កីឡាជាតិ
ជាតិ
AFF Suzuki Cup៖ ម៉ាឡេស៊ីត្រូវប៉ះថៃ ហ្វីលីពីនឡើងជួបវៀតណាមនៅវគ្គ១/២ផ្តាច់ព្រ័ត្រ
ថៃជាម្ចាស់ជើងឯក៥ជំនាន់ និងជាម្ចាស់ការពារតំណែងជើងឯក
×![]()
ដោយ: រួបរួម
ការប្រកួតដណ្តើមពានរង្វាន់ប្រចាំតំបន់អាស៊ីអាគ្នេយ៍ AFF Suzuki Cup ឆ្នាំ២០១៨ រកឃើញក្រុមដែលឈានទៅវគ្គពាក់កណ្តាលផ្តាច់ព្រ័ត្រហើយ ដោយក្រុមលេខមួយពូល A វៀតណាម ត្រូវប៉ះជាមួយលេខពីរពូល B ហ្វីលីពីន ខណៈដែលលេខមួយពូល B ថៃ ត្រូវតទល់ជាមួយក្រុមលេខពីរពូល A ម៉ាឡេស៊ី។
វៀតណាម បានចំណាត់ថ្នាក់លេខមួយពូល A ដោយមាន១០ពិន្ទុ ក្រោយឈ្នះឡាវ ៣-០ ឈ្នះម៉ាឡេស៊ី ២-០ ឈ្នះកម្ពុជា ៣-០ និងស្មើ មីយ៉ាន់ម៉ា ០-០ ។ ចំណែកម៉ាឡេស៊ី ទោះបីចាញ់វៀតណាម ប៉ុន្តែជ័យជម្នះរបស់ពួកគេក្នុងលទ្ធផល ១-០ លើកម្ពុជា ៣-១ លើឡាវ និង៣-០ លើមីយ៉ាន់ម៉ា នាំឲ្យពួកគេឈរចំណាត់ថ្នាក់លេខពីរក្នុងពូលដោយមាន៩ពិន្ទុ។
មីយ៉ាន់ម៉ា ខកចិត្តជាងគេនៅក្នុងពូល A ជាពិសេសបរាជ័យ ៣-០ ដោយសារម៉ាឡេស៊ី នាជំនួបចុងក្រោយ បន្ទាប់ពីពួកគេ បានយកឈ្នះលើកម្ពុជា ឡាវ និងស្មើវៀតណាម។ ចំណែកកម្ពុជា មានតែ៣ពិន្ទុប៉ុណ្ណោះ តាមរយៈជ័យជម្នះលើឡាវ ៣-១នៅក្នុងដី ។ ឡាវជាក្រុមបាតតារាងដែលចាញ់ទាំង៤ប្រកួត។
ចំណែកពូល B ថៃឈរលេខមួយដោយមាន១០ពិន្ទុ ក្រោយឈ្នះទីម័រខាងកើត ៧-០ ឈ្នះឥណ្ឌូណេស៊ី ៤-២ ឈ្នះសិង្ហបុរី ៣-០ និងស្មើ ហ្វីលីពីន ១-១ ។ ចំណែកហ្វីលីពីន បានលេខពីរដោយមាន៨ពិន្ទុ ដោយក្រៅពីស្មើថៃ ១-១ ពួកគេបានឈ្នះសិង្ហបុរី ១-០ ឈ្នះទីម័រខាងកើត ៣-២ និងស្មើឥណ្ឌូណេស៊ី ០-០ ។
សិង្ហបុរី ហាលអាវដោយមាន៦ពិន្ទុ ឥណ្ឌូណេស៊ី មាន៤ពិន្ទុ ខណៈទីម័រខាងកើត មិនមានពិន្ទុរាប់ឡើយនៅក្នុងពូល B។
ខ្សែប្រយុទ្ធថៃ Adisak Kraisorn រកបានគ្រាប់បញ្ចូលទីរហូតដល់ទៅ៨គ្រាប់សម្រាប់ការសន្សំពិន្ទុក្នុងពូល B ខណៈកីឡាករម៉ាឡេស៊ី Norshahrul Idlan Talaha រកបាន៤គ្រាប់។ ចាន់ វឌ្ឍនាការបស់កម្ពុជា រកបាន២គ្រាប់ផងដែរ ខណៈ កែវ សុខផេង និងប្រាក់ មុនីឧត្តម រកបានម្នាក់១គ្រាប់។
ការប្រកួតវគ្គពាក់កណ្តាលផ្តាច់ព្រ័ត្រនឹងប្រព្រឹត្តទៅចំនួនពីរជើង ដោយម៉ាឡេស៊ី ទទួលថៃនៅថ្ងៃទី១ ខែធ្នូ រីឯហ្វីលីពីនស្វាគមន៍វៀតណាមនៅថ្ងៃទី២ ខែធ្នូ។ ជំនួបដូរទឹកដី នឹងប្រព្រឹត្តទៅនៅថ្ងៃទី៥ និងទី៦ ខែធ្នូ។
ក្រុមដែលឈ្នះនឹងឈានបន្តទៅវគ្គផ្តាច់ព្រ័ត្រ ដោយជើងទីមួយប្រព្រឹត្តទៅនៅថ្ងៃទី១១ ខែធ្នូ និងជើងទីពីរនៅថ្ងៃទី១៥ ខែធ្នូ។ ថៃជាម្ចាស់ជើងឯក៥ជំនាន់ និងជាម្ចាស់ការពារតំណែងជើងឯក ម៉ាឡេស៊ី និងវៀតណាម ធ្លាប់ឈ្នះជើងឯក១លើករៀងៗខ្លួន ខណៈហ្វីលីពីន រំពឹងឆ្លងផុតវគ្គពាក់កណ្តាលផ្តាច់ព្រ័ត្រលើកដំបូងក្នុងការបង្ហាញខ្លួន៤លើក៕
Tag:
AFF Suzuki Cup
© រក្សាសិទ្ធិដោយ thmeythmey.com
