ក្រុងញូវដេលីកំពុងពិចារណាផ្តល់កម្ចីទំហំ មួយពាន់លានដុល្លារទៅឲ្យម៉ាល់ឌីវ ដើម្បីជួយដោះបំណុលដែលប្រទេសកោះនៅមហាសមុទ្រឥណ្ឌានេះបានជំពាក់ចិន។ ប៉ុន្តែជំនួយនេះក៏មានភ្ជាប់ជាមួយលក្ខខណ្ឌដែរ ដោយរដ្ឋាភិបាលម៉ាល់ឌីវត្រូវយល់ព្រមដើរចេញឲ្យឆ្ងាយពីចិន និងព្រមអនុញ្ញាតឲ្យកងទ័ពឥណ្ឌាឈរជើងលើទឹកដីខ្លួនជាអចិន្ត្រៃយ៍ដែរ។
ប្រភពរដ្ឋាភិបាលឥណ្ឌាប្រាប់សារព័ត៌មាន Asian Nikkei ថា ឥណ្ឌាកំពុងពិភាក្សាជាមួយម៉ាល់ឌីវ ដើម្បីផ្តល់កម្ចីការប្រាក់ទាបប្រមាណមួយពាន់លានដុល្លារ ប៉ុន្តែជាថ្នូរត្រឡប់មកវិញ ឥណ្ឌាមានសិទ្ធិដាក់ពង្រាយកងទ័ពរបស់ខ្លួននៅរដ្ឋដែនកោះនេះ។
ជុំវិញរឿងនេះ រដ្ឋមន្ត្រីការបរទេសម៉ាល់ឌីវ លោក Abdulla Shahid និង សមភាគីឥណ្ឌា លោកស្រី Sushma Swaraj បានអះអាងថា ការចរចានេះកំពុងដំណើរការទៅមុខយ៉ាងរលូន ហើយប្រមុខការទូតនៃប្រទេសទាំងពីរនេះ ក៏បានយល់ព្រមលើកិច្ចសហប្រតិបត្តិការផ្នែកសន្តិសុខ និងសេដ្ឋកិច្ច នៅជំនួបកាលពីថ្ងៃចន្ទដើមសប្តាហ៍កន្លងទៅនារដ្ឋធានី ញូវដេលី។
ក្នុងសេចក្តីថ្លែងការណ៍ដាច់ដោយឡែកមួយ ក្រសួងការបរទេសឥណ្ឌាបានគូសបញ្ជាក់ថា ឥណ្ឌានឹងជួយគាំទ្រម៉ាល់ឌីវ ដើម្បីធានាឲ្យបាននូវស្ថិរភាពខាងផ្នែក ចំណូលចំណាយ និងកញ្ចប់ថវិកាជាតិរបស់ប្រទេសនេះ។
បើតាមសារព័ត៌មាន Asian Nikkei ឥណ្ឌា និងម៉ាល់ឌីវ រំពឹងនឹងជួបគ្នាពិភាក្សាលម្អិតពីបញ្ហានេះនៅមុន ពេលប្រធានាធិតីម៉ាល់ឌីវថ្មី លោក Ibrahim Mohamed Solih ដែលកាន់តំណែងកាលពីថ្ងៃ ១៧ ខែវិច្ឆិកាកន្លងទៅ មកទស្សនកិច្ចទៅកាន់ឥណ្ឌានៅថ្ងៃ ១៧ ខែខែធ្នូខាងមុខ។
យ៉ាងណាក៏ដោយ ជុំវិញការតាំងទីរបស់កងទ័ពឥណ្ឌានៅលើទឹកដីម៉ាល់ឌីវអាចជារឿងចម្រូងចម្រាស។ កាលពីថ្ងៃចន្ទ រដ្ឋមន្ត្រីការបរទេសម៉ាល់ឌីវ Abdullah Shahid ក្នុងបទសម្ភាសន៍ជាមួយកាសែត SNI ប្រកាសថា ម៉ាល់ឌីវមិនបើកទ្វារទទួលមូលដ្ឋានទ័ពបរទេសឡើយទោះប្រទេសណាក៏ដោយ។
