ពីនេះ ពីនោះ
ត្រីរាជទម្ងន់ ២៤០គីឡូក្រាម ត្រូវអ្នកនេសាទចាប់បានក្នុងបឹងទន្លេសាប បញ្ជូនទៅលក់នៅវៀតណាម ត្រីរាជដែលនេសាទចាប់បាននៅក្នុងបឹងទន្លេសាប ។ រូបភាពៈ vnexpress.net/Hồng Ngự
× យោងតាមការផ្សាយកាលពីថ្ងៃព្រហស្បតិ៍ទី ២៩ ខែវិច្ឆិកាឆ្នាំ ២០១៨ របស់គេហទំព័រ VNEXPRESS របស់វៀតណាម បានឲ្យដឹងថា កាលពីថ្ងៃទី ២៨ ខែវិច្ឆិកា ឆ្នាំ ២០១៨ អ្នកនេសាទនៅក្នុងប្រទេសកម្ពុជា ចាប់បានត្រីរាជមួយក្បាលនៅក្នុងបឹងទន្លេសាប ប្រវែង ២.៥ (ពីរម៉ែត្រកន្លះ) ទម្ងន់ ២៤០គីឡូក្រាម បញ្ជូនទៅលក់នៅទីប្រជុំជនហុងងឺ ខេត្តដុងថាប់ និងបញ្ជូនទៅលក់បន្តនៅទីក្រុងហូជីមិញ ប្រទេសវៀតណាម។ ដកស្រង់ចេញពីគេហទំព័រ vnexpress.net
ប្រជាជនវៀតណាម ក្នុងខេត្តដុងថាប់ ចោមរោមមើលត្រីរាជ។ រូបភាពៈ vnexpress.net/Hồng Ngự
រាជ មានឈ្មោះវិទ្យាសាស្ត្រ (Pangasianodon gigas) និងឈ្មោះជាភាសាអង់គ្លេស Mekong giant catfish។ ត្រីប្រភេទនេះ មានដងខ្លួនអតិបរមាប្រវែង ៣០០ស.ម និងទម្ងន់អតិបរមា ៣០០គីឡូក្រាម។ ត្រីរាជធំលូតលាស់លឿនជាងប្រភេទត្រីផ្សេងដទៃទៀត នៅក្នុងពិភពលោក ដោយរយៈពេល៦ឆ្នាំ វាអាចមានទម្ងន់ ចាប់ពី ១៥០ ទៅ ២០០គីឡូក្រាម។ ត្រីរាជ ធើ្វចរាចរផ្លាស់ទីចេញពីបឹងទន្លេសាប ចូលទៅរស់នៅក្នុងអាងទឹកជ្រៅ ក្នុងទន្លេមេគង្គ នាចុងរដូវប្រាំង នៅចុងខែកញ្ញា ឬដើមខែតុលា ជាមួយប្រភេទត្រីធំៗផ្សេងទៀត។ ការនេសាទត្រីរាជ ដើម្បីលក់ គឺជាការគំរាមកំហែងយ៉ាងខ្លាំង ចំពោះប្រភេទត្រីដែលជិតផុតពូជមួយនេះ។ ត្រីរាជ ត្រូវបានកត់ត្រាចូលក្នុងបញ្ជីក្រហម IUCN Red List (Critically Endangered) ក្នុងឆ្នាំ ២០១១ ជាប្រភេទត្រីរងគ្រោះជិតផុតពូជ។
វិទ្យាស្ថានស្រាវជ្រាវ និងអភិវឌ្ឍន៍ជលផលទឹកសាប នៃរដ្ឋបាលជលផល សហការជាមួយគម្រោងអច្ឆរិយភាពនៃទន្លេមេគង្គ (Wonders of the Mekong) ក្រោមជំនួយឧបត្ថម្ភពី USAID សូមធ្វើការអំពាវនាវដល់ប្រជានេសាទទាំងអស់ នៅតាមដងទន្លេសាប ជាពិសេសម្ចាស់ «ដាយត្រី» ទាំង១៤គន្លង មេត្តាជួយផ្តល់ព័ត៌មាន ក្នុងករណីចាប់បាន ឬឃើញប្រជានេសាទណាចាប់បាន ដើម្បីក្រុមការងាររបស់យើង ចុះទៅបំពាក់ស្លាកសញ្ញាសម្គាល់ រួចលែងវាចូលទៅក្នុងទន្លេវិញ តាមរយៈទូរសព្ទទំនាក់ទំនង៖ ម៉ូប៊ីតែល (012 805 347) ស្មាត (016 695 933) មិត្តហ្វូន (090 850 850)៕
© រក្សាសិទ្ធិដោយ thmeythmey.com