្ងន់អតិបរមា ៣០០គីឡូក្រាម។ ត្រីប្រភេទនេះ វាធំលូតលាស់លឿនជាងប្រភេទត្រីផ្សេងដទៃទៀត នៅក្នុងពិភពលោក ដោយរយៈពេល៦ឆ្នាំ វាអាចមានទម្ងន់ ចាប់ពី ១៥០ ទៅ ២០០គីឡូក្រាម។ ត្រីគល់រាំង មានឈ្មោះវិទ្យាសាស្ត្រ (Catlocarpio siamensis) និងឈ្មោះជាភាសាអង់គ្លេស Giant barb។ ត្រីគល់រាំង អាចមានប្រវែងដងខ្លួនអតិបរមា ដល់ទៅ៣០០សម និងមានទម្ងន់អតិបរមា ៣០០គីឡូក្រាម។
គួរបញ្ជាក់ថា ត្រីរាជ និងត្រីគល់រាំង ធើ្វចរាចរផ្លាស់ទីចេញពីបឹងទន្លេសាប ចូលទៅរស់នៅក្នុងអាងទឹកជ្រៅ ក្នុងទន្លេមេគង្គ នាចុងរដូវប្រាំង នៅចុងខែកញ្ញា ឬដើមខែតុលា ជាមួយប្រភេទត្រីធំៗផ្សេងទៀត។ បន្ទាប់មក ពពួកត្រីប្រភេទតូច មធ្យម និងធំ ជាច្រើនប្រភេទទៀត ក៏បានចាប់ផ្តើមធ្វើចរាចរផ្លាស់ទីចេញពីបឹងទន្លេសាបតាមដែរ ពិសេស ពពួកត្រីរៀល។
វិទ្យាស្ថានស្រាវជ្រាវ និងអភិវឌ្ឍន៍ជលផលទឹកសាប នៃរដ្ឋបាលជលផល សហការជាមួយគម្រោងអច្ឆរិយភាពនៃទន្លេមេគង្គ (Wonders of the Mekong) ក្រោមជំនួយឧបត្ថម្ភពី USAID សូមធ្វើការអំពាវនាវដល់ប្រជានេសាទទាំងអស់ នៅតាមដងទន្លេសាប ជាពិសេសម្ចាស់ «ដាយត្រី» ទាំង១៤គន្លង មេត្តាជួយផ្តល់ព័ត៌មាន ក្នុងករណីចាប់បាន ឬឃើញប្រជានេសាទណាចាប់បាន ដើម្បីក្រុមការងាររបស់យើង ចុះទៅបំពាក់ស្លាកសញ្ញាសម្គាល់ រួចលែងវាចូលទៅក្នុងទន្លេវិញ តាមរយៈទូរសព្ទទំនាក់ទំនង៖ ម៉ូប៊ីតែល (012 805 347) ស្មាត (016 695 933) មិត្តហ្វូន (090 850 850)។
© រក្សាសិទ្ធិដោយ thmeythmey.com