ជាតិ
បេតិកភណ្ឌវប្បធម៌អរូបីចំនួន៧ដែលត្រូវដាក់ចូលក្នុងបញ្ជី Need of Urgent Safeguarding
×![]()
ដោយ: រួបរួម
ល្ខោនខោលវត្តស្វាយអណ្តែត ស្ថិតក្នុងចំណោមបេតិកភណ្ឌវប្បធម៌អរូបីចំនួន៧ ដែលត្រូវបានទទួលស្គាល់ក្នុងបញ្ជីបេតិកភណ្ឌវប្បធម៌អរូបីដែលត្រូវឲ្យមានការថែរក្សា ការពារជាបន្ទាន់ (List of Intangible Cultural Heritage in Need of Urgent Safeguarding) ។ បេតិកភណ្ឌអរូបីទាំងនេះ ត្រូវបានទទួលស្គាល់ផ្លូវការនាសម័យប្រជុំ លើកទី១៣នៃគណៈកម្មាធិការអន្តររដ្ឋាភិបាលសម្រាប់ការថែរក្សាបេតិកភណ្ឌវប្បធម៌អរូបីនៅក្រុង Port Louis ប្រទេសម៉ូរីស កាលពីថ្ងៃទី២៨ ខែវិច្ឆិកា។
រដ្ឋដែលមានបេតិកភណ្ឌអរូបីក្នុងបញ្ជី Intangible Cultural Heritage in Need of Urgent Safeguarding (USL) នេះ ត្រូវទទួលបានកញ្ចប់ថវិកាសម្រាប់ការអភិវឌ្ឍន៍ និងអភិរក្ស រួមទាំងជំនួយបច្ចេកទេសនានាពីសហគមន៍អន្តរជាតិ ក្រោមក្របខណ្ឌវប្បធម៌។ សម្រាប់កម្ពុជា ល្ខោនខោល ជាបេតិកភណ្ឌអរូបីទីពីរដែលស្ថិតក្នុងបញ្ជី USL បន្ទាប់ពីចាប៉ីដងវែង (ឆ្នាំ២០១៦)។
ខាងក្រោមនេះ ជាបេតិកភណ្ឌវប្បធម៌អរូបីទាំង៧ដែលទើបត្រូវបានចុះក្នុងបញ្ជី USL៖
អាល់ហ្សេរី៖ ចំណេះដឹង និងជំនាញវាស់កម្រិតទឹក foggaras នៃសហគមន៍ Ksour តំបន់ Touat និង Tidikelt។
អាសែបៃហ្សង់៖ Yalli (Kochari, Tenzere) ក្រុមរាំប្រពៃណីនៅតំបន់ស្វ័យត Nakhchivan។
កម្ពុជា៖ ល្ខោនខោលវត្តស្វាយអណ្តែត (Lkhon Khol Wat Svay Andet) ដែលជាល្ខោនដ៏ចំណាស់របស់កម្ពុជា ហើយត្រូវស្រោចស្រង់ដោយសហគមន៍នៅជុំវិញវត្តស្វាយអណ្តែត ខេត្តកណ្តាល។
អេហ្ស៊ីប៖ ល្ខោនតុក្កតា Al-Aragoz (Traditional Hand Puppetry) ដែលជាទម្រង់សិល្បៈដ៏ចំណាស់មួយនៅអេហ្ស៊ីប។
កេនយ៉ា៖ Enkipaata, Eunoto និង Olng’esherr ពិធីបីយ៉ាងសម្រាប់មនុស្សប្រុសដែលឆ្លងពីវ័យកុមារទៅជំទង់នៅសហគមន៍ Maasai។
ប៉ាគីស្ថាន៖ ក្បួនតាមដានព្រះអាទិត្យ Suri Jagek ដែលក្បួនឧតុនិយម និងតារាសាស្ត្របែបប្រពៃណី តាមប្រតិទិន Kalasha។
ស៊ីរី៖ ល្ខោនស្រមោល (Shadow Play) ប្រពៃណីដែលប្រឈមបាត់បង់ដោយសារសង្គ្រាមរ៉ាំរៃ៕
Tag:
ល្ខោនខោល
យូណេស្កូ
បេតិកភណ្ឌ
© រក្សាសិទ្ធិដោយ thmeythmey.com
