ប្រធានាធិបតីចិន ពេញចិត្តពេញថ្លើមនឹងទស្សនកិច្ចលើកដំបូងទៅកាន់ហ្វីលីពីនប្រកបដោយផ្លែផ្កា

អន្តរជាតិ

ប្រធានាធិបតីចិន ពេញចិត្តពេញថ្លើមនឹងទស្សនកិច្ចលើកដំបូងទៅកាន់ហ្វីលីពីនប្រកបដោយផ្លែផ្កា

26, Nov 2018 , 9:19 pm

រូបភាព

ដោយ:

លោកប្រធានាធិបតី ស៊ី ជិនភីង បានបង្ហាញការពេញចិត្តក្នុងដំណើរទស្សនកិច្ចជាលើកដំបូងក្នុងនាមជាប្រមុខរដ្ឋចិនទៅកាន់ហ្វីលីពីន។ បន្ថែមពីលទ្ធផលផ្លែផ្កា ដែលមានជាលាយលក្ខណ៍អក្សរស្រាប់ លោក ស៊ី បានប្តេជ្ញាពង្រឹងកិច្ចសហប្រតិបត្តិការជាមួយនឹងហ្វីលីពីន ពិសេសសមភាគីរបស់ខ្លួន គឺលោក រ៉ូឌ្រីហ្គោ ឌូទីតេ ឲ្យកាន់តែស្និទ្ធ។

បន្ទាប់ពីបានបញ្ចប់ដំណើរទស្សនកិច្ចផ្លូវការនៅហ្វីលីពីនរួចហើយមក លោកប្រធានាធិបតី ស៊ី ជិនភីង បានផ្ញើលិខិតមួយច្បាប់ទៅកាន់លោកប្រធានាធិបតី រ៉ូឌ្រីហ្គោ ឌូទើតេ ដោយបង្ហាញអារម្មណ៍ពេញចិត្តពេញថ្លើមក្នុងទស្សនកិច្ចផ្លូវរដ្ឋលើកដំបូងក្នុងរយៈ១៣ឆ្នាំមកនេះ។

តាមការចុះផ្សាយរបស់សារព័ត៌មានហ្វីលីពីន GMA នៅថ្ងៃ២៤ វិច្ឆិកា លោកប្រធានាធិបតី បានសរសេរថា លោក ពិតជារីករាយជាមួយនឹងលទ្ធផលដ៏ផ្លែផ្លាក្នុងដំណើរទស្សនកិច្ចនេះ ដែលរាប់បញ្ចូលទាំងការរៀបចំបដិសណ្ឋារកិច្ចដ៏កក់ក្តៅ ក៏ដូចជាការទទួលស្វាគមន៍យ៉ាងរួសរាយរាក់ទាក់ពីសំណាក់ប្រជាជនហ្វីលីពីនផងដែរ។

លោក ស៊ី ក៏បានបង្ហាញការពេញចិត្តចំពោះទំនាក់ទំរវាងចិន និងហ្វីលីពីន រួមទាំងស្ថានភាពអន្តរជាតិបច្ចុប្បន្ន ដែលបានបង្ហាញជាថ្មីម្តងទៀតថា ចិន និងហ្វីលីពីន គឺជាដៃគូរួមវិថីតែមួយឆ្ពោះទៅកាន់សន្តិភាព និងការអភិវឌ្ឍ។ ប្រធានាធិបតីចិនរូបនេះក៏បានអះអាងផងដែរថា លោក ក៏សូមវាយតម្លៃខ្ពស់លើទំនាក់ទំនងផ្ទាល់របស់លោក ជាមួយនឹងលោកប្រធានាធិបតី ឌូទើតេ ផងដែរ។

គួររម្លឹកផងដែរថា លោកប្រធានាធិបតី ស៊ី ជិនភីង ទើបតែបានបញ្ចប់ដំណើរទស្សនកិច្ចផ្លូវរដ្ឋទៅកាន់ហ្វីលីពីន ជាមួយនឹងកិច្ចព្រមព្រៀងជិត៣០ ដោយគ្របដណ្តប់លើវិស័យពាណិជ្ជកម្ម និងវិនិយោគ, ធនាគារ និងហិរញ្ញវត្ថុ, ហេដ្ឋារចនាសម្ព័ន្ធ, កសិកម្ម, អប់រំ និងការផ្លាស់ប្តូររវាងប្រជាជន និងប្រជាជនជាដើម។

គួរកត់សម្គាល់នោះ ក្នុងចំណោមកិច្ចព្រមព្រៀងទាំងនេះ ភាគីទាំងពីរ ក៏បានចុះហត្ថលេខាលើអនុស្សារណយោគយល់មួយស្តីពីការអភិវឌ្ឍរួមគ្នាលើការរុករកប្រេងកាត និងឧស្ម័ននៅក្នុងតំបន់ជម្លោះសមុទ្រចិនខាងត្បូងផងដែរ។ កិច្ចព្រមព្រៀងនេះ គឺជាកិច្ចព្រមព្រៀងទ្វេភាគីពិសេសមួយ ដ្បិតរដ្ឋបាលហ្វីលីពីនមុនៗ តែងតែមានជំហរតឹងរ៉ឹងខ្លាំងក្នុងកិច្ចសហប្រតិបត្តិការជាមួយនឹងចិនលើតំបន់ជម្លោះសមុទ្រចិនខាងត្បូង៕