តាមពិតទៅ ក្នុងអាណត្តិរបស់អតីតប្រធានាធិបតី Abdulla Yameen រដ្ឋាភិបាលម៉ាល់ឌីវបានខ្ចីលុយយ៉ាងច្រើនសន្ធឹកសន្ធាប់ចិន ដើម្បីហេដ្ឋារចនាសម្ព័ន្ធ ក្រោមគម្រោងគំនិតផ្តួចផ្តើមខ្សែក្រវាត់មួយ និងវិថីមួយរបស់ចិន។ គេជឿថា លោក Yameen ធ្លាប់បានទាំងប្រគល់កោះមួយចំនួនទៅឲ្យចិនផង។
ឥណ្ឌាដែលតែចាត់ទុកមហាសមុទ្រឥណ្ឌាជាភូមិសាស្ត្រដ៏សំខាន់ទាំងផ្នែកសន្តិសុខ និងពាណិជ្ជកម្មរបស់ខ្លួននោះ មានការព្រួយបារម្ភពីលទ្ធភាពដែលថា ចិនអាចនឹងសាងសង់មូលដ្ឋានទ័ពរបស់ខ្លួននៅប្រជុំកោះនៅក្នុងតំបន់នោះ។
ត្រឡប់មកវិញ ទាក់ទិននឹងបញ្ហាបំណុលម៉ាល់ឌីវជំពាក់ចិន អតីតប្រធានាធិបតីម៉ាល់ឌីវ លោក Mohamed Nasheed បានប្រាប់អ្នកសារព័ត៌មានកាលពីដើមខែវិច្ឆិកានេះថា គ្មានឡើយទិន្នន័យផ្លូវការណាមួយជុំវិញបំណុលនេះ។ ប៉ុន្តែលោកបានបង្ហើបថា បំណុលម៉ាល់ឌីវជំពាក់ចិនតែមួយមុខ គឺមានចំនួនដល់ទៅ ៣ ពាន់លានដុល្លារ ខណៈដែលធនាគារកណ្តាលម៉ាល់ឌីវបញ្ជាក់ថា ម៉ាល់ឌីវជំពាក់ចិនយ៉ាងតិច ១,៥ពាន់លានដុល្លារ។
លោក Nasheed ដែលជាមនុស្សស្និទ្ធនឹងប្រធានាធិបតីម៉ាល់ឌីវបច្ចុប្បន្ន បាននិយាយទាំងអស់សង្ឃឹមថា វាពុំអាចទៅរួចទេដែលរដ្ឋាភិបាលម៉ាល់ឌីវអាចសងបំណុលនេះបាន ដោយពឹងផ្អែកតែលើខ្លួនឯងនោះ។ មានប្រជាជនប្រហែល ៣សែននាក់ ម៉ាល់ឌីវ មានផលិតក្នុងស្រុកសរុបប្រហែល ៤ពាន់លានដុល្លារ។
ឲ្យពិតទៅ លោកប្រធានាធិបតីម៉ាល់ឌីវបច្ចុប្បន្ន Ibrahim Mohamed Solih គឺជាសមាជិកជាន់ខ្ពស់មួយរូបនៃបក្សប្រជាធិបតេយ្យម៉ាល់ឌីវរបស់លោក Nasheed។ លោក Solih បានយកឈ្នះ លោក Yameen នៅក្នុងការបោះឆ្នោត កាលពីខែកញ្ញាកន្លងទៅ។ លោក Solih ដែលមានទំនោរទៅរកឥណ្ឌា បានចាប់ផ្តើមពង្រឹងចំណងទាក់ទងជាមួយក្រុងញូវដេលី និងមានគម្រោងសើរើកិច្ចព្រមព្រៀងពាណិជ្ចកម្មសេរីជាមួយចិនមួយចំនួនផងដែរ ដែលបានធ្វើឡើងក្នុងអាណត្តិដឹកនាំរបស់លោក Yameen កាលពីឆ្នាំមុន៕