អន្តរជាតិ
អតីតប្រធានាធិបតីស៊ីមបាវ៉េ វ័យ៩៤ឆ្នាំ កំពុងព្យាបាលជំងឺនៅសិង្ហបុរី ហើយដើរលែងរួច
×![]()
លោកអតីតប្រធានាធិបតីស៊ីមបាវ៉េ រ៉ូបឺត មូហ្កាបេ (Robert Mugabe) កំពុងតែទទួលការព្យាបាលជំងឺនៅក្នុងប្រទេសសិង្ហបុរី ខណៈស្ថានភាពសុខភាពរបស់លោកកាន់តែដុនដាប និងដោយដើរលែងរួច។
លោកប្រធានាធិបតីស៊ីមបាវ៉េ Emmerson Mnangagwa នៅថ្ងៃ២៤ វិច្ឆិកា បានឲ្យដឹងថា លោក មូហ្កាបេ បានទទួលការព្យាបាលនៅសិង្ហបុរីរយៈពេលជាងពីរខែមកហើយ។ លោកប្រធានាធិបតី បានបញ្ជាក់ថា លោក មូហ្កាបេ នឹងវិលត្រឡប់មកប្រទេសវិញនាពេលខាងមុខដ៏ខ្លីនេះ។
តាមភ្នាក់ងារព័ត៌មាន Reuters លោក Mnangagwa បានប្រាប់អ្នកគាំទ្របក្សកាន់អំណាច ថា ស្ថានភាពសុខភាពរបស់លោកអតីតប្រធានាធិបតី មានលក្ខណៈល្អប្រសើរហើយ ក៏ប៉ុន្តែលោក មិនអាចដើរបានទៀតឡើយ។ លោកប្រធានាធិបតី ក៏បានសន្យាបន្តមើលថែទាំងអតីតមេដឹកនាំកំពូលរូបនេះតទៅទៀត។
យ៉ាងណាក៏ដោយ លោក Mnangagwa មិនបានបញ្ជាក់ពីមូលហេតុ និងជំងឺរបស់លោក មូហ្កាបេ ឡើយ ដ្បិតនេះ គឺជារឿងឯកជន។ កន្លងមក មានការរាយការណ៍ថា លោក មូហ្កាបេបានទៅព្យាបាលជំងឺភ្នែកនៅសិង្ហបុរី ប៉ុន្តែលោកបដិសេធ ការផ្សាយមួយចំនួនរបស់សារព័ត៌មានក្នុងស្រុក ដែលថា លោកមានជំងឺមហារីកក្រពេញប្រូស្តាត។
គួរជម្រាបថា លោក មូហ្កាបេ គឺជាអតីតមេដឹកនាំដែលកាន់តំណែងយូរជាងគេលើពិភពលោក ក្នុងរយៈពេលជិតបួនទសវត្សរ៍ឯណោះ។ ស្ថិតក្នុងវ័យ៩៤ឆ្នាំហើយនោះ លោកបង្ខំចិត្តឲ្យចុះចេញពីតំណែងនៅចុងឆ្នាំ២០១៧ ក្រោយពីមានរដ្ឋប្រហារយោធាស្ងៀមស្ងាត់មួយ។ លោក មូហ្កាបេ ក៏ស្ថិតនៅក្នុងចំណោមមេដឹកនាំពិភពលោកដែលធ្វើដំណើរទៅសិង្ហបុរីដើម្បីទទួលការព្យាបាលជំងឺជាប្រចាំដែរ៕
© រក្សាសិទ្ធិដោយ thmeythmey.com
