អន្តរជាតិ
សមាជិកភាពក្នុងអាស៊ានរបស់ «ទីម័រខាងកើត»នៅតែជារឿងស្រពេចស្រពិល
× កិច្ចប្រជុំកំពូលសមាគមប្រជាជាតិអាស៊ីអាគ្នេយ៍ ឬហៅកាត់ថាអាស៊ាន ពីមួយឆ្នាំទៅមួយឆ្នាំតែងបញ្ចប់ជាមួយនឹងលទ្ធផលផ្លែផ្កា និងគំនិតផ្តួចផ្តើមសម្រាប់អភិវឌ្ឍតំបន់ថ្មីជានិច្ច។ ប៉ុន្តែបញ្ហាបញ្ចូលសមាជិកថ្មីបន្ថែមពោលគឺការដាក់បញ្ចូលទីម័រខាងកើត នៅតែជារឿងតឹងតែងសម្រាប់ក្រុមប្រទេសទាំងដប់នេះ។ សូម្បីតែកិច្ចប្រជុំកំពូលលើកទី៣៣ ដែលទើបតែបញ្ចប់ទៅជាថ្មីនេះ ក៏មិនទាន់មានពន្លឺអ្វីថ្មីដែរ។
ជាគោលការណ៍ មានចែងក្នុងធម្មនុញ្ញអាស៊ានស្រាប់ ដើម្បីអាចក្លាយជាសមាជិករបស់សមាគមប្រជាជាតិអាស៊ីអាគ្នេយ៍បាន រដ្ឋដែលមានបំណងចង់ចូលនោះ ត្រូវបំពេញលក្ខខណ្ឌគ្រឹះមួយចំនួន ដែលរាប់បញ្ចូលទាំងលក្ខខណ្ឌពិសេសមួយគឺ ត្រូវមានភូមិសាស្ត្រ ស្ថិតនៅក្នុងតំបន់អាស៊ីអាគ្នេយ៍។ ក៏ប៉ុន្តែ ហេតុអ្វីទីម័រខាងកើត នៅតំបន់អាស៊ីអាគ្នេយ៍ តែមិនទាន់អាចក្លាយជាក្រុមគ្រួសាររបស់ប្រទេសទាំងដប់បាន។
« ពិតណាស់ដើម្បីក្លាយជាសមាជិកអាស៊ាន រដ្ឋដែលមានបំណងនោះ មិនមែនត្រឹមតែចុះហត្ថលេខាលើកិច្ចព្រមព្រៀង ឬលិខិតបទដ្ឋានគតិយុត្តពាក់ព័ន្ធ ហើយអាចកាន់កាតសម្គាល់សមាជិកភាពអាស៊ានប៉ុណ្ណោះនោះទេ។
ប៉ុន្តែ វាមានកាតព្វកិច្ច និងបន្ទុកជាច្រើនដែលត្រូវធ្វើ ហើយនេះ ក៏ជាអ្វីដែលយើងចង់ឲ្យរដ្ឋមានបំណងចង់ក្លាយជាសមាជិកត្រៀមខ្លួនរួចស្រេច និងដឹងជាមុនឲ្យបានច្រើន»។ នេះ គឺជាជំហរមួយរបស់លោកនាយករដ្ឋមន្ត្រីសិង្ហបុរី លី សៀនឡុង ទៅកាន់បំណងរបស់ទីម័រខាងកើត ក្នុងពេលនៃការផ្តល់បឋកថាក្នុងឆ្នាំ២០១៥កន្លងទៅ។
លោកនាយករដ្ឋមន្ត្រី លើកឡើងថា ប្រសិនបើយើងចង់ឲ្យក្រុមកាន់តែធំ យើងអាចឲ្យរាល់គ្នាចូលរួមបាន ក៏ប៉ុន្តែអ្វីដែលលោក បារម្ភនោះគឺ នៅពេលដែលអាស៊ាន មានគម្រោងថ្មី អាស៊ាន ត្រូវប្រឈមនឹងរឿងចម្រូងចម្រាស ដោយសារការយល់ឃើញផ្សេងទៀត និងការទាញយកផលប្រយោជន៍ផ្សេងៗគ្នា។ ពេលនោះហើយ លោក ថា អាស៊ាន នឹងដើរកាន់តែយឺត។
ផ្ទុយទៅវិញ លោកនាយករដ្ឋមន្ត្រី អះអាងថា នៅពេលក្រុមតូច នាំអាស៊ាន អាចកាន់តែទៅមុខលឿន ហើយភាពស្ទាក់ស្ទើរ នឹងកាន់តែមានតិច។ លោក លើកយកករណីសហភាពអឺរ៉ុប ដែលមានសមាជិករហូតដល់២៨ប្រទេសបានជួបរឿងស្មុគស្មាញច្រើនរួចទៅហើយ។ សម្រាប់អាស៊ានវិញ លោក ថ្លែងថា គ្រាន់តែសមាជិក១០នេះ អ្នកការទូតអាស៊ាន រវល់គ្រប់គ្រាន់ណាស់ទៅហើយ។
លោក ថ្លែងបែបនេះ នៅពេលនោះ មិនមែនលោក មិនចង់ឲ្យទីម័រខាងកើត ដែលជារដ្ឋខ្ចីជាងគេក្នុងតំបន់អាស៊ីអាគ្នេយ៍ក្លាយជាសមាជិករបស់សមាគមប្រជាជាតិអាស៊ីអាគ្នេយ៍នោះ តែ បំណងនេះ ទាមទារឲ្យមានការសិក្សាច្រើន មុនពេលអាស៊ាន ត្រូវសម្រេចចិត្តបញ្ចូលសមាជិកថ្មីបន្ថែម។ ទោះការលើកឡើងរបស់លោក ធ្វើឡើងតាំងបីឆ្នាំមុនក៏ដោយ ជំហរនេះ នៅតែឆ្លើយនឹងសំណួរថា «តើហេតុអ្វីទីម័រខាងកើត នៅតែមិនទាន់ទទួលបានការយល់ព្រមក្នុងការក្លាយជាសមាជិកអាស៊ានបាន?»
គួរជម្រាបផងដែរថា សមាគមប្រជាជាតិអាស៊ីអាគ្នេយ៍ ដែលមានអាយុកាលជាង៥ទសវត្សរ៍ហើយនោះមានសមាជិកសរុបទាំងអស់១០ប្រទេស រួមមាន ព្រុយណេ កម្ពុជា ឥណ្ឌូណេស៊ី ឡាវ ម៉ាឡេស៊ី មីយ៉ាន់ម៉ា ហ្វីលីពីន សិង្ហបុរី ថៃ និង វៀតណាម។ សម្រាប់ទីម័រខាងកើត ដែលបានស្នើចូលជាសមាជិកភាពតាំងពីឆ្នាំ២០១១ និងកំពុងស្ថិតក្រោមការវិនិច្ឆ័យរបស់ក្រុមប្រឹក្សារបស់អាស៊ាននោះ ឋានៈត្រឹមតែជារដ្ឋអង្កេតការប៉ុណ្ណោះ៕
ប្រភព៖
https://www.youtube.com/watch?v=63JB_3aQrlE
Tag:
ទីម័រខាងកើត
អាស៊ាន
© រក្សាសិទ្ធិដោយ thmeythmey.com