កីឡាអន្តរជាតិ
អន្តរជាតិ
ម៉ាឡេស៊ីទម្លាក់ថៃ ដើម្បីកក់កៅអីទៅកាន់វគ្គផ្តាច់ព្រ័ត្រ Suzuki Cup 2018
×![]()
ដោយ: ទេព ពិទូរ្យ
ក្រុមកីឡាបាល់ទាត់ជម្រើសជាតិម៉ាឡេស៊ីបានកក់កៅអីទៅកាន់វគ្គផ្តាច់ព្រ័ត្រពានរង្វាន់ AFF Suzuki Cup 2018 បន្ទាប់ពីទម្លាក់ថៃដោយគ្រាប់បាល់ចំណេញក្រៅដី ២-២ នៃការប្រកួតជើងទី២ វគ្គពាក់កណ្តាលផ្តាច់ព្រ័ត្រ នាកីឡដ្ឋាន Rajamangala ក្នុងក្រុងបាងកក យប់ថ្ងៃទី៥ ខែធ្នូនេះ។
ក្រុមម្ចាស់ផ្ទះថៃអាចរកគ្រាប់បាល់នាំមុខនៅនាទី២១ ដោយបាល់ចូលទីខ្លួនឯងរបស់កីឡាករម៉ាឡេស៊ី Irfan Zakaria មុនខ្សែការពារ Syahmi រកគ្រាប់បាល់តាមស្មើវិញនៅ៧នាទីបន្ទាប់។ បញ្ចប់តង់ទី១ក្រុមទាំងពីរសុទ្ធចូលគ្នា១-១។
ចូលដល់នាទី៦៣នៃវគ្គទី២ ម្ចាស់ផ្ទះអាចសម្រេចគ្រាប់ទី២របស់ខ្លួនដោយការតែតបញ្ចូលទីពីសំដកណាក់កីឡាករ Pansa Hemviboon ដើម្បីបន្តការនាំមុខលើក្រុមភ្ញៀវ។ ប៉ុន្តែការនាំមុខមិនទាន់បានប៉ុន្មាននាទីផងខ្សែប្រយុទ្ធជើងចាស់របស់ម៉ាឡេស៊ី Norshahrul Talaha អាចស៊ុតមួយគ្រាប់តាមស្មើវិញនៅនាទី៧១។
ឱកាសរបស់ក្រុមម្ចាស់ផ្ទះបានកើតឡើងម្តងទៀតនៅនាទី៩០+ ដោយម្ចាស់គ្រាប់បាល់ដំបូងរបស់ម៉ាឡេស៊ីបានយកដៃទៅប៉ះបាល់នៅតំបន់គ្រោះថ្នាក់ហើយត្រូវអាជ្ញាកណ្តាលឲ្យកាតក្រហម និងផ្តល់បាល់ប៉េណាល់ទី១១ម៉ែត្រដល់ភាគីថៃ។
ប៉ុន្តែការខកចិត្តបានកើតឡើងសម្រាប់ក្រុមអ្នកគាំទ្រថៃវិញក្រោយខ្សែប្រយុទ្ធឆ្នើម Adisak Kraisorn សុទ្ធបាល់ផុតឡើងលើរបាទីចេញទៅក្រៅទៅវិញ។ ចប់ការប្រកួតក្រុមទាំងទទួលបានលទ្ធផល ២-២។
ថៃបានអស់ឱកាសឈានទៅវគ្គបន្ត ព្រោះកាលពីជើងទី១ ដែលធ្វើឡើងនៅទឹកដីរបស់ម៉ាឡេស៊ីក្រុមទាំងពីរបញ្ចប់ទៅត្រឹមលទ្ធផលសូន្យស្មើប៉ុណ្ណោះ។ ម៉ាឡេស៊ីដែលអាចបន្តទៅវគ្គផ្តាច់ព្រ័ត្រមានគ្រាប់បាល់ចំណេញក្រៅដី (away goal) ដល់ទៅ២គ្រាប់។
វៀតណាម និងហ្វីលីពីននឹងត្រូវប្រជែងគ្នាសម្រាប់ការប្រកួតជើងទី២វគ្គពាក់កណ្តាលផ្តាច់ព្រ័ត្រនៅថ្ងៃស្អែកដើម្បីកាត់សេចក្តីថាក្រុមណាអាចឡើងទៅជួបម៉ាឡេស៊ី។ ជើងទី១ នៅដីហ្វីលីពីន វៀតណាមឈ្នះ២-១៕
Tag:
AFF Suzuki Cup
បាល់ទាត់
© រក្សាសិទ្ធិដោយ thmeythmey.com
