ជាតិ
សេដ្ឋកិច្ច
ផ្លូវជាតិលេខ៤៨ នឹងត្រូវពង្រីកទទឹងដល់ ១១ម៉ែត្រ ដែលគ្រោងចំណាយថវិកា៧៥លានដុល្លារ នៅឆ្នាំ២០២០
× កោះកុង៖ រដ្ឋាភិបាល គ្រោងបើកការដ្ឋានលើកកម្ពស់ផ្លូវជាតិលេខ៤៨ នៅឆ្នាំ២០២០ខាងមុខនេះ។ នេះបើតាមការឲ្យដឹងរបស់លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន នៅថ្ងៃទី១២ខែធ្នូនេះ។
ផ្លូវជាតិលេខ៤៨ ប្រវែង១៥០គីឡូម៉ែត្រ ពីផ្លូវបំបែកស្រែអំបិល ទៅទីរួមខេត្តកោះកុង នឹងត្រូវលើកកម្រិតពីផ្លូវកៅស៊ូពីរស្រទាប់ ទៅជាផ្លូវបេតុងកៅស៊ូ AC និងពង្រីកទទឹងផ្លូវពី១០ម៉ែត្រ មក១១ម៉ែត្រ។
លោក ស៊ុន ចាន់ថុល ឲ្យដឹងដូច្នេះថា៖«សង្ឃឹមថាឆ្នាំ២០២០ យើងនឹងបើកការដ្ឋានពង្រីកផ្លូវនេះទៅ ១១ម៉ែត្រដោយប្រើថវិកាកម្ចីពីកូរ៉េ។ យើងបានជ្រើសរើសក្រុមហ៊ុនត្រួតពិនិត្យបច្ចេកទេសរួចហើយ ដែលគេនឹងមកចុះសិក្សាលម្អិតប្រើរយៈពេល៦ខែ រួចដាក់ឯកសារជ្រើសរើសក្រុមហ៊ុនម៉ៅការសាងសង់ផ្លូវជាតិលេខ៤៨នេះ»។
តាមផែនការ ការស្ថាបនាផ្លូវជាតិលេខ៤៨នេះ នឹងត្រូវចំណាយទឹកប្រាក់ ៧៥លានដុល្លារ ដែលជាកម្ចីពីរដ្ឋាភិបាលកូរ៉េ ៦៧លានដុល្លារ និងថវិកាបដិភាគរបស់រដ្ឋាភិបាលកម្ពុជាចំនួន ៨លានដុល្លារ។
គួរបញ្ជាក់ថា ផ្លូវជាតិលេខ៤៨ បច្ចុប្បន្ននេះ ត្រូវបានកែលម្អជាបណ្ដោះអាសន្នរួចរាល់ហើយសម្រាប់ទទួលការធ្វើដំណើររបស់ប្រជាពលរដ្ឋ ក្នុងឱកាសបុណ្យសមុទ្រនៅខេត្តកោះកុងនាខែធ្នូនេះ។ នេះបើតាមការអះអាងរបស់លោក ស៊ុន ចាន់ថុល ក្នុងឱកាសលោកចុះត្រួតពិនិត្យផ្លូវនេះនៅថ្ងៃ១២ខែធ្នូនេះ៕
© រក្សាសិទ្ធិដោយ thmeythmey.com